Cyclone Akvan: పశ్చిమ మధ్య బంగాళాఖాతంలో కేంద్రీకృతమైన ‘అక్వాన్’ (Cyclone Akvan) తీవ్ర తుపానుగా కొనసాగుతూ తీరం వైపు దూసుకొస్తోంది. గంటగంటకు తన మార్గాన్ని మార్చుకుంటూ ముందుకు సాగుతున్న ఈ తుపాను ప్రభావంతో ఉత్తరాంధ్ర, దక్షిణ ఒడిశా తీర ప్రాంతాలకు వాతావరణ శాఖ హైఅలర్ట్ ప్రకటించింది. శుక్రవారం (నవంబర్ 20) మధ్యాహ్నం ఆంధ్రప్రదేశ్లోని నరసాపురం – ఒడిశాలోని పూరీ మధ్య అక్వాన్ తుపాను తీరాన్ని దాటే అవకాశముందని భారత వాతావరణ శాఖ (IMD) వెల్లడించింది.
ప్రస్తుత స్థితి & గాలుల తీవ్రత – వాతావరణ శాఖ అంచనాలు..
-
ప్రస్తుతం ఎక్కడుంది?: గత 6 గంటల్లో గంటకు 5 కిలోమీటర్ల వేగంతో కదిలిన అక్వాన్ తుపాను, ప్రస్తుతం నరసాపురానికి 470 కి.మీ, కళింగపట్నానికి 490 కి.మీ, చెన్నైకి 570 కి.మీ దూరంలో కేంద్రీకృతమై ఉంది.
-
గంటకు 120 కి.మీ వేగంతో పెనుగాలులు: శుక్రవారం మధ్యాహ్నం తీరం దాటే సమయంలో గంటకు 90 నుంచి 100 కి.మీ., గరిష్ఠంగా 110 నుంచి 120 కి.మీ వేగంతో బలమైన ఈదురుగాలులు వీచే ప్రమాదం ఉంది.
-
దిశ మార్చుకున్న తుపాను: తొలుత మచిలీపట్నం లేదా బాపట్ల వద్ద తీరం దాటుతుందని అంచనా వేసినప్పటికీ, ఎల్నినో ప్రభావం, సముద్ర ఉపరితల ఉష్ణోగ్రతల్లో మార్పులు, వాతావరణంలో తేమ తక్కువగా ఉండటం వల్ల ఉత్తరాంధ్ర–దక్షిణ ఒడిశా వైపు దీని గమనం మారింది. తీరం దాటే సమయానికి కొంత బలహీనపడే అవకాశం కూడా ఉందని నిపుణులు చెబుతున్నారు.
ఏయే జిల్లాలకు రెడ్, ఆరెంజ్ అలర్ట్?
-
రెడ్ అలర్ట్ (అత్యంత భారీ వర్షాలు): శ్రీకాకుళం, విజయనగరం, విశాఖపట్నం, అల్లూరి సీతారామరాజు, అనకాపల్లి, కాకినాడ జిల్లాలు.
-
ఆరెంజ్ అలర్ట్ (భారీ నుంచి అతి భారీ వర్షాలు): పార్వతీపురం మన్యం, డాక్టర్ బి.ఆర్. అంబేద్కర్ కోనసీమ, తూర్పు గోదావరి, పశ్చిమ గోదావరి జిల్లాలు.
రంగంలోకి ఎన్డీఆర్ఎఫ్ బృందాలు – విశాఖలో జీవీఎంసీ ముందస్తు చర్యలు!
-
సహాయక బృందాల మోహరింపు: శ్రీకాకుళం, టెక్కలి, పలాసలలో మూడు ఎన్డీఆర్ఎఫ్ (NDRF) బృందాలు, పార్వతీపురం మన్యం జిల్లా సాలూరు, సీతంపేటలలో రెండు బృందాలు, విజయనగరంలో ఒక ఎస్డీఆర్ఎఫ్ (SDRF) బృందాన్ని ప్రభుత్వం సిద్ధంగా ఉంచింది.
-
విశాఖలో జీవీఎంసీ హైఅలర్ట్: గ్రేటర్ విశాఖ మున్సిపల్ కార్పొరేషన్ (GVMC) అదనపు కమిషనర్ ఎస్.ఎస్. వర్మ తెలిపిన వివరాల ప్రకారం.. నగరవ్యాప్తంగా 24/7 పనిచేసే 11 కంట్రోల్ రూమ్లను ఏర్పాటు చేశారు. ముంపునకు గురయ్యే 55 లోతట్టు ప్రాంతాలను గుర్తించి 55 పునరావాస కేంద్రాలను సిద్ధం చేశారు. 98 వార్డుల్లో ఒక్కో వార్డుకు 15 మందితో ర్యాపిడ్ రెస్పాన్స్ టీమ్లు, 30 జేసీబీలు, 70 టిప్పర్లు, 15 ఉద్యానవన బృందాలను అందుబాటులో ఉంచారు.
-
అత్యవసర హెల్ప్లైన్ నంబర్లు: విశాఖ నగర ప్రజలు సహాయం లేదా ఫిర్యాదుల కోసం 180042500009 టోల్ ఫ్రీ నంబర్కు కాల్ చేయవచ్చు లేదా 9014218870 నంబర్కు వాట్సాప్ చేయవచ్చు.
