CJP Protest: ఓటర్ల ప్రత్యేక సంక్షిప్త సవరణ (SIR) ప్రక్రియలో భారీ ఎత్తున ఓట్ల గల్లంతు జరిగిందని, ‘ఓటు చోరీ’కి బాధ్యత వహిస్తూ చీఫ్ ఎలక్షన్ కమిషనర్ (CEC) జ్ఞానేష్ కుమార్ వెంటనే రాజీనామా చేయాలని డిమాండ్ చేస్తూ దేశవ్యాప్తంగా నిరసనలు ఉధృతమవుతున్నాయి. గురువారం బెంగళూరులోని చారిత్రక ఫ్రీడమ్ పార్క్ వేదికగా కాక్రోచ్ జనతా పార్టీ (CJP) చేపట్టిన భారీ ప్రజా నిరసన తీవ్ర సంచలనం సృష్టించింది.
సీజేపీ వ్యవస్థాపకుడు అభిజీత్ దీప్కే, నేతలు సౌరవ్ దాస్, అశుతోష్ రంకాతో పాటు ప్రముఖ నటుడు-సామాజిక కార్యకర్త ప్రకాష్ రాజ్, ప్రముఖ యూట్యూబర్ ధ్రువ్ రాఠీ ఈ పోరాటంలో నేరుగా వేదికపైకి వచ్చి చేతులు కలపడంతో ఉద్యమం ఒక్కసారిగా హీటెక్కింది.
మిన్నంటిన నినాదాలు – ‘పీపుల్స్ ట్రిబ్యునల్’, చెప్పుల నిరసన..
గురువారం ఉదయం నుంచే పౌర హక్కుల సంఘాలు, యువజన సంఘాలు, విద్యార్థి సంఘాల ప్రతినిధులు వేలాదిగా ఫ్రీడమ్ పార్క్‌కు తరలివచ్చారు. మధ్యాహ్నం 1 గంట ప్రాంతంలో నాయకులు వేదికపైకి రాగానే ఆందోళనకారులు పెద్ద ఎత్తున నినాదాలు చేశారు.
“ఎస్ఐఆర్ రద్దు చేయాలి (SIR radd karo)”, “జ్ఞానేష్ కుమార్ గద్దె దిగాలి (Gyanesh Kumar gaddi choro)”, “ఓటు దొంగలు గద్దె దిగాలి (Vote Chor)” అంటూ చేసిన నినాదాలతో ఫ్రీడమ్ పార్క్ దద్దరిల్లింది. ఓటర్ల జాబితా నుంచి పేర్లు తొలగించబడి నష్టపోయిన కర్ణాటక ప్రజల వాంగ్మూలాలను వినేందుకు ‘పీపుల్స్ ట్రిబ్యునల్’ (జనతా న్యాయాలయ) నిర్వహించారు.
ఓటు హక్కు కోల్పోయిన మహిళలకు సంఘీభావంగా, ఎన్నికల సంఘం తీరుకు నిరసనగా ఈ ట్రిబ్యునల్ అనంతరం ప్రత్యేకంగా ‘చెప్పుల నిరసన’ చేపట్టనున్నట్లు నిర్వాహకులు ప్రకటించారు.
“ప్రభుత్వమే ఓటర్లను ఎంపిక చేసుకుంటోంది”: నటుడు ప్రకాష్ రాజ్ ధ్వజం
సభను ఉద్దేశించి నటుడు ప్రకాష్ రాజ్ ప్రసంగిస్తూ కేంద్ర ఎన్నికల సంఘంపై నిప్పులు చెరిగారు.
-
దేశ ప్రజలకు అవమానం:“ఈ ఎస్ఐఆర్ (SIR) ప్రక్రియ ద్వారా ఎన్నికల సంఘం మొత్తం దేశ ప్రజలను అవమానించింది. సాధారణంగా ప్రజాస్వామ్యంలో ఎవరు ప్రభుత్వాన్ని ఏర్పాటు చేయాలో ప్రజలు నిర్ణయిస్తారు. కానీ ఈ దేశంలో విచిత్రంగా.. ఎవరికి ఓటు హక్కు ఉండాలో ప్రభుత్వమే నిర్ణయిస్తోంది” అంటూ విమర్శించారు.
-
13 కోట్ల ఓట్ల గల్లంతు:దాదాపు 20 రాష్ట్రాలు, కేంద్రపాలిత ప్రాంతాల్లో 13 కోట్ల మందికి పైగా ఓటర్ల పేర్లను జాబితాల నుంచి తొలగించారని, ఇది ప్రజల రాజ్యాంగ హక్కులపై జరిగిన దాడి అని మండిపడ్డారు.
-
వ్యక్తులపై కాదు.. వ్యవస్థపై పోరాటం:“ఈ ఉద్యమ లక్ష్యం కేవలం జ్ఞానేష్ కుమార్‌ను తొలగించడం మాత్రమే కాదు. ఆయన పోతే ఇంకొకరు వస్తారు. ప్రజల హక్కులను కాలరాస్తున్న ఈ ఎస్ఐఆర్ ప్రక్రియను పూర్తిగా రద్దు చేయడమే మా ప్రధాన డిమాండ్” అని ప్రకాష్ రాజ్ స్పష్టం చేశారు.
ఈసీఐలోనే విభేదాలు – ఇన్వెస్టిగేటివ్ రిపోర్ట్ సంచలనం..
ఎన్నికల సంఘం తీరుపై విపక్షాలు, ప్రజాసంఘాలు చేస్తున్న ఆరోపణలకు తోడు.. తాజాగా ‘ది ఇండియన్ ఎక్స్‌ప్రెస్’ పత్రిక వెలువరించిన పరిశోధనాత్మక కథనం మరింత ఆజ్యం పోసింది:
-
ఎన్నికల సంఘం తీసుకున్న వివాదాస్పద నిర్ణయాలు, ఓటర్ల పేర్ల తొలగింపు-పునరుద్ధరణపై స్వయంగా ఎన్నికల కమిషన్‌లోనే తీవ్ర అంతర్గత విభేదాలు ఉన్నట్లు ఆ నివేదిక పేర్కొంది.
-
గత 10 నెలల కాలంలో తోటి ఎన్నికల కమిషనర్లు సుఖ్‌బీర్ సింగ్ సంధు, వివేక్ జోషి కనీసం 14 సార్లు ఎస్ఐఆర్ నిర్ణయాలపై లిఖితపూర్వకంగా అభ్యంతరాలు వ్యక్తం చేసినట్లు కథనంలో వెల్లడైంది.
బెంగళూరు నిరసన అనంతరం అక్టోబర్ 10న ఢిల్లీలోని జంతర్ మంతర్ వద్ద భారీ స్థాయిలో ఆందోళన చేపట్టనున్నట్లు సీజేపీ ప్రతినిధులు స్పష్టం చేశారు.