Sharmila: తిరుపతి జిల్లాలో కాంగ్రెస్ పార్టీ నిర్వహించిన విస్తృత స్థాయి సమావేశంలో రాష్ట్ర కాంగ్రెస్ అధ్యక్షురాలు వైఎస్ షర్మిల కూటమి ప్రభుత్వంపై తీవ్రమైన విమర్శలు గుప్పించారు. హామీల అమలులో ప్రభుత్వం పూర్తిగా వైఫల్యాన్ని చవిచూస్తోందని ఆమె ఆరోపించారు.
సమావేశం అనంతరం సోషల్ మీడియా వేదికగా ఆమె తన అభిప్రాయాలను పంచుకుంటూ, “రాష్ట్రంలో కూటమి ప్రభుత్వం ఇచ్చిన హామీలను నిలబెట్టుకోలేకపోయింది. ప్రజల సమస్యలపై ప్రశ్నించే ధైర్యం కాంగ్రెస్ పార్టీకి మాత్రమే ఉంది,” అని పేర్కొన్నారు. అలాగే, కేంద్రంలోని బీజేపీకి గట్టి ప్రతిస్పందన ఇచ్చే సామర్థ్యం కూడా కాంగ్రెస్‌దేనని ఆమె స్పష్టం చేశారు.
షర్మిల మాట్లాడుతూ, విభజన హామీలు, రాజధాని నిర్మాణం, ప్రత్యేక హోదా, పోలవరం ప్రాజెక్టు వంటి కీలక అంశాల పరిష్కారం కాంగ్రెస్ పార్టీ అధికారంలోకి వచ్చినపుడే సాధ్యమవుతుందని పేర్కొన్నారు.
ఈ సందర్భంగా పార్టీ శ్రేణులకు పిలుపునిచ్చిన ఆమె – “పార్టీలో ఉండే చిన్నచిన్న విభేదాలను పక్కన పెట్టి, ప్రజా సమస్యలపై ఏకతాటిపై నిలబడాలి. రాష్ట్ర ప్రయోజనాలే మా లక్ష్యం,” అని వివరించారు.