Revanth Reddy: హైదరాబాద్ వేదికగా జరుగుతున్న ప్రతిష్ఠాత్మక అంతర్జాతీయ సదస్సు ‘భారత్ సమ్మిట్’ (Bharat Summit) చుట్టూ తెలంగాణ రాజకీయాలు ఒక్కసారిగా వేడెక్కాయి! లోక్‌సభ ప్రతిపక్ష నేత రాహుల్ గాంధీ శనివారం (నవంబర్ 14) ఈ సదస్సుకు హాజరవుతున్న నేపథ్యంలో, విపక్షాలైన బీజేపీ, బీఆర్ఎస్ చేస్తున్న విమర్శలపై ముఖ్యమంత్రి రేవంత్ రెడ్డి శుక్రవారం (నవంబర్ 13) నిర్వహించిన మీడియా సమావేశంలో తీవ్ర స్థాయిలో విరుచుకుపడ్డారు. ఢిల్లీలో కేంద్ర మంత్రులు పీయూష్ గోయల్ లాంటి నేతలు తెలంగాణ సదస్సులను స్వాగతిస్తుంటే, ఇక్కడి రాష్ట్ర బీజేపీ నేతలు, బీఆర్ఎస్ నాయకులు మాత్రం రాష్ట్రానికి వచ్చే పెట్టుబడులను అడ్డుకునేలా మాట్లాడుతున్నారని సీఎం మండిపడ్డారు.
పిలవని పేరంటానికి పాక్ వెళ్తారు.. కానీ రాహుల్ వస్తే అడ్డుకుంటారా?
మీడియా సమావేశంలో ప్రధాని మోదీ, కేంద్ర మంత్రి కిషన్ రెడ్డి తీరుపై సీఎం రేవంత్ రెడ్డి సూటి ప్రశ్నలు సంధించారు.
వాజ్‌పేయి ఉదాహరణ ప్రస్తావన: “గతంలో కేంద్రంలో కాంగ్రెస్ అధికారంలో ఉన్నప్పుడు, అప్పటి ప్రతిపక్ష నేత అటల్ బిహారీ వాజ్‌పేయిని ఐక్యరాజ్యసమితి (UN) వేదికపై దేశం తరఫున మాట్లాడటానికి పంపించాం. అది మన ప్రజాస్వామ్య సంప్రదాయం. మరి ఇప్పుడు 70 దేశాల ప్రతినిధుల ముందు భారతదేశం తరఫున సందేశం ఇవ్వడానికి లోక్‌సభ విపక్ష నేత రాహుల్ గాంధీ హైదరాబాద్ వస్తుంటే బీజేపీకి ఉన్న ఇబ్బంది ఏంటి?” అని సీఎం ప్రశ్నించారు.
మోదీపై విమర్శ: ప్రధాని నరేంద్ర మోదీ పిలవని పేరంటానికి పాకిస్థాన్ వెళ్లి నవాజ్ షరీఫ్‌ను కలుస్తారు, విదేశాల్లో పలు సదస్సులకు వెళ్తారు.. కానీ రాహుల్ గాంధీ ఏది చేసినా వ్యతిరేకిస్తారని రేవంత్ రెడ్డి విమర్శించారు. వచ్చే ఎన్నికల్లో గెలిచి రాహుల్ గాంధీ ప్రధానమంత్రి అవుతారనే భయం బీజేపీకి పట్టుకుందని ఆయన అన్నారు.
బీజేపీ, బీఆర్ఎస్ రెండు కళ్ల సిద్ధాంతంతో అడ్డుపడుతున్నాయి!
తెలంగాణ అభివృద్ధి విషయంలో బీజేపీ, బీఆర్ఎస్ ఒకే విధివిధానాలతో పనిచేస్తున్నాయని సీఎం ఆరోపించారు.
“ఒకరు విదేశీ శక్తులంటారు.. ఇంకొకరు డబ్బు వృథా అంటారు!” భారత్ సమ్మిట్‌కు 70 దేశాల నుంచి 1,000 మంది ప్రతినిధులు వస్తుంటే, విదేశీ శక్తులు పాల్గొంటున్నాయని బీజేపీ ఆరోపిస్తోందని, డబ్బు వృథా చేస్తున్నారని బీఆర్ఎస్ విమర్శిస్తోందని రేవంత్ రెడ్డి అన్నారు.
కిషన్ రెడ్డి, రాంచందర్ రావు, కేటీఆర్‌లకు సూచన: “కాంగ్రెస్ ప్రభుత్వం ఏ నిర్ణయం తీసుకున్నా గుడ్డిగా వ్యతిరేకించడం బీజేపీ, బీఆర్ఎస్‌లకు అలవాటుగా మారింది. మూసీ ప్రక్షాళనను, రోడ్ల నిర్మాణాన్ని, పెట్టుబడుల సదస్సులను అడ్డుకోవడం వల్ల రాష్ట్రానికే నష్టం. కిషన్ రెడ్డి, కేటీఆర్ ఇప్పటికైనా విజ్ఞత ప్రదర్శించాలి” అని సీఎం హితవు పలికారు.
2047 నాటికి 3 ట్రిలియన్ డాలర్ల ఎకానమీ – గిగ్ వర్కర్ల పాలసీపై హర్షం..
తెలంగాణ అనుకూలతలను, పెట్టుబడి అవకాశాలను ప్రపంచానికి చాటిచెప్పడానికే ఈ భారత్ సమ్మిట్ నిర్వహిస్తున్నామని రేవంత్ రెడ్డి స్పష్టం చేశారు. 2047 నాటికి తెలంగాణను 3 ట్రిలియన్ డాలర్ల ఆర్థిక వ్యవస్థగా తీర్చిదిద్దడమే తమ ప్రభుత్వ లక్ష్యమని తెలిపారు.
శనివారం హైదరాబాద్‌లో రాహుల్ గాంధీ గిగ్ వర్కర్లతో ప్రత్యేకంగా సమావేశమవుతారని, గిగ్ వర్కర్ల సంక్షేమం కోసం తెలంగాణ ప్రభుత్వం తీసుకొచ్చిన పాలసీ దేశంలోనే ఆదర్శంగా నిలుస్తుందని సీఎం పేర్కొన్నారు. విలేకరుల ప్రశ్నలకు సమాధానం చెప్పడానికి కూడా ప్రధాని భయపడుతున్నారని, రాజ్యాంగాన్నే 106 సార్లు సవరించుకున్నామని, దేశంలో మార్పు అవసరమని రేవంత్ రెడ్డి వ్యాఖ్యానించారు.