Rain Alert: తెలుగు రాష్ట్రాల్లో భానుడు భగభగలాడుతున్నాడు. ఎండవేడిమి, ఉక్కపోతతో జనం అల్లాడిపోతున్న తరుణంలో వాతావరణ శాఖ ఒక తీపి కబురు చెప్పింది. నైరుతి బంగాళాఖాతంలో ఏర్పడిన అల్పపీడనం ప్రభావంతో ఆంధ్రప్రదేశ్, తెలంగాణ రాష్ట్రాల్లోని పలు ప్రాంతాల్లో వర్షాలు కురిసే అవకాశం ఉందని వెల్లడించింది. దీనికి తోడు రుతుపవనాలు కూడా మెల్లగా కదులుతుండటంతో ఈ వారం చివరలో అండమాన్ నికోబార్ దీవుల్లోకి ప్రవేశించడానికి పరిస్థితులు అనుకూలంగా ఉన్నాయని అమరావతి, హైదరాబాద్ వాతావరణ కేంద్రాలు తెలిపాయి.
ఆంధ్రప్రదేశ్లో వాతావరణం ఇలా..
ఏపీలోని ఉత్తర కోస్తా, దక్షిణ కోస్తా మరియు రాయలసీమ ప్రాంతాల్లో మంగళ, బుధవారాల్లో అక్కడక్కడ తేలికపాటి నుంచి మోస్తరు వర్షాలు కురిసే అవకాశం ఉంది. గురువారం రోజున వర్షం ధాటి కొంచెం పెరగొచ్చని, ముఖ్యంగా ఉరుములు, మెరుపులతో పాటు గంటకు 40 నుంచి 50 కిలోమీటర్ల వేగంతో ఈదురుగాలులు వీచే అవకాశం ఉందని అధికారులు హెచ్చరించారు. అయితే రాబోయే ఐదు రోజుల్లో పగటి ఉష్ణోగ్రతల్లో పెద్దగా మార్పు ఉండకపోవచ్చని, ఎండ తీవ్రత కొనసాగుతూనే మధ్యలో జల్లులు పడే అవకాశం ఉందని వివరించారు.
తెలంగాణలో వాతావరణ అప్డేట్స్..
తెలంగాణ విషయానికి వస్తే, ఈరోజు రాష్ట్రంలోని కొన్ని జిల్లాల్లో ఉరుములు, మెరుపులతో కూడిన తేలికపాటి వర్షాలు కురిసే అవకాశం ఉంది. ఈ సమయంలో గంటకు 30 నుంచి 40 కిలోమీటర్ల వేగంతో గాలులు వీచవచ్చు. అయితే రేపు, ఎల్లుండి రాష్ట్రంలో మళ్లీ పొడి వాతావరణం ఏర్పడుతుందని, దీనివల్ల ఎండలు మరింత ముదిరే అవకాశం ఉందని వాతావరణ కేంద్రం తెలిపింది. రానున్న నాలుగు రోజుల్లో ఉష్ణోగ్రతలు మరో 2 నుంచి 4 డిగ్రీల వరకు పెరిగే ప్రమాదం ఉందని, ప్రజలు జాగ్రత్తగా ఉండాలని సూచించింది.
ప్రజలకు సూచనలు..
వర్షం పడే సమయంలో చెట్ల కింద గానీ, విద్యుత్ స్తంభాల దగ్గర గానీ ఉండకూడదని అధికారులు హెచ్చరిస్తున్నారు. ముఖ్యంగా ఈదురుగాలులు వీస్తున్నప్పుడు బయట తిరగడం ప్రమాదకరమని తెలిపారు. రైతులు తమ పంట ఉత్పత్తులను జాగ్రత్త పరుచుకోవాలని, ఎండ తీవ్రత పెరిగే అవకాశం ఉన్నందున మధ్యాహ్నం వేళల్లో బయటకు వచ్చేటప్పుడు తగిన జాగ్రత్తలు తీసుకోవాలని వాతావరణ శాఖ కోరింది.