US Iran Conflict: పశ్చిమాసియా (మిడిల్ ఈస్ట్) ప్రాంతంలో మరోసారి తీవ్ర ఉద్రిక్తతలు చోటుచేసుకున్నాయి. అంతర్జాతీయంగా అత్యంత కీలకమైన హర్మూజ్ జలసంధిలో ఒక సరుకు రవాణా నౌకపై ఇరాన్ జరిపిన డ్రోన్ దాడికి అమెరికా వేగంగా బదులిచ్చింది. ఇరాన్ వైఖరిపై తీవ్ర ఆగ్రహం వ్యక్తం చేసిన అమెరికా సైన్యం, శుక్రవారం ఆ దేశంలోని పలు సైనిక స్థావరాలను టార్గెట్ చేస్తూ వైమానిక దాడులతో విరుచుకుపడింది. గత వారమే ఇరు దేశాల మధ్య కుదిరిన తాత్కాలిక కాల్పుల విరమణ ఒప్పందాన్ని ఇరాన్ తన మూర్ఖత్వంతో తుంగలో తొక్కిందని అమెరికా అధ్యక్షుడు డొనాల్డ్ ట్రంప్ మండిపడ్డారు.
అసలు ఏం జరిగిందంటే, తైవాన్కు చెందిన ఎవర్గ్రీన్ మెరైన్ సంస్థ నడుపుతున్న ‘ఎం/వీ ఎవర్ లవ్లీ’ అనే కంటైనర్ నౌక జూన్ 25న హర్మూజ్ జలసంధి గుండా ప్రయాణిస్తుండగా ఇరాన్ డ్రోన్ దాడికి పాల్పడింది. సింగపూర్ జెండాతో వెళ్తున్న ఈ నౌకపైకి ఇరాన్ మొత్తం నాలుగు డ్రోన్లను ప్రయోగించగా, అందులో మూడింటిని అమెరికా దళాలు గాల్లోనే కూల్చేశాయి. అయితే, నాలుగో డ్రోన్ నౌక పైభాగాన్ని బలంగా ఢీకొట్టింది. ఈ ప్రమాదంలో నౌకలోని బ్రిడ్జి ఏరియా కాస్త దెబ్బతిన్నప్పటికీ, అదృష్టవశాత్తూ సిబ్బంది అంతా సురక్షితంగా బయటపడ్డారు. చమురు లీకేజీ లాంటి పర్యావరణ ముప్పు ఏదీ జరగకపోవడంతో నౌక తన ప్రయాణాన్ని కొనసాగించింది. ఈ దాడి పూర్తిగా ఇరాన్ పనేనని అమెరికా ఇంటెలిజెన్స్ వర్గాలు నిర్ధారించాయి.
ఈ ఘటనపై డొనాల్డ్ ట్రంప్ తన ‘ట్రూత్ సోషల్’ ఖాతాలో స్పందిస్తూ తీవ్ర హెచ్చరికలు జారీ చేశారు. సముద్ర మార్గాల్లో సురక్షిత ప్రయాణాల కోసం స్విట్జర్లాండ్లో కుదుర్చుకున్న అంతర్జాతీయ ఒప్పందాన్ని ఇరాన్ స్పష్టంగా ఉల్లంఘించిందని ఆయన పేర్కొన్నారు. ఇరాన్పై అమెరికా ఎలాంటి చర్యలు తీసుకోబోతోందని వైట్ హౌస్ విలేకరులు అడిగిన ప్రశ్నకు, “ఆ విషయం త్వరలోనే మీ కళ్లముందే కనిపిస్తుంది” అంటూ ట్రంప్ తనదైన శైలిలో సమాధానమిచ్చారు.
ట్రంప్ హెచ్చరించిన కొద్ది గంటల్లోనే అమెరికా సెంట్రల్ కమాండ్ రంగంలోకి దిగి ఇరాన్కు గట్టి బుద్ధి చెప్పింది. ఇరాన్ భూభాగంలోని క్షిపణి లాంచింగ్ ప్యాడ్లు, డ్రోన్ నిల్వ కేంద్రాలు ఇంకా తీరప్రాంత రాడార్ వ్యవస్థలను లక్ష్యంగా చేసుకుని కచ్చితమైన క్షిపణి దాడులు నిర్వహించింది. అంతర్జాతీయ నౌకాయాన స్వేచ్ఛకు భంగం కలిగిస్తూ, సముద్ర మార్గాల్లో దాడులకు తెగబడితే పరిణామాలు ఎంత తీవ్రంగా ఉంటాయో చెప్పడానికి ఈ ప్రతీకార దాడులే నిదర్శనమని అమెరికా రక్షణ వర్గాలు స్పష్టం చేశాయి. ఈ తాజా దాడులతో పశ్చిమాసియాలో ఎప్పుడు ఏం జరుగుతుందో తెలియని యుద్ధ వాతావరణం నెలకొంది.