KTR: “ముఖ్యమంత్రి పీఠంపై కూర్చుని రాష్ట్రాన్ని ఎయిడ్స్ రోగితో, క్యాన్సర్ పేషెంట్తో పోల్చడం రేవంత్ రెడ్డి రాజకీయ భావ దారిద్ర్యానికి (Intellectual Bankruptcy) నిదర్శనం. జాక్పాట్ తగిలి ముఖ్యమంత్రి అయిన రేవంత్ రెడ్డి.. 30 నెలల పాలన పూర్తయినా ప్రజలకు చేసిన ఒక్క మంచి పని కూడా చెప్పుకోలేకపోతున్నారు” అని బీఆర్ఎస్ వర్కింగ్ ప్రెసిడెంట్ కేటీఆర్ తీవ్రస్థాయిలో ధ్వజమెత్తారు. తింటున్న పళ్లెంలోనే మన్ను పోసుకునే రకం రేవంత్ రెడ్డి అని, ముఖ్యమంత్రి విసిరిన సవాల్ను తాము స్వీకరిస్తున్నామని స్పష్టం చేశారు.
1. కోటి ఎకరాల మాగాణం: ప్రభుత్వ అఫీషియల్ లెక్కలతో రేవంత్ ‘కాకి లెక్కల’కు బ్రేక్!
ముఖ్యమంత్రి లాగా లెక్కలు, పత్రాలు లేకుండా తాము మాట్లాడటం లేదని.. డైరెక్టరేట్ ఆఫ్ ఎకనామిక్స్ అండ్ స్టాటిస్టిక్స్ ఇంకా మార్క్ఫెడ్ అధికారిక గణాంకాలను కేటీఆర్ మీడియాకు ప్రదర్శిస్తూ రేవంత్ రెడ్డి ఆరోపణలను తిప్పికొట్టారు.
-
సాగు విస్తీర్ణంలో విప్లవం: 2014-15లో తెలంగాణ ఏర్పడిన నాడు కేసీఆర్ గద్దెనెక్కినప్పుడు రాష్ట్రంలో మొత్తం సాగు విస్తీర్ణం కేవలం 26.13 లక్షల హెక్టార్లు. అదే కేసీఆర్ దిగిపోయేనాటికి 2023 నాటికి అది ఏకంగా 59.89 లక్షల హెక్టార్లకు (కోటి ఎకరాల మాగాణం) పెరిగింది.
-
పంటల ఉత్పత్తి: కేసీఆర్ నాయకత్వంలో పంటల ఉత్పత్తి రికార్డు స్థాయిలో రెట్టింపు అయింది. కేంద్ర మంత్రి పీయూష్ గోయెల్ సైతం ఒకప్పుడు ‘క్యా చమత్కార్ కరే భాయ్ తుమ్ లోగ్’ (ఏం చమత్కారం చేశారు బ్రదర్) అని ఆశ్చర్యపోయేలా కేసీఆర్ తెలంగాణను దేశానికి అన్నపూర్ణగా మార్చారని గుర్తుచేశారు.
2. అప్పుల వ్యవహారంలో పార్లమెంట్ సాక్షిగా కేంద్రం ఇచ్చిన నిజమైన లెక్క!
రాష్ట్రం అప్పులపాలైందని రేవంత్ రెడ్డి రోజుకో అబద్ధం చెబుతున్నారని కేటీఆర్ విమర్శించారు. రేవంత్ రెడ్డి ‘చీకటి స్నేహితుడు’ రఘునందన్ రావు పార్లమెంట్లో అడిగిన ప్రశ్నకు.. కేంద్ర ప్రభుత్వం (ఆర్బీఐ, కాగ్ నివేదికల ప్రకారం) ఇచ్చిన అధికారిక నివేదికను ఇక్కడ చూద్దాం:
| కాలమితి / ప్రభుత్వం | మొత్తం పబ్లిక్ డెట్ (అప్పు) |
| 2014 జూన్ (తెలంగాణ ఏర్పడిన నాడు) | రూ. 72,000 కోట్లు |
| 2023 డిసెంబర్ (కేసీఆర్ దిగిపోయిన నాడు) | రూ. 3,50,000 కోట్లు |
| 10 ఏళ్లలో కేసీఆర్ చేసిన నికర అప్పు | రూ. 2,78,000 కోట్లు |
కాని రేవంత్ రెడ్డి కేవలం ఈ 30 నెలల కాలంలోనే ఏకంగా నాలుగు లక్షల కోట్ల రూపాయల అప్పులు తెచ్చారని, కేసీఆర్ అప్పు చేసినా.. 10 ఏళ్లలో రైతులపై రూ. 5 లక్షల కోట్లు పెట్టుబడి పెట్టారని (ఉచిత విద్యుత్, కాళేశ్వరం, రైతు బంధు, రైతు బీమా రూపంలో) స్పష్టం చేశారు. రైతు బంధుకు, ఫీజ్ రీఇంబర్స్మెంట్కు పైసలు లేవంటూనే రాహుల్ గాంధీకి మాత్రం రూ. 1,000 కోట్లు ఇస్తాననడం వెనుక అర్థమేంటని నిలదీశారు.
3. రైతాంగానికి రూ. 1.13 లక్షల కోట్ల ‘ఎగనామం’ పెట్టిన రేవంత్ సర్కార్!
కాంగ్రెస్ ప్రభుత్వం అధికారంలోకి వచ్చిన తర్వాత కేవలం రైతాంగానికి మాత్రమే ఏకంగా రూ. 1,13,000 కోట్ల రూపాయలు ఎగవేసిందని కేటీఆర్ గణాంకాలతో సహా వివరించారు.
4. మెట్రో టేకోవర్ వెనుక 280 ఎకరాల భూములపై కన్నేసిన ‘అనుముల బ్రదర్స్’!
ఎల్ అండ్ టీ (L&T) సంస్థకు చెందిన రూ. 14,000 కోట్ల ప్రైవేట్ అప్పును రేవంత్ రెడ్డి ప్రభుత్వం ఏ కారణం చేత రాష్ట్ర ప్రజల నెత్తిపై రుద్దిందో సమాధానం చెప్పాలని కేటీఆర్ నిలదీశారు.
ల్యాండ్ స్కామ్ ఆరోపణ: మెట్రో టేకోవర్ వెనుక ఉన్న అసలు రహస్యం.. మెట్రోకు కేటాయించిన 280 ఎకరాల విలువైన భూములపై కన్నేయడమే. రేవంత్ రెడ్డి తన బ్రదర్స్, అనుయాయులకు ఆ 280 ఎకరాల భూములను కట్టబెట్టేందుకే ప్రజల సొమ్ము రూ. 14 వేల కోట్లను ప్రైవేట్ కంపెనీకి ధారాదత్తం చేస్తున్నారు. రేవంత్ రెడ్డి ప్రతి స్కీమ్ వెనుక ఒక భారీ స్కామ్ దాగి ఉంది. భవిష్యత్తులో ఆ 280 ఎకరాలను అమ్మకానికి పెట్టడం ఖాయం” అని ఆరోపించారు.
5. కృష్ణ, గోదావరి నదులను కర్ణాటకకు ‘గురుదక్షిణ’గా తాకట్టు పెట్టారు
కృష్ణా, గోదావరి నదుల ప్రయోజనాలను రేవంత్ రెడ్డి ప్రభుత్వం పైనుంచి వచ్చిన ఆదేశాలతో కర్ణాటకకు గురుదక్షిణ కింద తాకట్టు పెడుతోందని కేటీఆర్ సంచలన ఆరోపణ చేశారు. గతంలో తెలంగాణ ప్రాజెక్టులకు అడ్డంగా లేఖలు రాసిన ఆదిత్యనాథ్ దాస్ను ఇక్కడ ప్రభుత్వ సలహాదారుగా పెట్టుకోవడమే ఇందుకు నిదర్శనమన్నారు. కర్ణాటకలో జరిగిన రహస్య మీటింగ్లో వాళ్లు ఏం చెప్తే దానికి రేవంత్ రెడ్డి గంగిరెద్దులా తల ఊపుతున్నారని మండిపడ్డారు.
ఓపెన్ ఛాలెంజ్: ప్లేస్ నీది.. డేట్ నీది.. దమ్ముంటే రా!
రైతులు ఇంకా నిరుద్యోగుల సమస్యలపై ముఖ్యమంత్రి విసిరిన సవాల్ను తాము స్వీకరిస్తున్నామని కేటీఆర్ ప్రకటించారు.
అశోక్ నగర్ చౌరస్తాలో పెడతావా? వరంగల్ చౌరస్తాలో పెడతావా? ప్రెస్ క్లబ్లోనా లేక 200 కోట్లతో అర్ధరాత్రి దొంగచాటుగా గృహప్రవేశం చేసిన నీ జూబ్లీహిల్స్ ప్యాలెస్లోనా? ఎక్కడైనా మేం సిద్ధం. 10 ఏళ్లలో మేం చేసిన అభివృద్ధి.. 30 నెలల్లో నువ్వు చేసిన విద్వాంసంపై చర్చకు మేం రెడీ. రేవంత్ రెడ్డికి దమ్ముంటే తన ‘రాహుల్ బంధు’, ‘బ్రదర్స్ బంధు’ లూటీలను ఆపి, చర్చకు రావాలి. నిరూపించలేకపోతే తాము శాశ్వతంగా రాజకీయాల నుండి తప్పుకుంటాం” అని పవర్ఫుల్ ఛాలెంజ్ విసిరారు.
చివరికి బాహుబలి సినిమాలో ‘భల్లాళదేవుడికి’, చరిత్రలో ‘హిట్లర్కు’ పట్టిన గతే రేవంత్ రెడ్డికి కూడా పడుతుందని కేటీఆర్ తీవ్రస్థాయిలో హెచ్చరించారు.