Kiran Kumar: సోషల్ మీడియాలో తనదైన డైలాగులు, విలక్షణమైన మాటతీరుతో నెటిజన్లను ఎంతగానో అలరించిన ‘అగ్గిపెట్టె మచ్చ’ అలియాస్ కిరణ్ కుమార్ కన్నుమూశారు. గత కొద్ది రోజులుగా తీవ్ర అనారోగ్యంతో బాధపడుతున్న ఆయన, తిరుపతిలోని స్విమ్స్ (SVIMS) ఆసుపత్రిలో చికిత్స పొందుతూ తుదిశ్వాస విడిచారు. ఈ విషయాన్ని ఆయన కుటుంబ సభ్యులు అధికారికంగా ధ్రువీకరించారు.
అసలేం జరిగింది?
కొంతకాలంగా కిరణ్ అనారోగ్య సమస్యలతో ఇబ్బంది పడుతున్నారు. పరిస్థితి విషమించడంతో కుటుంబ సభ్యులు ఆయనను అక్టోబర్ 5న తిరుపతిలోని స్విమ్స్ ఆసుపత్రికి తరలించారు. అప్పటికే ఆరోగ్యం బాగా క్షీణించడంతో వైద్యులు ఆయనను అత్యవసర విభాగంలో ఉంచి, వెంటిలేటర్ సపోర్టుతో మెరుగైన చికిత్స అందించేందుకు ప్రయత్నించారు. అయితే పరిస్థితి మరింత విషమించడంతో చికిత్స పొందుతూనే బుధవారం ఆయన తుదిశ్వాస విడిచారు. అనంతరం ఆయన భౌతికకాయాన్ని తిరుపతి రూరల్ పరిధిలోని వైఎస్సార్ కాలనీలో ఉన్న స్వగృహానికి తరలించారు.
‘అగ్గిపెట్టె మచ్చ’గా సోషల్ మీడియాలో గుర్తింపు ఎలా వచ్చింది?
తిరుపతి స్థానికుడైన కిరణ్ కుమార్, సోషల్ మీడియా తెరపైకి వచ్చాక ‘అగ్గిపెట్టె మచ్చ’ అనే పేరుతోనే అందరికీ పరిచయమయ్యారు. తిరుపతి యాస, సహజసిద్ధమైన ఎక్స్‌ప్రెషన్స్, ఆయన పలికే కొన్ని ఊతపదాలు యూట్యూబ్, ఇన్‌స్టాగ్రామ్‌లలో విపరీతంగా ట్రెండ్ అయ్యాయి.
దింతో మీమ్ క్రియేటర్లు ఆయన వీడియో బైట్లను, ఫన్నీ రియాక్షన్లను రెగ్యులర్‌గా వాడుకోవడంతో ఆయన ఫేస్ నెటిజన్లందరికీ సుపరిచితమైంది. ఆ క్రేజ్ చూసి పలు యూట్యూబ్ ఛానెళ్లు ఆయనను వరుసగా ఇంటర్వ్యూలు చేశాయి. వాటికి లక్షల్లో వ్యూస్ వచ్చేవి. గతంలో కొన్ని వివాదాలు, విచిత్ర సంఘటనల వల్ల కూడా ఆయన పేరు సోషల్ మీడియాలో, వార్తల్లో చర్చనీయాంశంగా నిలిచింది.
నెటిజన్లు, అభిమానుల దిగ్భ్రాంతి
గత కొంతకాలంగా కిరణ్ పెద్దగా వీడియోలు చేయకపోవడంతో పాటు సోషల్ మీడియాలో ఎక్కువగా కనిపించలేదు. ఈ లోపే అకస్మాత్తుగా ఆయన తీవ్ర అనారోగ్యంతో ఆసుపత్రిలో చేరి చనిపోయారన్న వార్త తెలియడంతో ఫాలోవర్లు, యూట్యూబ్ కమ్యూనిటీ తీవ్ర షాక్‌కు గురయ్యారు.
ఆయన మాటలతో ఎంతో నవ్వించారని, ఇంత చిన్న వయసులోనే ఇలా జరగడం బాధాకరమని కామెంట్లు పెడుతున్నారు. సోషల్ మీడియా వేదికగా కిరణ్ పాత వీడియోలను, మీమ్స్‌ను షేర్ చేస్తూ ఆయనకు నివాళులు అర్పిస్తున్నారు. కిరణ్ కుమార్ ఆత్మకు శాంతి చేకూరాలని, ఆయన కుటుంబానికి భగవంతుడు ధైర్యాన్ని ప్రసాదించాలని నెటిజన్లు ప్రగాఢ సానుభూతి తెలియజేస్తున్నారు.