Rain Alert: తెలంగాణ ప్రజలకు వాతావరణ శాఖ కీలక హెచ్చరిక జారీ చేసింది. రాష్ట్రంలో రాబోయే మూడు రోజుల పాటు వాతావరణంలో పెద్ద మార్పులు రానున్నట్లు తెలిపింది. ఒకవైపు ఎండలు, వడగాల్పులు ఇబ్బంది పెడుతుండగానే.. మరోవైపు ఈదురుగాలులతో కూడిన వర్షాలు కురిసే అవకాశం ఉందని హైదరాబాద్ వాతావరణ కేంద్రం వెల్లడించింది.
ప్రస్తుతం నైరుతి రుతుపవనాలు దేశంలోకి వేగంగా విస్తరిస్తున్నాయి. అరేబియా సముద్రం, బంగాళాఖాతంలోని మరికొన్ని ప్రాంతాల్లోకి ఇవి మరింత ముందుకు సాగడానికి పరిస్థితులు అనుకూలంగా మారాయి. దీనికి తోడు ఉత్తర ప్రదేశ్ నుండి ఉత్తరాంధ్ర తీరం వరకు ఒక గాలి ద్రోణి ఏర్పడింది. ఈ మార్పుల ప్రభావంతో తెలంగాణలో రానున్న మూడు రోజులు వర్షాలు పడతాయని అధికారులు స్పష్టం చేశారు.
ఉరుములు, మెరుపులతో కూడిన వర్షాలు
రాష్ట్రంలోని పలు జిల్లాల్లో ఈరోజు, రేపు, ఎల్లుండి తేలికపాటి నుండి మోస్తరు వర్షాలు అక్కడక్కడ కురిసే అవకాశం ఉంది. ముఖ్యంగా వర్షం పడే సమయంలో గంటకు 40 నుండి 50 కిలోమీటర్ల వేగంతో బలమైన ఈదురుగాలులు వీస్తాయని, ఉరుములు, మెరుపులతో కూడిన వానలు పడే అవకాశం ఉందని వాతావరణ శాఖ హెచ్చరించింది. కాబట్టి ప్రజలు, ముఖ్యంగా రైతులు అప్రమత్తంగా ఉండాలని సూచించింది.
కొన్ని జిల్లాల్లో పెరగనున్న ఎండలు.. వడగాల్పుల హెచ్చరిక
వర్ష సూచన ఉన్నప్పటికీ, రాష్ట్రంలో రానున్న రెండు రోజుల్లో పగటి ఉష్ణోగ్రతలు స్వల్పంగా పెరిగే అవకాశం ఉందని వాతావరణ శాఖ తెలిపింది. ముఖ్యంగా రేపు, ఎల్లుండి రాష్ట్రంలోని ఉత్తర, తూర్పు జిల్లాలలో ఎండ తీవ్రత ఎక్కువగా ఉంటుందని, కొన్ని ప్రాంతాల్లో వడగాల్పులు వీచే ప్రమాదం ఉందని స్పష్టం చేసింది. ఒకే సమయంలో అటు ఎండలు, ఇటు ఉరుముల వానలు వచ్చే అవకాశం ఉన్నందున ప్రజలు వాతావరణ పరిస్థితులకు అనుగుణంగా తగిన జాగ్రత్తలు తీసుకోవాలని అధికారులు కోరారు.