Chandrababu: విశాఖపట్నం వేదికగా జరుగుతున్న 31వ సీఐఐ భాగస్వామ్య సదస్సు (CII Partnership Summit-2026)లో ముఖ్యమంత్రి నారా చంద్రబాబు నాయుడు తనదైన మార్క్ విజన్‌తో గ్లోబల్ ఇన్వెస్టర్లు, 66 దేశాల ప్రతినిధులను మంత్రముగ్ధులను చేశారు! “గతంలో ‘ఈజ్ ఆఫ్ డూయింగ్ బిజినెస్’ గురించి మాట్లాడేవాళ్లం.. ఇప్పుడు ఏపీలో ‘స్పీడ్ ఆఫ్ డూయింగ్ బిజినెస్’ నడుస్తోంది. మీ దగ్గర ఐడియా ఉంటే రండి.. అనుమతుల నుంచి రిబ్బన్ కట్ చేసే వరకు 24/7 నేనూ, నా క్యాబినెట్ మీకు అండగా ఉంటాం” అంటూ ఇన్వెస్టర్లకు బంపర్ భరోసా ఇచ్చారు. అంతేకాదు, ఆంధ్రప్రదేశ్ భవిష్యత్తు రూపురేఖలను మార్చేసే సంచలన ప్రాజెక్టుల తేదీలను కూడా ఈ వేదికగా ప్రకటించి అందరినీ ఆశ్చర్యపరిచారు.
ఏపీలోకి రూ.32.49 లక్షల కోట్ల పెట్టుబడుల వెల్లువ – 76% కన్వర్షన్ రేట్!
గత ప్రభుత్వ హయాంలో ఐదేళ్లలో కేవలం రూ.2.47 లక్షల కోట్ల పెట్టుబడులు మాత్రమే వస్తే, కూటమి ప్రభుత్వం వచ్చిన రెండేళ్లలోనే అద్భుతాలు చేసిందని చంద్రబాబు గణాంకాలతో సహా వివరించారు.
మొత్తం 32.49 లక్షల కోట్లు: 2024 జూన్ నుంచి ఇప్పటివరకు కుదిరిన 714 ఒప్పందాలు (రూ.22.6 లక్షల కోట్లు), తాజా ఒప్పందాలు కలిపి మొత్తం రూ.32.49 లక్షల కోట్ల పెట్టుబడులు ఏపీకి రావడం దేశంలోనే రికార్డు అని తెలిపారు.
కేవలం సంతకాలకే పరిమితం కాకుండా, దేశంలో ఎక్కడా లేని విధంగా 76 శాతం కన్వర్షన్ రేట్ (రూ.17.1 లక్షల కోట్ల ప్రాజెక్టుల మంజూరు) సాధించామని, ఇప్పటికే రూ.7.3 లక్షల కోట్ల విలువైన ప్రాజెక్టులు గ్రౌండ్ అయ్యాయని వెల్లడించారు.
అమరావతిలో సౌత్ ఏషియా తొలి క్వాంటం కంప్యూటర్ – విశాఖలో గూగుల్!
టెక్నాలజీ రంగంలో ఏపీని గ్లోబల్ హబ్‌గా మార్చేందుకు వేసిన అడుగులను సీఎం ప్రకటించారు.
అమరావతి క్వాంటం వ్యాలీ: దక్షిణాసియాలోనే మొట్టమొదటి క్వాంటం కంప్యూటర్ ఫిబ్రవరి 3, 2027న అమరావతిలో ప్రారంభం కాబోతోందని, అక్కడ 250 ఎకరాల్లో క్వాంటం కంప్యూటింగ్ మాన్యుఫ్యాక్చరింగ్ హబ్ నిర్మిస్తున్నామని తెలిపారు.
గూగుల్ డేటా సెంటర్: విశాఖలో గూగుల్ సంస్థ 15 బిలియన్ డాలర్ల పెట్టుబడితో నిర్మిస్తున్న భారీ డేటా సెంటర్ పనులు ఇప్పటికే మొదలయ్యాయని, ఆగస్టు 15, 2028న దాన్ని ప్రారంభిస్తామని డేట్ ఫిక్స్ చేశారు.
5వ తరం ఫైటర్ జెట్ & డ్రోన్ సిటీ: పుట్టపర్తి సమీపంలో 5వ తరం ఫైటర్ జెట్ (AMCA) ప్రాజెక్టుకు కేవలం 36 రోజుల్లోనే అనుమతులిచ్చి గ్రౌండ్ చేశామని, త్వరలోనే డ్రోన్ ఎయిర్ ట్యాక్సీలు కూడా అందుబాటులోకి తెస్తామని చెప్పారు. భారత్ లక్ష్యమైన 500 గిగావాట్ల క్లీన్ ఎనర్జీలో ఒక్క ఏపీ నుంచే 160 గిగావాట్లు ఉత్పత్తి చేయనున్నామన్నారు.
“ఇన్వెస్టర్ ప్రొటెక్షన్ యాక్ట్” తెస్తున్నాం – కేంద్రమంత్రి పీయూష్ గోయల్‌కు విజ్ఞప్తి..
పరిశ్రమల రాయితీల కోసం కేంద్రమంత్రి పీయూష్ గోయల్ సూచన మేరకు దేశంలోనే తొలిసారిగా ‘ఎస్క్రో అకౌంట్’ (Escrow Account) ఏర్పాటు చేశామని, ఇకపై ఇన్వెస్టర్లు ఆఫీసుల చుట్టూ తిరగాల్సిన పనిలేకుండా ఆటోపైలట్ మోడ్‌లో రాయితీలు నేరుగా ఖాతాల్లో జమ అవుతాయని సీఎం ప్రకటించారు.
అంతేకాకుండా, ప్రభుత్వాలు మారినా ఇన్వెస్టర్లకు ఎలాంటి ఇబ్బందులు కలగకుండా ఉండేందుకు రాష్ట్రంలో ‘ఇన్వెస్టర్ ప్రొటెక్షన్ యాక్ట్’ తెస్తున్నామని, దీన్ని కేంద్ర స్థాయిలోనూ చట్టంగా తీసుకురావాలని పీయూష్ గోయల్‌ను కోరారు.
నాడు అనంతపురం కరువు జిల్లాకు 8 నెలల్లోనే శ్రీశైలం నీళ్లు తెచ్చి కియా (Kia) కార్ల పరిశ్రమను 18 నెలల్లో నిలబెట్టిన అనుభవం తమదని గుర్తుచేశారు.
అమరావతి ‘బ్లూ-గ్రీన్’ సిటీ – తిరుపతి గ్లోబల్ డిజైన్ క్యాపిటల్!
అమరావతి ప్రత్యేకతలు: 29 వేల మంది రైతులు స్వచ్ఛందంగా ఇచ్చిన 33 వేల ఎకరాల్లో, ఒక్క కరెంట్ స్తంభం (No Pole) కూడా కనిపించకుండా అండర్‌గ్రౌండ్ డక్ట్‌లతో, 50% పచ్చదనంతో, కేవలం ఎలక్ట్రిక్ వాహనాలు మాత్రమే తిరిగే కాలుష్య రహిత నగరంగా అమరావతిని నిర్మిస్తున్నామని చెప్పారు. ఇక్కడ మీ కంపెనీల సెకండ్ హెడ్ క్వార్టర్స్ పెట్టుకోండి, మీ ఆయుష్షు పెరుగుతుందని సరదాగా ఆహ్వానించారు.
నదుల అనుసంధానం & పోలవరం: మార్చి 2027 నాటికి పోలవరం ప్రాజెక్టును పూర్తి చేసి జాతికి అంకితం చేస్తామని, గోదావరి–కావేరి నదులను అనుసంధానం చేస్తే దేశంలో నీటి యుద్ధాలు ఉండవన్నారు. తిరుపతిని 10 వేల ఎకరాల్లో ‘గ్లోబల్ డిజైన్ క్యాపిటల్’గా, ఏపీని ప్రపంచ హార్టికల్చర్ హబ్‌గా మారుస్తామన్నారు.
‘మార్గదర్శి–బంగారు కుటుంబం’ (P4 మోడల్) – ఆకట్టుకున్న రియల్ స్టోరీ..
సమాజంలో ఆర్థిక అసమానతలు తగ్గించేందుకు తాము తెచ్చిన ‘P4’ (Public-Private-People Partnership – మార్గదర్శి బంగారు కుటుంబం) గురించి చంద్రబాబు ఒక అద్భుతమైన ఉదాహరణ చెప్పారు. తన నియోజకవర్గంలో ఇటుక బట్టీలో రోజుకు రూ.300 కూలీకి పనిచేసే ఓ మహిళ కుటుంబాన్ని టీవీఎస్ (TVS) సంస్థ దత్తత తీసుకుని రూ.1.50 లక్షల ఆర్థిక సాయం, బిజినెస్ ట్రైనింగ్ ఇవ్వడంతో.. నేడు ఆ మహిళ 20 మందికి ఉపాధి కల్పిస్తూ నెలకు రూ.2 లక్షలు (ఏడాదికి రూ.25 లక్షలు) సంపాదిస్తోందని తెలిపారు. 2047 నాటికి భారత్ ప్రపంచంలో నంబర్ వన్ ఎకానమీగా, ‘స్వర్ణాంధ్ర’ దేశంలో నంబర్ వన్ రాష్ట్రంగా, తెలుగు కమ్యూనిటీ ప్రపంచంలోనే నంబర్ వన్ కమ్యూనిటీగా ఎదగాలన్నదే తన జీవిత లక్ష్యమని చంద్రబాబు స్పష్టం చేశారు.
