Hyderabad: హైదరాబాద్‌ జూబ్లీహిల్స్‌లోని ప్రముఖ బేబీలాన్‌ పబ్‌లో తీవ్ర వివాదం చోటుచేసుకుంది. సోషల్‌ మీడియాలో వైరల్‌ అవుతున్న వివరాల ప్రకారం, ఓ ఇన్‌ఫ్లూయెన్సర్‌ మీనల్‌ పబ్‌ నిర్వాహకులపై ఆరోపణలు చేశారు.
మీనల్‌ ప్రకారం, ఆమె ఆర్డర్‌ చేయని డ్రింక్స్‌కు బిల్‌ వేశారని పబ్‌ సిబ్బందిపై ఆరోపించారు. దీనిపై ఆమె ప్రశ్నించగా సిబ్బంది దాడికి దిగారని ఫిర్యాదు చేశారు. అంతేకాదు, పబ్‌లోని లైట్లు ఆపేసి ఆమె తల్లి మరియు చెల్లిపై దాడి చేశారని పేర్కొన్నారు.
ఈ ఘటనపై జూబ్లీహిల్స్‌ పోలీస్‌ స్టేషన్‌లో మీనల్‌ ఫిర్యాదు చేశారు. దీనికి సంబంధించిన గొడవ వీడియోలను ఆమె సోషల్‌మీడియాలో పోస్ట్‌ చేయడంతో ఈ సంఘటనపై ప్రజల్లో తీవ్ర స్పందన వ్యక్తమవుతోంది.
ప్రస్తుతం పోలీసులు కేసు నమోదు చేసి దర్యాప్తు ప్రారంభించారు. పూర్తి సమాచారం కోసం మరింత వేచి చూడాల్సి ఉంది.