Bandla Ganesh: ప్రముఖ నటుడు, సినీ నిర్మాత బండ్ల గణేశ్కు (Bandla Ganesh) ఆస్తి వేలం వివాదంలో అత్యున్నత న్యాయస్థానం సుప్రీంకోర్టులో ఎదురుదెబ్బ తగిలింది. బ్యాంకు రుణాల వ్యవహారంలో యూనియన్ బ్యాంక్ తీసుకున్న ఆస్తి వేలం చర్యలను సవాలు చేస్తూ ఆయన దాఖలు చేసిన పిటిషన్పై విచారణ జరిపిన సుప్రీంకోర్టు, ఈ విషయంలో జోక్యం చేసుకునేందుకు నిరాకరించింది.
1. అసలు వివాదం ఏంటి?
హైదరాబాద్లోని మెస్సర్స్ శ్రీ పరమేశ్వర పౌల్ట్రీ ఫామ్ ప్రైవేట్ లిమిటెడ్ తీసుకున్న రుణాల కోసం బండ్ల గణేశ్ ఇంకా ఆయన కుటుంబ సభ్యులు తమ సొంత ఆస్తులను యూనియన్ బ్యాంక్ వద్ద పూచీకత్తుగా తాకట్టు పెట్టారు.
కంపెనీ దివాలా పరిష్కార ప్రక్రియలో భాగంగా, బకాయిలు వసూలు చేసుకునేందుకు ఆ తాకట్టు ఆస్తులను యూనియన్ బ్యాంక్ వేలం వేసి స్వాధీనం చేసుకుంది.
2. డీఆర్టీ, హైకోర్టు నుంచి సుప్రీంకోర్టు వరకు..
బ్యాంక్ చేసిన వేలం ప్రక్రియను సవాలు చేస్తూ బండ్ల గణేశ్ రుణ వసూళ్ల ట్రైబ్యునల్ (DRT) ను ఆశ్రయించగా.. అక్కడే ఆయనకు ఊరట లభించింది. ఆస్తి వేలాన్ని రద్దు చేస్తూ, ఆస్తిని తిరిగి యజమానులకు ఇవ్వాలని, కొనుగోలుదారుడికి వడ్డీతో డబ్బులు చెల్లించాలని డీఆర్టీ ఆదేశించింది.
డీఆర్టీ ఉత్తర్వులను సవాలు చేస్తూ యూనియన్ బ్యాంక్ తెలంగాణ హైకోర్టుకు వెళ్లగా.. డీఆర్టీ తీర్పును కొట్టివేస్తూ, బ్యాంక్ చేసిన వేలాన్ని హైకోర్టు సమర్థించింది.
హైకోర్టు ఇచ్చిన తీర్పును సవాలు చేస్తూ బండ్ల గణేశ్ సుప్రీంకోర్టును ఆశ్రయించారు. అయితే, హైకోర్టు తీర్పులోనే జోక్యం చేసుకోవడానికి సుప్రీంకోర్టు నిరాకరిస్తూ ఆయన పిటిషన్ను తిరస్కరించింది.