AP Local Body Elections: ఆంధ్రప్రదేశ్‌లో పట్టణ స్థానిక సంస్థల ఎన్నికల షెడ్యూల్‌లో రాష్ట్ర ఎన్నికల సంఘం (SEC) కీలక మార్పులు చేసింది. గతంలో ప్రకటించిన షెడ్యూల్ ప్రకారం అక్టోబర్ 28న జరగాల్సిన పోలింగ్‌ను నవంబర్ 1వ తేదీకి వాయిదా వేసింది. రాష్ట్రవ్యాప్తంగా ఉన్న 99 మున్సిపాలిటీలు, నగర పంచాయతీలు, కార్పొరేషన్లకు ఎన్నికలను రీషెడ్యూల్ చేస్తూ ఈసీ అధికారిక ఉత్తర్వులు జారీ చేసింది. సవరించిన షెడ్యూల్ ప్రకారం నవంబర్ 1న పోలింగ్ ప్రక్రియ నిర్వహించి, నవంబర్ 3న ఓట్ల లెక్కింపు చేపట్టి ఫలితాలు విడుదల చేయనున్నారు.
సుప్రీంకోర్టు ఆదేశాల నేపథ్యంలో అభ్యర్థుల తుది జాబితా ప్రకటనను నాలుగు రోజుల పాటు వాయిదా వేసినట్లు ఎలక్షన్ కమిషన్ స్పష్టం చేసింది. తాజా నిర్ణయం ప్రకారం ఈ నెల 25వ తేదీన బరిలో నిలిచే అభ్యర్థుల ఫైనల్ లిస్ట్‌ను ప్రకటించనున్నారు. మరోవైపు వైఎస్సార్ జిల్లా మైదుకూరు మున్సిపాలిటీ ఎన్నికల తేదీపై ఈసీ ప్రస్తుతానికి ఎలాంటి ప్రకటన చేయలేదు. అక్కడ నామినేషన్ల ప్రక్రియను నిబంధనల ప్రకారం మళ్లీ నిర్వహించిన తర్వాతే ప్రత్యేకంగా పోలింగ్ తేదీని ఖరారు చేస్తామని అధికారులు స్పష్టం చేశారు.
సవరించిన ఎన్నికల షెడ్యూల్ ముఖ్యాంశాలు..
-
అభ్యర్థుల తుది జాబితా ప్రకటన: అక్టోబర్ 25
-
పోలింగ్ తేదీ: నవంబర్ 1 (గతంలో అక్టోబర్ 28)
-
ఓట్ల లెక్కింపు & ఫలితాలు: నవంబర్ 3
-
ఎన్నికలు జరిగే స్థానాలు: 99 పట్టణ, నగర స్థానిక సంస్థలు
-
మైదుకూరు ప్రక్రియ: తిరిగి నామినేషన్లు స్వీకరించిన తర్వాతే కొత్త తేదీల ప్రకటన