Uttam Kumar Reddy: తెలంగాణ రాష్ట్ర ప్రభుత్వం గోదావరి-బనకచర్ల ప్రాజెక్టు విషయంలో కఠిన వైఖరి అవలంబించింది. ఆంధ్రప్రదేశ్ ప్రభుత్వం ప్రతిపాదించిన ఈ ప్రాజెక్టు తెలంగాణ నీటి హక్కులకు ముప్పుగా మారుతుందని రాష్ట్ర నీటిపారుదల శాఖ మంత్రి ఉత్తమ్ కుమార్ రెడ్డి తేల్చిచెప్పారు.
“తెలంగాణ నీటి హక్కులకు తూట్లు పోస్తున్న ప్రాజెక్టు”
రామగుండం ఎత్తిపోతల పథక ప్రారంభోత్సవ కార్యక్రమంలో మంత్రి ఉత్తమ్ మాట్లాడుతూ —
“గోదావరి జలాలను రాయలసీమకు తరలించేందుకు ఉద్దేశించిన బనకచర్ల ప్రాజెక్టు పూర్తిగా విభజన చట్టానికి వ్యతిరేకంగా ఉంది. ఇది నిర్మితమైతే తెలంగాణ ప్రయోజనాలకు దారుణంగా నష్టం జరుగుతుంది,” అని పేర్కొన్నారు.
కేంద్రంతో చర్చలు, అవసరమైతే కోర్టుకూ
ఈ అంశంపై ఇప్పటికే కేంద్ర జలశక్తి శాఖ మంత్రి సి.ఆర్. పాటీల్తో చర్చించినట్లు మంత్రి తెలిపారు. “అవసరమైతే సుప్రీంకోర్టును కూడా ఆశ్రయించేందుకు సిద్ధంగా ఉన్నాం. తెలంగాణ ప్రభుత్వం న్యాయపరమైన అన్ని మార్గాలనూ అనుసరిస్తుంది,” అని తెలిపారు.
తెలంగాణ హక్కుల పరిరక్షణకు కట్టుబడి ఉన్నాం
“తెలంగాణ జలహక్కుల పరిరక్షణ మా బాధ్యత. ఇచ్చంపల్లి సహా కొత్త ప్రాజెక్టుల ద్వారా గోదావరి బేసిన్లోని ఆయకట్టకు సాగునీరు అందించేందుకు చర్యలు తీసుకుంటాం,” అని మంత్రి ఉత్తమ్ హామీ ఇచ్చారు.
జనవిజ్ఞాన సమావేశం – జూలై 30న ప్రజాభవన్లో ప్రెజెంటేషన్
బనకచర్ల ప్రాజెక్టు వల్ల తెలంగాణకు కలిగే నష్టాలపై ప్రజలకు అవగాహన కల్పించేందుకు జూలై 30న ప్రజాభవన్లో పూర్తి వివరాలతో ప్రజెంటేషన్ ఇవ్వనున్నట్లు మంత్రి ప్రకటించారు. “ఆంధ్రప్రదేశ్ ప్రభుత్వం ఈ ప్రాజెక్టును ముందుకు తీసుకెళ్లే ప్రయత్నం చేస్తే, తప్పకుండా అడ్డుకుంటాం,” అని మంత్రి హెచ్చరించారు.