Pawan Kalyan: ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్.. ‘సేనతో సేనాని’ సమావేశాలకు విశాఖపట్నంలో శ్రీకారం చుట్టారు. మూడు రోజుల పాటు జరగనున్న ఈ సమావేశాల్లో పార్టీ భవిష్యత్తు కార్యాచరణ, కూటమి ప్రభుత్వం అమలు చేస్తున్న కార్యక్రమాలు, క్షేత్రస్థాయి సమస్యలపై చర్చించనున్నారు. పార్టీ శ్రేణులు ఈ సమావేశాలపై ఉత్సాహంగా ఉన్నారు.
సమావేశాల ముఖ్య ఉద్దేశ్యం:
కూటమి ప్రభుత్వంలో ఒక ముఖ్య భాగస్వామిగా ఉన్న జనసేన పార్టీ, ఈ సమావేశాల ద్వారా క్షేత్రస్థాయిలో తమ స్థితిని తెలుసుకోవడంతో పాటు, కార్యకర్తల అభిప్రాయాలను నేరుగా సేకరించాలని లక్ష్యంగా పెట్టుకుంది. పార్టీ ఆవిర్భావం నుంచి నిస్వార్థంగా పనిచేసిన కార్యకర్తలను నేరుగా కలుసుకుని, వారి సూచనలు, సలహాలు స్వీకరించాలని పవన్ కల్యాణ్ నిర్ణయించారు. దీనిద్వారా పార్టీకి కొత్త దిశానిర్దేశం చేసి, భవిష్యత్తు కార్యాచరణను రూపొందించుకోవాలని పార్టీ భావిస్తోంది.
సమావేశాల ప్రణాళిక
మొదటి రోజు (గురువారం): పార్టీ ఎంపీలు, ఎమ్మెల్యేలు, రాష్ట్ర కార్యవర్గ సభ్యులతో పవన్ కల్యాణ్ సమావేశమయ్యారు. తాజా రాజకీయ పరిణామాలు, ప్రభుత్వ విధానాలపై ఈ సమావేశంలో చర్చ జరిగింది.
రెండవ రోజు (29న): ప్రతి అసెంబ్లీ నియోజకవర్గం నుంచి పార్టీ కోసం మొదటి నుంచి పనిచేసిన 10 మంది ప్రతినిధులను ఎంపిక చేసి, వారితో పవన్ కల్యాణ్ ముఖాముఖిగా మాట్లాడనున్నారు. ఆ రోజు రాత్రి ఉత్తరాంధ్ర సంస్కృతిని ప్రతిబింబించేలా సాంస్కృతిక కార్యక్రమాలు కూడా నిర్వహించనున్నారు.
మూడవ రోజు (30న): ఇందిరా గాంధీ ప్రియదర్శిని స్టేడియంలో ‘సేనతో సేనాని’ పేరుతో భారీ బహిరంగ సభ జరగనుంది. ఈ సభకు ఆంధ్రప్రదేశ్, తెలంగాణ నుండి దాదాపు 15,000 మంది ప్రత్యేక ఆహ్వానితులు హాజరుకానున్నారు. భారీ వర్షాలను దృష్టిలో ఉంచుకుని జర్మన్ హ్యాంగర్స్ ఏర్పాటు చేశారు. ఈ సభా ప్రాంగణానికి విప్లవ వీరుడు అల్లూరి సీతారామరాజు పేరు పెట్టారు.
Also Read: olympics 2036: ఒలిపింక్స్ పోటీలపై సీఎం రేవంత్రెడ్డి సమీక్ష
కీలక అంశాలపై చర్చ :
ప్రస్తుత ప్రభుత్వంలో భాగస్వామిగా ఉన్న జనసేన పార్టీ, క్షేత్రస్థాయిలో ప్రజలు ఎదుర్కొంటున్న సమస్యలపై ప్రధానంగా దృష్టి సారించనుంది. ముఖ్యంగా విశాఖ స్టీల్ ప్లాంట్ వంటి కీలక అంశాలపై జనసేన వైఖరిని ఈ సభ ద్వారా పవన్ కల్యాణ్ వెల్లడిస్తారని పార్టీ వర్గాలు తెలిపాయి. భవిష్యత్తులో పార్టీ కార్యకర్తలు ఎలా ముందుకు వెళ్ళాలనే దానిపై పవన్ కల్యాణ్ ఒక రోడ్ మ్యాప్ను ప్రకటిస్తారని మంత్రి నాదెండ్ల మనోహర్ వెల్లడించారు. ఈ సమావేశాలు పార్టీలో కొత్త ఉత్సాహాన్ని నింపుతాయని జనసేన నాయకులు భావిస్తున్నారు.