Herbal Tea: సాధారణంగా చాలామంది మహిళలు హార్మోన్ల అసమతుల్యత (Hormonal Imbalance) పీరియడ్స్ (రుతుస్రావం) సమయంలో అనేక ఆరోగ్య సమస్యలను ఎదుర్కొంటూ ఉంటారు. ముఖ్యంగా పీరియడ్స్ వచ్చే ముందు లేదా ఆ సమయంలో వచ్చే విపరీతమైన కడుపునొప్పి, నడుమునొప్పి వారిని తీవ్ర అసౌకర్యానికి గురిచేస్తుంది. భారతదేశంలో పాతకాలం నుండి ఈ సమయంలో వేడివేడి కషాయాలు లేదా కొన్ని రకాల పదార్థాలతో మరిగించిన నీటిని తాగాలని పెద్దలు సలహా ఇస్తుంటారు. వేడి పానీయాలు తీసుకోవడం వల్ల రక్తప్రసరణ (Blood Flow) సజావుగా సాగి నొప్పి తగ్గుతుందని నమ్ముతారు.
అయితే, పీరియడ్స్ సమయాల్లో వచ్చే రకరకాల ఇబ్బందుల నుండి ఎలాంటి సైడ్ ఎఫెక్ట్స్ లేకుండా ఉపశమనం పొందడానికి.. ఆయుర్వేదంలో ఒక అద్భుతమైన హెర్బల్ టీ (Herbal Tea) అందుబాటులో ఉందని నిపుణులు చెబుతున్నారు. ‘ఆశా ఆయుర్వేద’ డైరెక్టర్, ప్రముఖ స్త్రీ రోగ నిపుణురాలు, ఆయుర్వేద వైద్యురాలు డాక్టర్ చంచల్ శర్మ ఈ ప్రత్యేక హెర్బల్ టీ విశేషాలను, దాని ప్రయోజనాలను వివరించారు.
పుదీనా, తులసి, దాల్చినచెక్కల ‘త్రివేణి సంగమం’!
పుదీనా, తులసి ఇంకా దాల్చిన చెక్క.. ఈ మూడింటిలోనూ శరీరానికి మేలు చేసే యాంటీఆక్సిడెంట్లు, యాంటీ ఇన్ఫ్లమేటరీ (వాపు, నొప్పిని తగ్గించేవి) యాంటీ బ్యాక్టీరియల్ గుణాలు పుష్కలంగా ఉంటాయి. 2025లో ‘ఇరానియన్ జర్నల్ ఆఫ్ నర్సింగ్ అండ్ మిడ్వైఫరీ రీసెర్చ్’ లో ప్రచురితమైన ఒక సిస్టమ్యాటిక్ రివ్యూ ప్రకారం.. పీరియడ్స్ సంబంధిత సమస్యలను నయం చేయడంలో పుదీనా అత్యంత ప్రభావవంతంగా పనిచేస్తుందని శాస్త్రీయంగా నిరూపితమైంది.
ఈ మూడింటి కాంబినేషన్తో తయారుచేసే హెర్బల్ టీ వల్ల కలిగే అద్భుత ప్రయోజనాలు ఇవే:
- రొమ్ముల బరువు, నొప్పి నుండి ఉపశమనం: పీరియడ్స్ సమయంలో చాలామంది మహిళల్లో రొమ్ములు బరువుగా అనిపించడం, అక్కడ నొప్పి రావడం జరుగుతుంది. ఈ టీ తాగడం వల్ల ఆ సమస్య తగ్గుతుంది. 2015లో ‘ఇరానియన్ రెడ్ క్రెసెంట్ మెడికల్ జర్నల్’ లో ప్రచురితమైన అధ్యయనం ప్రకారం.. దాల్చినచెక్క ఎలాంటి దుష్ప్రభావాలు లేకుండా పీరియడ్స్ నొప్పిని, అధిక రక్తస్రావాన్ని (Heavy Bleeding), వికారం ఇంకా వాంతులను గణనీయంగా తగ్గిస్తుంది.
- హార్మోన్ల సమతుల్యత (Hormone Balance): ఈ హెర్బల్ టీని క్రమం తప్పకుండా తీసుకోవడం వల్ల శరీరంలో హార్మోన్లు సమతుల్యంగా మారతాయి. ఫలితంగా పీరియడ్స్ సైకిల్ క్రమం తప్పడం (Irregular Periods) వంటి సమస్యలు నయమవుతాయి.
- మానసిక ఒత్తిడి దూరం (Stress Management): ఇందులోని యాంటీఆక్సిడెంట్ గుణాలు పీరియడ్స్ సమయంలో వచ్చే మూడ్ స్వింగ్స్, మానసిక ఒత్తిడిని తగ్గించి, మెదడును ప్రశాంతంగా ఉంచుతాయి.
- ఇన్సులిన్ సెన్సిటివిటీలో మెరుగుదల: ఈ మూడు మూలికల సమ్మేళనం శరీరంలో ఆక్సీకరణ ఒత్తిడిని (Oxidative Stress) తగ్గించడమే కాకుండా, ఇన్సులిన్ సెన్సిటివిటీని మెరుగుపరిచి శరీరాన్ని రిలాక్స్ చేస్తుంది.
ఈ హెర్బల్ టీని ఎలా తయారు చేయాలి?
ఈ ఆయుర్వేద చాయ్ తయారు చేసుకోవడం చాలా సులభం.
- ఒక పాత్రలో 1 కప్పు నీరు తీసుకోండి.
- అందులో 4-5 పుదీనా ఆకులు, 4-5 తులసి ఆకులు ఇంకా ఒక చిన్న దాల్చినచెక్క ముక్క వేయండి.
- ఈ మిశ్రమాన్ని చిన్న మంటపై 3 నుంచి 4 నిమిషాల పాటు బాగా మరిగించండి.
- ఆ తర్వాత ఆ నీటిని వడకట్టుకుని (ఫిల్టర్ చేసి) గోరువెచ్చగా ఉన్నప్పుడు సేవించండి.
గమనిక
తులసి, పుదీనా ఇంకా దాల్చిన చెక్కలతో కూడిన ఈ హెర్బల్ టీ మహిళల ఆరోగ్యానికి ఎంతో మేలు చేస్తుంది. అయితే, ఇందులో ఉపయోగించిన ఏ పదార్థం వల్లనైనా మీకు గతంలో అలర్జీ ఉన్నట్లయితే, దీనిని తీసుకోకపోవడమే మంచిది. సమస్యలు తీవ్రంగా ఉన్నప్పుడు సొంత వైద్యం కంటే నిపుణులైన వైద్యులను సంప్రదించి, ఆరోగ్యకరమైన జీవనశైలిని అలవర్చుకోవాలని డాక్టర్ చంచల్ శర్మ సూచిస్తున్నారు.