Boduppal: తెలంగాణలో అవినీతి అధికారులపై అవినీతి నిరోధక శాఖ (ACB) కొరడా ఝుళిపించింది. జయశంకర్ భూపాలపల్లి జిల్లా భూగర్భ గనుల శాఖ సహాయ సంచాలకులు (మైనింగ్ ఏడీ) జయరాజు ఇళ్లు, కార్యాలయాలపై ఏసీబీ అధికారులు గురువారం ఏకకాలంలో మెరుపు దాడులు నిర్వహించారు. ఆదాయానికి మించి అక్రమ ఆస్తులు కూడబెట్టారన్న పక్కా సమాచారంతో ఈ సోదాలు చేపట్టారు. హైదరాబాద్ ఏసీబీ జాయింట్ డైరెక్టర్ సాయి మనోహర్, వరంగల్ ఏసీబీ డీఎస్పీ సాంబయ్య పర్యవేక్షణలో ప్రత్యేక బృందాలు హైదరాబాద్, సూర్యాపేట, తాండూరు సహా దాదాపు 12 ప్రాంతాల్లో విస్తృతంగా తనిఖీలు చేపట్టాయి.
బోడుప్పల్ నివాసంలో సోదాలు – స్వాధీనం చేసుకున్న ఆస్తుల వివరాలు..
-
స్థిరాస్తులు: బోడుప్పల్లో జీ+2 అంతస్తుల విలాసవంతమైన భవనం, జనగాం జిల్లా పరిధిలో 5 ఎకరాల వ్యవసాయ భూమికి సంబంధించిన రిజిస్ట్రేషన్ పత్రాలు.
-
నగదు & వాహనాలు: ఇంట్లో లభ్యమైన రూ.1.50 లక్షల నగదుతో పాటు రెండు కార్లు, రెండు ద్విచక్ర వాహనాలు.
-
డిపాజిట్లు & బ్యాంక్ ఖాతాలు: వివిధ బ్యాంకుల్లోని ఫిక్స్డ్ డిపాజిట్లు (FDs), పోస్టల్ డిపాజిట్ పత్రాలు మరియు బ్యాంక్ లాకర్ల వివరాలు.
ఇంకా కొనసాగుతున్న తనిఖీలు..
జయరాజు బంధువులు, సన్నిహితుల ఇళ్లలో కూడా ఏసీబీ బృందాలు సోదాలు కొనసాగిస్తున్నాయి. బ్యాంక్ లాకర్లను తెరిచిన అనంతరం మొత్తం అక్రమాస్తుల మార్కెట్ విలువ, స్వాధీనం చేసుకున్న కీలక పత్రాల వివరాలను ఏసీబీ అధికారులు అధికారికంగా మీడియాకు వెల్లడించనున్నారు.