Indiramma Indlu: తెలంగాణ రాష్ట్రంలో నిరుపేదల సొంతింటి కల సాకారం చేసేందుకు ప్రభుత్వం ప్రతిష్టాత్మకంగా చేపట్టిన ‘ఇందిరమ్మ ఇళ్ల’ పథకం ఇప్పుడు సరికొత్త సాంకేతిక సొబగులను అద్దుకుంది. రాజకీయ జోక్యం, క్షేత్రస్థాయి అవకతవకలకు తావులేకుండా, కేవలం అర్హులైన వారికే లబ్ధి చేకూరాలనే లక్ష్యంతో ముఖ్యమంత్రి రేవంత్ రెడ్డి నేతృత్వంలోని సర్కారు ఆర్టిఫిషియల్ ఇంటెలిజెన్స్ (AI) ను రంగంలోకి దించింది. ఈ 360 డిగ్రీల పారదర్శక విధానం ద్వారా లబ్ధిదారుల ఎంపిక నుంచి బిల్లుల చెల్లింపు వరకు ప్రతి అడుగును ప్రభుత్వం నిశితంగా పర్యవేక్షిస్తోంది. ఏటా రెండు విడతలుగా ఇళ్ల మంజూరు ప్రక్రియను కొనసాగించాలని నిర్ణయించిన ప్రభుత్వం, ఈ ఏడాది ఏప్రిల్ నుంచే రెండో విడతకు శ్రీకారం చుట్టబోతోంది.
ప్రస్తుత ఆర్థిక సంవత్సరం ముగిసేలోపు, అంటే ఈ మార్చి నాటికే కనీసం లక్ష ఇళ్లను పూర్తి చేసి లబ్ధిదారులకు అందించాలని ప్రభుత్వం గడువు విధించుకుంది. రాష్ట్రవ్యాప్తంగా ఇప్పటికే రూ. 22,500 కోట్లతో 4.5 లక్షల ఇళ్లను మంజూరు చేయగా, అందులో దాదాపు 2.48 లక్షల ఇళ్ల నిర్మాణాలు వేగంగా సాగుతున్నాయి. క్షేత్రస్థాయి నివేదికల ప్రకారం, సుమారు 77 వేల ఇళ్లు బేస్మెంట్ దశలో, 41 వేల ఇళ్లు గోడల దశలో ఉండగా, మరో 74 వేల ఇళ్లు స్లాబ్ వరకు చేరుకున్నాయి. ఇప్పటివరకు లబ్ధిదారుల ఖాతాల్లోకి ప్రభుత్వం రూ. 3,853.66 కోట్ల బిల్లులను నేరుగా జమ చేసి, నిర్మాణాల్లో వేగం తగ్గకుండా భరోసా కల్పిస్తోంది.
ఇది కూడా చదవండి: MSVP: MSVP కి టికెట్ రేట్లు పెంచిన ప్రభుత్వం
అనర్హులను ఏరివేయడంలో అధికారులు అనుసరిస్తున్న శాస్త్రీయ విధానం ఈ పథకానికే తలమానికం. దరఖాస్తులను మూడు విభాగాలుగా (L-1, L-2, L-3) విభజించి, ప్రాధాన్యత క్రమంలో ఇళ్లను మంజూరు చేస్తున్నారు. ఏఐ సాంకేతికత ద్వారా దరఖాస్తుదారుడికి ఇప్పటికే ఇల్లు ఉందా? విలువైన ఆస్తులు లేదా వాహనాలు ఉన్నాయా? అనే విషయాలను ఇతర ప్రభుత్వ డేటాబేస్లతో అనుసంధానించి పరిశీలిస్తున్నారు. దీనికి తోడు, క్షేత్రస్థాయిలో పంచాయతీ కార్యదర్శులు లబ్ధిదారుల ఐరిస్ (Iris) స్కాన్ చేయడం ద్వారా మోసాలకు పూర్తిగా అడ్డుకట్ట వేస్తున్నారు. ఒకసారి లబ్ధి పొంది మళ్లీ దరఖాస్తు చేసినా లేదా ఇతరుల పేర్లతో లబ్ధి పొందేందుకు ప్రయత్నించినా ఈ ఏఐ ఫిల్టరింగ్లో వెంటనే దొరికిపోవడం ఖాయం.
మరోవైపు, ఈ పథకానికి కేంద్ర ప్రభుత్వ ఆర్థిక చేయూతను పొందేందుకు రాష్ట్రం తీవ్రంగా కృషి చేస్తోంది. ఒక్కో ఇంటికి ఇచ్చే రూ. 5 లక్షల్లో కేంద్రం వాటాగా సుమారు రూ. 1.11 లక్షలు అందాల్సి ఉంది. పీఎం ఆవాస్ యోజన, ఉపాధి హామీ, స్వచ్ఛ భారత్ మిషన్ కింద రావాల్సిన ఈ నిధులపై కేంద్రంతో చర్చలు జరుపుతున్నారు. ఈ నెల 16న ఢిల్లీలో జరగనున్న కీలక సమావేశంలో ఈ నిధుల విడుదలపై ఒక స్పష్టత వచ్చే అవకాశం ఉంది. కేంద్ర నిధులు తోడైతే రాష్ట్ర ప్రభుత్వంపై భారం తగ్గి, మరింత మంది పేదలకు సొంతింటిని అందించే ప్రక్రియ వేగవంతం కానుంది.