Gita Gopinath: ప్రపంచ ప్రఖ్యాత ఆర్థికవేత్త, భారతీయ-అమెరికన్ గీతా గోపీనాథ్ మరోసారి తన అకడమిక్ ప్రయాణం కొనసాగించేందుకు పెద్ద నిర్ణయం తీసుకున్నారు. ప్రస్తుతం అంతర్జాతీయ ద్రవ్య నిధి (IMF) లో డిప్యూటీ మేనేజింగ్ డైరెక్టర్గా ఉన్న గీతా, ఈ ఆగస్టులో ఆ హోదా నుంచి తప్పుకుంటున్నట్టు అధికారికంగా ప్రకటించారు. సెప్టెంబర్ 1 నుంచి మళ్లీ హార్వర్డ్ విశ్వవిద్యాలయంలో ఆర్థిక శాస్త్ర ప్రొఫెసర్గా బాధ్యతలు చేపట్టనున్నారు.
IMFలో గీతా ప్రయాణం
గీతా గోపీనాథ్ 2019లో IMF చీఫ్ ఎకనామిస్ట్గా చేరారు. ఈ పదవిని చేపట్టిన మొదటి మహిళగా చరిత్ర సృష్టించారు. 2022లో డిప్యూటీ మేనేజింగ్ డైరెక్టర్ హోదాకు పదోన్నతి పొందారు. కోవిడ్-19 మహమ్మారి, ఆర్థిక మాంద్యం వంటి క్లిష్ట పరిస్థితుల్లో IMFకు గీతా కీలక మార్గదర్శకత్వం అందించారు. దాదాపు 7 సంవత్సరాలపాటు IMFలో విశిష్ట సేవలు అందించిన గీతా, ఇప్పుడు తన సొంత రంగమైన అకడమిక్ కెరీర్కి తిరిగి వెళ్లాలని నిర్ణయించుకున్నారు.
హార్వర్డ్కు తిరుగు
గీతా గోపీనాథ్ 2005 నుంచి 2022 వరకు హార్వర్డ్ విశ్వవిద్యాలయంలో ఆర్థిక శాస్త్ర విభాగంలో ప్రొఫెసర్గా పనిచేశారు. అలాగే 2001 నుంచి 2005 వరకు చికాగో విశ్వవిద్యాలయం బూత్ స్కూల్ ఆఫ్ బిజినెస్లో అసిస్టెంట్ ప్రొఫెసర్గా సేవలందించారు. ఇప్పుడు తిరిగి హార్వర్డ్కి వెళ్లడం ద్వారా ఆమె తన విద్యార్థులకు గ్లోబల్ ఆర్థిక అనుభవాలను పంచుకోనున్నారు.
IMF ప్రశంసలు
IMF మేనేజింగ్ డైరెక్టర్ క్రిస్టాలినా జార్జివా, గీతా గోపీనాథ్ సేవలను పొగడ్తలతో ముంచెత్తారు. “ఆమె అసాధారణ ఆర్థికవేత్త, అద్భుతమైన మేధో నాయకురాలు, వృత్తిపట్ల అంకితభావం కలిగిన వ్యక్తి” అని కొనియాడారు. త్వరలోనే గీతా స్థానంలోకి కొత్త అధికారి పేరును ప్రకటిస్తామని తెలిపారు.
ప్రపంచ ఆర్థిక రంగంలో గుర్తింపు
గీతా గోపీనాథ్ తన విశ్లేషణాత్మక ఆలోచనలతో, ఆర్థిక రంగంపై ఉన్న లోతైన అవగాహనతో ప్రపంచవ్యాప్తంగా పేరు సంపాదించారు. IMFలో చూపిన ఆమె నాయకత్వం, నిర్ణయాలు ప్రపంచ ఆర్థిక చరిత్రలో చిరస్మరణీయంగా నిలిచిపోతాయని నిపుణులు అభిప్రాయపడుతున్నారు.
After nearly 7 amazing years at the IMF, I have decided to return to my academic roots. On September 1, 2025, I will rejoin @HarvardEcon as the inaugural Gregory and Ania Coffey Professor of Economics. I am truly grateful for my time at @IMFnews, first as Chief Economist and then…
— Gita Gopinath (@GitaGopinath) July 21, 2025