Donald Trump: అమెరికా రాజకీయాలు మరోసారి అత్యంత క్లిష్ట దశకు చేరుకున్నాయి. అధ్యక్షుడు డొనాల్డ్ ట్రంప్ తీసుకున్న ఒక సంచలన నిర్ణయం ఇప్పుడు ఆయన పదవికే ఎసరు తెచ్చేలా కనిపిస్తోంది. వెనిజులా అధ్యక్షుడు నికోలస్ మదురోను లక్ష్యంగా చేసుకుని జరిపిన సైనిక దాడి అమెరికా కాంగ్రెస్లో పెను తుపానును రేపింది. ఈ నేపథ్యంలోనే ట్రంప్ తన పార్టీ ప్రతినిధులను అప్రమత్తం చేస్తూ సంచలన వ్యాఖ్యలు చేశారు. రాబోయే మధ్యంతర ఎన్నికల్లో రిపబ్లికన్లు గెలవకపోతే, తనను పదవి నుంచి తొలగించడానికి డెమొక్రాట్లు ‘అభిశంసన’ (Impeachment) అస్త్రాన్ని ప్రయోగిస్తారని ఆయన బహిరంగంగానే ఆందోళన వ్యక్తం చేశారు.
వెనిజులా దాడి: రాజ్యాంగ ఉల్లంఘనా?
ఈ వివాదానికి ప్రధాన కేంద్రం వెనిజులాపై జరిగిన సైనిక చర్య. సాధారణంగా ఒక సార్వభౌమ దేశంపై దాడి చేయాలంటే అమెరికా కాంగ్రెస్ అనుమతి తప్పనిసరి. కానీ ట్రంప్ ఏకపక్షంగా వ్యవహరించడంపై డెమొక్రాట్లు మండిపడుతున్నారు. మేరీల్యాండ్ ఎంపీ ఏప్రిల్ మెక్లైన్ డెలానీ, కాలిఫోర్నియా సెనేటర్ స్కాట్ వీనర్ వంటి నేతలు దీన్ని రాజ్యాంగ విరుద్ధమైన ‘అక్రమ దురాక్రమణ’గా అభివర్ణించారు. ట్రంప్ చట్టాలను తుంగలో తొక్కుతున్నారని, తక్షణమే అభిశంసన ప్రక్రియ ప్రారంభించాలని వారు డిమాండ్ చేస్తున్నారు.
ఇది కూడా చదవండి: Amaravati: నేడు అమరావతిలో రెండో దశ ల్యాండ్ పూలింగ్.!
చమురు రాజకీయాలు మరియు ప్రజాస్వామ్య ముప్పు
ప్రముఖ డెమొక్రాట్ నేత మాక్సీన్ వాటర్స్ ఈ దాడి వెనుక ఉన్న ఆర్థిక ప్రయోజనాలను ఎత్తిచూపారు. వెనిజులాలోని అపారమైన చమురు నిల్వలపై నియంత్రణ సాధించడమే ట్రంప్ అసలు ఉద్దేశమని ఆమె ఆరోపించారు. ఈ చర్యలు గతంలో జరిగిన ఇరాక్ యుద్ధం వంటి వినాశకరమైన పరిణామాలకు దారితీస్తాయని ఆమె హెచ్చరించారు. మరోవైపు, న్యూయార్క్ ఎంపీ డాన్ గోల్డ్మన్ స్పందిస్తూ.. ట్రంప్ చర్యలు ప్రపంచవ్యాప్తంగా ఉన్న నియంతలకు తప్పుడు స్ఫూర్తినిస్తాయని, ఇది అమెరికా ప్రజాస్వామ్య విలువలను బలహీనపరుస్తుందని విమర్శించారు.
ఇది కూడా చదవండి: Tirumala: జనవరి 9 నుంచి ఆన్లైన్లో శ్రీవాణి దర్శనం టికెట్లు
నవంబర్ ఎన్నికలే ‘లైఫ్ అండ్ డెత్’
2026 నవంబర్లో జరగనున్న మధ్యంతర ఎన్నికలు ట్రంప్ రాజకీయ భవిష్యత్తును నిర్ణయించనున్నాయి. హౌస్ ఆఫ్ రిప్రజెంటేటివ్స్లోని మొత్తం 435 స్థానాలతో పాటు సెనేట్లోని మూడింట ఒక వంతు స్థానాలకు పోలింగ్ జరగనుంది. ప్రస్తుతం కాంగ్రెస్లో రిపబ్లికన్ల ఆధిక్యం ఉన్నప్పటికీ, అది సడలితే మాత్రం డెమొక్రాట్లకు ట్రంప్పై అభిశంసన చర్యలు చేపట్టే పూర్తి అధికారం దక్కుతుంది.
అందుకే “మనం ఈ ఎన్నికల్లో ఖచ్చితంగా గెలవాలి” అంటూ ట్రంప్ తన క్యాడర్కు పిలుపునిచ్చారు. ఒకవేళ డెమొక్రాట్లు పట్టు సాధిస్తే, ట్రంప్ ప్రతిపాదించే కీలక సంస్కరణలకు అడ్డుకట్ట పడటమే కాకుండా, ఆయన పదవీ కాలం అర్థాంతరంగా ముగిసే ప్రమాదం కూడా పొంచి ఉంది.
ప్రస్తుతానికి వాషింగ్టన్ వేదికగా సాగుతున్న ఈ రాజకీయ చదరంగం ప్రపంచ దేశాల్లో కూడా ఆసక్తిని రేపుతోంది. ట్రంప్ తన వ్యూహాలతో ఈ గండం నుంచి గట్టెక్కుతారా లేక డెమొక్రాట్ల ‘ఇంపీచ్మెంట్’ ప్లాన్ పారుతుందా అన్నది చూడాలి.