Pawan Kalyan: మన తూర్పు కనుమలు దట్టమైన అడవులతోనే కాదు, ప్రపంచంలో ఎక్కడా లేని అరుదైన సహజ సంపదతో నిండి ఉన్నాయని మరోసారి నిరూపితమైంది. తిరుపతి జిల్లా పరిధిలోని తూర్పు కనుమలలో పరిశోధకులు సరికొత్త రకానికి చెందిన అరుదైన మొక్కను కనుగొన్నారు.
ఈ కొత్త వృక్ష జాతికి ఆంధ్రప్రదేశ్ ఉప ముఖ్యమంత్రి, అటవీ మరియు పర్యావరణ శాఖ మంత్రి పవన్ కళ్యాణ్ ఒక ప్రత్యేకమైన పేరును ఖరారు చేశారు.
నామకరణం: ‘క్రోటన్ ఉబ్బలమడుగెన్సిస్’
యూఫోర్బియేసీ (Euphorbiaceae) కుటుంబానికి చెందిన ఈ కొత్త మొక్కకు “క్రోటన్ ఉబ్బలమడుగెన్సిస్” (Croton Ubbalamadugensis) అని పేరు పెట్టారు. తిరుపతి జిల్లాలోని ప్రసిద్ధ ఉబ్బలమడుగు జలపాతానికి సమీపంలో ఉన్న కంబకం కొండల ప్రాంతంలో మాత్రమే ఈ మొక్క సహజంగా పెరుగుతోంది. అందుకే ఆ ప్రాంత పర్యావరణ ప్రాముఖ్యతను గుర్తించి, దానికి గుర్తుగా ‘ఉబ్బలమడుగెన్సిస్’ అనే పేరును ఖరారు చేశారు.
ఈ మొక్క ఆకులు తాకగానే మంత్రముగ్ధులను చేసే అద్భుతమైన సుగంధ పరిమళాలను వెదజల్లుతాయి. దీని ప్రత్యేకతలు, సువాసన విశేషాలు పవన్ కళ్యాణ్ను ఎంతగానో ఆకట్టుకున్నాయి.
ఎలా కనుగొన్నారంటే?
రాష్ట్ర ప్రధాన అటవీ సంరక్షణాధికారి (PCCF) పి.వి. చలపతిరావు, ఆయన పరిశోధక బృందం తూర్పు కనుమల్లో నిర్వహించిన విస్తృత వృక్షశాస్త్ర పరిశోధనల్లో ఈ మొక్క వెలుగులోకి వచ్చింది.
శాస్త్రీయంగా పరిశీలించగా, దీనికి దగ్గరి పోలికలున్న ‘క్రోటన్ అరోమాటికస్’ (Croton aromaticus) జాతితో పోలిస్తే, ఈ కొత్త మొక్క ఆకృతి మరియు పునరుత్పత్తి లక్షణాలు పూర్తి భిన్నంగా ఉన్నట్లు నిర్ధారించారు.
కాపాడాల్సిన అవసరం ఎంతైనా ఉంది!
ఈ మొక్క ప్రపంచంలోనే అత్యంత పరిమితమైన కంబకం కొండల ప్రాంతంలో మాత్రమే కనిపిస్తుండటం, అక్కడి వాతావరణ మార్పుల వల్ల దీని ఉనికికి ముప్పు వాటిల్లే ప్రమాదం ఉండటంతో పరిశోధకులు దీనిని అంతరించిపోయే ప్రమాదంలో ఉన్న జాతి (Endangered Species) గా గుర్తించారు.
ఈ అరుదైన ఆవిష్కరణ తూర్పు కనుమలలో ఉన్న అపార జీవవైవిధ్యాన్ని చాటిచెప్పడమే కాకుండా, మన సహజ వారసత్వ సంపదను, ప్రకృతిని కాపాడుకోవడంలో రాష్ట్ర కూటమి ప్రభుత్వం చూపుతున్న నిబద్ధతకు అద్దం పడుతోంది.