Chandrababu: దేశంలో డిజిటల్ మౌలిక సదుపాయాల కల్పనలో భారత్ ప్రపంచంలోనే నంబర్ వన్ స్థానంలో నిలిచిందని ఆంధ్రప్రదేశ్ ముఖ్యమంత్రి నారా చంద్రబాబు నాయుడు కొనియాడారు. అమెరికా వంటి అగ్రరాజ్యంలో సైతం లేని ‘సింగిల్ పవర్ గ్రిడ్’ వ్యవస్థ భారత్‌లో ఉందని, రోడ్ గ్రిడ్ విషయంలో మన దేశం ప్రపంచంలోనే రెండో స్థానంలో ఉందని ఆయన గుర్తుచేశారు.
రాబోయే నవంబర్ 12, 13 తేదీల్లో విశాఖపట్నంలో ప్రతిష్టాత్మకంగా జరగనున్న 31వ సీఐఐ భాగస్వామ్య సదస్సు (CII Partnership Summit 2026) సన్నాహకాల్లో భాగంగా.. న్యూఢిల్లీలోని భారత్ మండపంలో గురువారం నిర్వహించిన కర్టెన్ రైజర్ కార్యక్రమంలో ముఖ్యమంత్రి చంద్రబాబు నాయుడు ముఖ్య అతిథిగా పాల్గొని ప్రసంగించారు.
సీఐఐతో నాది 30 ఏళ్ల బంధం.. మొదటి హక్కులు నాకే ఉంటాయి
కాన్ఫెడరేషన్ ఆఫ్ ఇండియన్ ఇండస్ట్రీ (CII)తో తనకున్న సుదీర్ఘ అనుబంధాన్ని చంద్రబాబు ఆసక్తికరంగా గుర్తుచేసుకున్నారు.
1895లో కోల్‌కతాలో ఏర్పాటైన సీఐఐ సంస్థను 1995-96 ప్రాంతంలో ఉమ్మడి ఏపీ సీఎంగా నేనే ఎక్కువగా ప్రమోట్ చేశాను. అందుకే సీఐఐపై మొదటి హక్కులు నాకే ఉంటాయి. ఈ సంస్థతో నాకు మూడు దశాబ్దాల అనుబంధం ఉంది.
1990ల నాటి ఐటీ విప్లవాన్ని అందిపుచ్చుకుని హైదరాబాద్‌ను గ్లోబల్ ఐటీ కేంద్రంగా తీర్చిదిద్దాను. ఆనాడు నేను వేసిన పునాదులు, చేపట్టిన సంస్కరణల ఫలితంగానే నేడు తెలంగాణ రాష్ట్రం తలసరి ఆదాయంలో దేశంలోనే నంబర్ వన్‌గా నిలిచింది అని వివరించారు.
మోదీకి ప్రశంసలు..
ప్రభుత్వాధినేతగా (సీఎంగా, పీఎంగా) ప్రధాని నరేంద్ర మోదీ 25 ఏళ్ల ప్రజాసేవను విజయవంతంగా పూర్తి చేసుకున్నారని, ప్రజల్లో అపారమైన విశ్వసనీయత సంపాదించుకున్నారని కొనియాడారు. దేశంలో డిజిటల్ ఇన్‌ఫ్రాస్ట్రక్చర్‌కు మోదీ పెద్దపీట వేశారని, త్వరలోనే ముంబై-అహ్మదాబాద్ బుల్లెట్ రైలు అందుబాటులోకి రానుందని తెలిపారు.
ఈజ్ ఆఫ్ డూయింగ్ కాదు.. ‘స్పీడ్ ఆఫ్ డూయింగ్ బిజినెస్’..
ఆంధ్రప్రదేశ్‌లో పెట్టుబడులకు అత్యంత అనుకూల వాతావరణం ఉందని పారిశ్రామికవేత్తలకు సీఎం చంద్రబాబు భరోసా ఇచ్చారు. మేము ఈజ్ ఆఫ్ డూయింగ్ బిజినెస్ (Ease of Doing Business) దశను దాటి.. ‘స్పీడ్ ఆఫ్ డూయింగ్ బిజినెస్’ (Speed of Doing Business) విధానానికి మారాం. పెట్టుబడిదారులు అనుమతుల కోసం ప్రభుత్వ ఆఫీసుల చుట్టూ తిరగాల్సిన అవసరమే లేదు. అంతా సింగిల్ విండో ఆన్‌లైన్ విధానంలో, రియల్ టైమ్‌లోనే పరిష్కారం లభిస్తుంది. రియల్ టైమ్ గవర్నెన్స్ సొసైటీ (RTGS) ద్వారా సరికొత్త సాంకేతికత, ఆర్టిఫిషియల్ ఇంటెలిజెన్స్ (AI) జోడించి సేవలను మరింత వేగవంతం చేశామన్నారు.
ఏపీలో రాబోయే మెగా ప్రాజెక్టులు & రంగాలవారీ వ్యూహం..
రాష్ట్ర సమగ్రాభివృద్ధి కోసం ప్రభుత్వం తీసుకుంటున్న కీలక నిర్ణయాలను సీఎం వివరించారు..
-
క్వాంటమ్ వ్యాలీ (Amaravati Quantum Valley):అమరావతిని గ్లోబల్ టెక్నాలజీ హబ్‌గా నిలిపేందుకు దేశంలోనే మొట్టమొదటి క్వాంటమ్ కంప్యూటర్‌ను ప్రారంభించే దిశగా ‘క్వాంటమ్ వ్యాలీ’ని ఏర్పాటు చేస్తున్నాం.
-
బ్లూ ఎకానమీ – పోర్టుల కారిడార్:రాష్ట్రానికి ఉన్న 974 కిలోమీటర్ల సుదీర్ఘ సముద్ర తీరాన్ని సద్వినియోగం చేసుకునేలా.. ప్రతి 50 కిలోమీటర్లకు ఒక పోర్టు లేదా ఫిషింగ్ హార్బర్ ఉండేలా ప్రణాళికలు రచిస్తున్నాం. పోర్టులను అనుసంధానిస్తూ భారీ ఇండస్ట్రియల్ కారిడార్లు నిర్మిస్తున్నాం.
-
డ్రోన్ సిటీ & డిఫెన్స్ హబ్:కర్నూలు జిల్లా ఓర్వకల్లులో అత్యాధునిక ‘డ్రోన్ సిటీ’ ఏర్పాటు పనులు వేగవంతం చేశాం. పుట్టపర్తిలో ప్రతిష్టాత్మక డిఫెన్స్, ఏరోస్పేస్ ప్రాజెక్టుకు శంకుస్థాపన చేశాం. దేశంలోనే అతిపెద్ద రక్షణ రంగ తయారీ కేంద్రంగా ఏపీ మారబోతోంది.
-
గ్రీన్ ఎనర్జీ & ఎగుమతులు:2015లోనే చౌకగా సోలార్ విద్యుత్ అందించడంపై దృష్టి సారించాం. ఇప్పుడు భవిష్యత్ అవసరాల కోసం గ్రీన్ హైడ్రోజన్, గ్రీన్ అమోనియా ఉత్పత్తి, ఎగుమతులకు చర్యలు చేపట్టాం.
-
రాయలసీమ గ్లోబల్ హార్టికల్చర్ హబ్:రాయలసీమను ప్రపంచస్థాయి ఉద్యానవన పంటల కేంద్రంగా మార్చేందుకు గ్లోబల్ హార్టికల్చర్ హబ్ ప్రాజెక్టును ఇప్పటికే పట్టాలెక్కించాం. డిజిటల్ హబ్‌లు, క్లౌడ్ డేటా సెంటర్ల ఏర్పాటుకు ప్రపంచ దిగ్గజ కంపెనీలు ముందుకు వస్తున్నాయి.
రాష్ట్రానికి భారీగా పెట్టుబడులను ఆకర్షించడమే లక్ష్యంగా నవంబర్ 12, 13 తేదీల్లో వైజాగ్‌లో జరిగే సీఐఐ భాగస్వామ్య సదస్సుకు తరలిరావాలని దేశీయ, విదేశీ పారిశ్రామికవేత్తలకు సీఎం చంద్రబాబు ఆహ్వానం పలికారు.