Jubilee Hills: హిజ్రాల వేషంలో వచ్చి ₹5 వేలు డిమాండ్.. 500 సీసీటీవీలు జల్లెడ పట్టి

ఆగస్టు 21న ఓ యువకుడు తన కొత్త బీఎండబ్ల్యూ లగ్జరీ కారులో జూబ్లీహిల్స్ రోడ్ నంబర్ 45లోని ప్రసిద్ధ ‘ట్రూ బ్లాక్ కాఫీ’ (True Black Coffee) కేఫ్‌కు వచ్చాడు. కేఫ్‌లో పని ముగించుకుని తిరిగి తన కారులో బయలుదేరేందుకు సిద్ధమయ్యాడు. అతడు కారు స్టార్ట్ చేసి ముందుకు తీస్తున్న క్రమంలో.. చీరలు కట్టుకుని హిజ్రాల వేషధారణలో ఉన్న నలుగురు వ్యక్తులు హఠాత్తుగా కారుకు అడ్డంగా వచ్చి నిలబడ్డారు. తమకు వెంటనే రూ.5,000 నగదు ఇవ్వాలని డిమాండ్ చేశారు. అంత డబ్బు ఇవ్వడానికి కారు యజమాని నిరాకరించడంతో, కారును ముందుకు పోనీయకుండా రోడ్డుపైనే అడ్డుకుంటూ తీవ్రంగా వేధించారు.

అదే సమయంలో అక్కడే ఉన్న ఓ యూట్యూబర్ ఈ తతంగాన్నంతా తన కెమెరాలో రికార్డ్ చేసి సోషల్ మీడియాలో పోస్ట్ చేశాడు. ఈ వీడియో నెట్టింట విపరీతంగా వైరల్ కావడంతో నగరవాసులు, నెటిజన్లు ఇలాంటి అసాంఘిక కార్యకలాపాలపై ఆగ్రహం వ్యక్తం చేశారు. దీంతో జూబ్లీహిల్స్ పోలీసులు ఈ వ్యవహారాన్ని తీవ్రంగా పరిగణించి దర్యాప్తు ప్రారంభించారు.

ఈ ముఠాను పట్టుకోవడం పోలీసులకు మొదట్లో పెద్ద సవాలుగా మారింది.జూబ్లీహిల్స్ పరిసర ప్రాంతాల నుంచి నిందితులు ఎటువైపు వెళ్లారనేది ట్రాక్ చేయడానికి పోలీసులు దాదాపు నెల రోజుల పాటు సుమారు 500 సీసీటీవీ కెమెరాలను నిశితంగా పరిశీలించారు. చివరకు సీసీటీవీ ఆధారాలతో ఆ నలుగురు మేడ్చల్-మల్కాజ్‌గిరి జిల్లా బోడుప్పల్‌లోని కాకతీయ కాలానగర్‌లో తలదాచుకున్నట్లు పోలీసులు గుర్తించారు. జూబ్లీహిల్స్ లా అండ్ ఆర్డర్ పోలీసులు, టాస్క్‌ఫోర్స్ బృందాలు సంయుక్తంగా మెరుపు దాడి చేసి నలుగురు నిందితులను రెడ్‌హ్యాండెడ్‌గా అదుపులోకి తీసుకున్నారు.

అరెస్టయిన వారంతా హిజ్రాలు కాదని, మగవారే చీరలు కట్టుకుని ఈ మోసాలకు పాల్పడుతున్నారని పోలీసులు వెల్లడించారు:

వీరంతా బోడుప్పల్‌లోని కాకతీయ కాలానగర్ నివాసితులుగా నిర్ధారించారు. వీరు ముఠాగా ఏర్పడి మహిళల వస్త్రధారణ, హిజ్రాల గెటప్‌లు వేసుకుని ట్రాఫిక్ సిగ్నల్స్, ఖరీదైన కేఫ్‌లు, మాల్స్ వద్ద విలాసవంతమైన కార్లలో వచ్చేవారిని టార్గెట్ చేసేవారు. భయపెట్టి, బెదిరించి బలవంతపు వసూళ్లకు (Extortion) పాల్పడేవారని పోలీసులు స్పష్టం చేశారు. నిందితులపై సంబంధిత సెక్షన్ల కింద కేసులు నమోదు చేసి రిమాండ్‌కు తరలించారు.