S. Shankar: దశాబ్దాల పాటు, సౌత్ ఇండియన్ సినిమా ఇండస్ట్రీలో స్టోరీతో పాటు విజువల్ గ్రాండ్నెస్ కు పెట్టింది పేరు దర్శకుడు శంకర్. బ్రహ్మాండమైన సెట్ల నుండి అత్యంత ఖరీదైన యాక్షన్ సీక్వెన్స్ల వరకు.. శంకర్ తీసిన దాదాపు ప్రతి సినిమా ‘లార్జర్ ద్యాన్ లైఫ్’ తో ప్రేక్షకులను ఆకట్టుకునేది. కానీ ప్రస్తుతం ఆయన ‘గేమ్ ఛేంజర్’, ‘ఇండియన్ 2’ సినిమాల వరుస పరాజయాలతో.. ఆయనతో సినిమా తీయడానికి నిర్మాతలు సిద్ధంగా లేకపోవడం గమనార్హం.
ప్రస్తుతం శంకర్ ఎదుర్కొంటున్న అతిపెద్ద సమస్య.. పరిశ్రమలో నిర్మాతల నమ్మకాన్ని కోల్పోవడం. భారీ బడ్జెట్తో మల్టీ-పార్ట్ (పలు భాగాలుగా) సిరీస్గా ప్లాన్ చేసిన శంకర్ ప్రతిష్టాత్మక కలల ప్రాజెక్ట్ ‘వేల్పారి’, ప్రస్తుతం ముందుకు సాగడానికి తీవ్రంగా శ్రమిస్తోంది. ప్రస్తుత మార్కెట్ పరిస్థితుల్లో ఈ సినిమాతో ముడిపడి ఉన్న ఆర్థికపరమైన రిస్క్లు చాలా ఎక్కువగా ఉండటమే దీనికి ప్రధాన కారణం. మరోవైపు, ఆయన దర్శకత్వంలోనే రావలసిన ‘ఇండియన్ 3’ కూడా పెండింగ్ పనులతో ఇంకా దాని విడుదల ప్రణాళికలపై నెలకొన్న అనిశ్చితితో నిలిచిపోయింది.
హంగులు పక్కన పెట్టి.. కథే నమ్ముకుని!
ఈ పరిణామాలన్నింటి వల్లే, ప్రస్తుతం చెన్నై ఫిల్మ్ సర్కిల్స్లో ఒక బలమైన చర్చ జోరుగా సాగుతోంది. శంకర్ కొంతకాలం పాటు భారీ బడ్జెట్ మరియు భారీ విజువల్ హంగులకు తాత్కాలికంగానైనా దూరంగా ఉండటానికి సిద్ధమవుతున్నట్లు తెలుస్తోంది. భారీ సెట్లు, గ్రాఫిక్స్ కంటే కంటెంట్ ప్రధానంగా సాగే సినిమా వైపు ఆయన మొగ్గు చూపుతున్నట్లు సమాచారం. అందులో భాగంగానే, ఒక పరిమిత బడ్జెట్ తో తక్కువ కాల వ్యవధిలో పూర్తి చేయగల ఒక ఫాస్ట్ పేస్డ్ యాక్షన్ ఎంటర్టైనర్ను రూపొందించడానికి ఆయన ప్రస్తుతం ప్రణాళికలు వేస్తున్నారు.
నిజానికి, ప్రస్తుత తరుణంలో ఆయన తీసుకోబోయే అత్యంత తెలివైన నిర్ణయం ఇదే కావచ్చు. భారీ రిస్క్తో కూడిన ఒక మెగా ప్రాజెక్ట్ కోసం సంవత్సరాల తరబడి సమయాన్ని వృథా చేసే కంటే.. బలమైన కథాంశం (స్టోరీ టెల్లింగ్), పక్కా ఎగ్జిక్యూషన్తో తనను తాను మళ్లీ నిరూపించుకోవడంపైనే శంకర్ దృష్టి పెడుతున్నట్లు కనిపిస్తోంది.