Pawan Kalyan: ఆంధ్రప్రదేశ్‌లో సినిమా హాళ్ల నిర్వహణను పటిష్టంగా చేపట్టి, ప్రజలకు మెరుగైన అనుభవం అందించేందుకు అవసరమైన చర్యలు తీసుకోవాలని రాష్ట్ర ఉప ముఖ్యమంత్రి పవన్ కల్యాణ్ అధికారులను ఆదేశించారు. ఆయనతో సినిమాటోగ్రఫీ శాఖ మంత్రి కందుల దుర్గేశ్ సమావేశమై, ఇటీవల జరిగిన సినిమా హాళ్ల బంద్, తదనంతర పరిస్థితులపై వివరాలు సమర్పించారు.
ఈ సందర్భంగా పవన్ కల్యాణ్ పలు కీలక సూచనలు చేశారు. ముఖ్యంగా, కొత్త సినిమాల విడుదల సమయంలో టికెట్ ధరల పెంపు కోసం నిర్మాతలు వ్యక్తిగతంగా కాకుండా తప్పనిసరిగా ఫిల్మ్ ఛాంబర్ ద్వారా ప్రభుత్వాన్ని సంప్రదించే విధానాన్ని అమలు చేయాలని స్పష్టం చేశారు. తాను నటిస్తున్న హరిహర వీరమల్లు సినిమా విషయంలో కూడా ఇదే విధానం అనుసరించాల్సిందేనని ఆయన పేర్కొన్నారు.
సినిమా హాళ్లలో టికెట్ ధరలతో పాటు తినుబండారాలు, శీతల పానీయాలు, వాటర్ బాటిల్ ధరలు అధికంగా ఉండడంపై సమావేశంలో చర్చ జరిగింది. వాటి అసలైన ధరలు, విక్రయ ధరలు, నాణ్యతపై సంబంధిత శాఖలు పర్యవేక్షణ చేయాలని, అధిక ధరలను నియంత్రించేందుకు చర్యలు తీసుకోవాలని పవన్ అధికారులను ఆదేశించారు. మల్టీప్లెక్స్‌లు మరియు సింగిల్ స్క్రీన్లలో ఆహార విక్రయాలపై గుత్తాధిపత్యం ఉన్నట్టు తెలుస్తుండటంతో, ఈ విషయంపై సమగ్ర విచారణ చేయాలని సూచించారు.
తినుబండారాల ధరలు మితవైతే కుటుంబాలు పెద్ద సంఖ్యలో సినిమాలకు వస్తాయని, ఇది ప్రభుత్వానికి పన్నుల రూపంలో ఆదాయం తీసుకువస్తుందని ఆయన అభిప్రాయపడ్డారు. అందుకోసం పన్నుల శాఖతో సమీక్ష నిర్వహించాలని చెప్పారు.
సినిమా హాళ్ల బంద్ ప్రకటనకు కారణాలు, దీనికి తోడ్పాటిచేసిన వ్యక్తుల గురించి కూడా చర్చ జరిగింది. తూర్పు గోదావరి జిల్లాలోనిది ఈ బంద్ పిలుపు రావడం, కొందరు నిర్మాతలు తమకు సంబంధం లేదని స్పష్టంగా ప్రకటించడం వంటి అంశాలపై దృష్టి సారించారు. బంద్ వెనుక ఒక రాజకీయ నాయకుడి ప్రమేయం ఉన్నట్టు ఆరోపణలు ఉన్న నేపథ్యంలో, అన్ని కోణాల్లో దర్యాప్తు చేయాలని పవన్ అధికారులకు సూచించారు.
“ఈ బంద్ వెనుక ఎవరు ఉన్నా, వారు జనసేన పార్టీకి చెందినవారైనా సరే, కఠిన చర్యలు తీసుకోవాలి. బెదిరింపులతో వ్యాపారాల్ని నడిపించే వాతావరణాన్ని సహించొద్దు” అని ఆయన స్పష్టంగా పేర్కొన్నారు.
అంతేకాదు, సినిమా పరిశ్రమ అభివృద్ధికి ప్రభుత్వం సిద్ధంగా ఉందని, ఫిల్మ్ ఛాంబర్, నిర్మాతల మండలి, ఇతర సినీ సంఘాలతో సమన్వయం చేసుకుని పని చేయాలని అధికారులను ఆదేశించారు. త్వరలో ప్రకటించనున్న సమగ్ర సినిమా అభివృద్ధి పాలసీపై పరిశ్రమ నుంచి సూచనలు కోరాలని తెలిపారు.