Pawan Kalyan: తెలుగుదేశం పార్టీ జాతీయ కార్యనిర్వాహక అధ్యక్షుడిగా కొత్త బాధ్యతలు చేపట్టిన మంత్రి నారా లోకేశ్కు ఆంధ్రప్రదేశ్ ఉప ముఖ్యమంత్రి పవన్ కల్యాణ్ హృదయపూర్వక అభినందనలు తెలిపారు. లోకేశ్ నాయకత్వంలో పార్టీ మరింత బలోపేతం కావాలని ఆయన ఆకాంక్షించారు. ఈ మేరకు పవన్ కల్యాణ్ ఒక ప్రకటన విడుదల చేస్తూ, లోకేశ్ తన కొత్త పదవిలో పూర్తిస్థాయిలో విజయం సాధించాలని కోరుకున్నారు.
గతంలో తెలుగుదేశం పార్టీ జాతీయ ప్రధాన కార్యదర్శిగా లోకేశ్ అందించిన సేవలను పవన్ కల్యాణ్ ఈ సందర్భంగా గుర్తుచేశారు. క్షేత్రస్థాయిలో పార్టీని నడిపించడంలో ఆయనకు ఉన్న అనుభవం ఇప్పుడు జాతీయ స్థాయిలో ఎంతో ఉపయోగపడుతుందని పేర్కొన్నారు. ముఖ్యంగా ప్రస్తుతం రాష్ట్రంలో కొనసాగుతున్న కూటమి ప్రభుత్వం యొక్క స్ఫూర్తిని లోకేశ్ సమర్థంగా ముందుకు తీసుకెళ్తారని పవన్ విశ్వాసం వ్యక్తం చేశారు.
అదేవిధంగా, తెలుగుదేశం పార్టీ ఆంధ్రప్రదేశ్ రాష్ట్ర అధ్యక్షుడిగా వరుసగా రెండోసారి ఎన్నికైన పల్లా శ్రీనివాసరావుకు కూడా పవన్ కల్యాణ్ అభినందనలు తెలియజేశారు. పార్టీ అభివృద్ధి కోసం పల్లా చేస్తున్న కృషిని ఆయన కొనియాడారు. కూటమిలోని పార్టీల మధ్య సమన్వయం పాటిస్తూ, ప్రజలకు మంచి పాలన అందించడంలో వీరిద్దరూ కీలక పాత్ర పోషించాలని పవన్ కల్యాణ్ ఆకాంక్షించారు.