Karimnagar: కరీంనగర్ జిల్లాలో రాజకీయం ఒక్కసారిగా వేడెక్కింది. గత రెండు రోజులుగా చోటుచేసుకుంటున్న పరిణామాలు ఇప్పుడు రాష్ట్రవ్యాప్తంగా సంచలనం కలిగిస్తున్నాయి. హుజూరాబాద్ ఎమ్మెల్యే పాడి కౌశిక్ రెడ్డి నివాసం, కార్యాలయంపై బీజేపీ కార్యకర్తలు దాడికి దిగడంతో పరిస్థితి ఉద్రిక్తంగా మారింది. ఈ దాడిని తీవ్రంగా ఖండిస్తూ బీఆర్ఎస్ పార్టీ నేడు కరీంనగర్ బంద్కు పిలుపునిచ్చింది. ప్రజాప్రతినిధులపై ఇలాంటి దాడులు చేయడం సరైన పద్ధతి కాదని, దీనికి నిరసనగా వ్యాపారులందరూ సహకరించి బంద్ను విజయవంతం చేయాలని గులాబీ నేతలు కోరుతున్నారు.
వివాదానికి అసలు కారణం ఇదేనా?
ఎమ్మెల్యే కౌశిక్ రెడ్డికి, బీజేపీ నేతలకు మధ్య గత కొంతకాలంగా మాటల యుద్ధం నడుస్తోంది. ఇటీవల కౌశిక్ రెడ్డి చేసిన కొన్ని వ్యాఖ్యలు బీజేపీ శ్రేణులను ఆగ్రహానికి గురిచేశాయి. దీంతో వారు నేరుగా ఎమ్మెల్యే ఇంటిని ముట్టడించే ప్రయత్నం చేశారు. ఈ క్రమంలో ఇరువర్గాల మధ్య తోపులాట, పరస్పర దాడులు జరగడంతో కరీంనగర్లో యుద్ధ వాతావరణం నెలకొంది. నేడు బీఆర్ఎస్ బంద్కు పిలుపునివ్వడంతో, బీజేపీ కూడా దీన్ని ధీటుగా ఎదుర్కొనేందుకు సిద్ధమైంది. ఫలితంగా నగరంలో ఎప్పుడు ఏం జరుగుతుందోనని సామాన్య ప్రజలు భయాందోళనకు గురవుతున్నారు.
ప్రభుత్వ హెచ్చరిక.. కాంగ్రెస్ రియాక్షన్
మరోవైపు, ఈ వ్యవహారంపై రాష్ట్ర ప్రభుత్వం సీరియస్గా స్పందించింది. రాజకీయ గొడవల వల్ల సామాన్య ప్రజలకు, విద్యార్థులకు ఎలాంటి ఇబ్బందులు కలగకూడదని స్పష్టం చేసింది. శాంతిభద్రతలకు విఘాతం కలిగిస్తే కఠిన చర్యలు తీసుకుంటామని హెచ్చరించింది. అధికార కాంగ్రెస్ పార్టీ మాత్రం ఈ బంద్ను విమర్శిస్తోంది. బీఆర్ఎస్, బీజేపీలు కలిసి నాటకాలు ఆడుతున్నాయని, ఈ బంద్తో సామాన్యులను ఇబ్బంది పెట్టవద్దని కాంగ్రెస్ నేతలు కోరుతున్నారు. అనవసరంగా షాపులు మూసివేసి నష్టపోవద్దని వ్యాపారులకు సూచించారు.
పోలీసుల పహారా.. గంగుల కమలాకర్ హౌస్ అరెస్ట్
బంద్ పిలుపు నేపథ్యంలో పోలీసులు నగరాన్ని తమ ఆధీనంలోకి తీసుకున్నారు. ఎక్కడికక్కడ చెక్ పోస్టులు ఏర్పాటు చేసి భారీగా బలగాలను మోహరించారు. గొడవలు జరిగే అవకాశం ఉన్న ప్రాంతాల్లో డ్రోన్ల ద్వారా నిఘా పెట్టారు. బంద్కు అధికారికంగా అనుమతి లేదని, బలవంతంగా దుకాణాలు మూయిస్తే అరెస్టులు తప్పవని పోలీసులు హెచ్చరిస్తున్నారు. కాగా, ఉద్రిక్తతలను తగ్గించేందుకు మాజీ మంత్రి, ఎమ్మెల్యే గంగుల కమలాకర్ను పోలీసులు హౌస్ అరెస్ట్ చేశారు. అలాగే కేంద్ర మంత్రి బండి సంజయ్ నివాసం వద్ద కూడా భద్రతను కట్టుదిట్టం చేశారు. మొత్తం మీద కరీంనగర్ ప్రస్తుతం రాజకీయ పోరుకు అడ్డాగా మారింది.