Mahesh Babu: హైదరాబాద్ రియల్ ఎస్టేట్ కంపెనీలు సాయి సూర్య డెవలపర్స్ మరియు సురానా గ్రూప్ లతో సంబంధాలపై దర్యాప్తు చేస్తున్న ఎన్ఫోర్స్మెంట్ డైరెక్టరేట్ (ఈడీ), టాలీవుడ్ సూపర్ స్టార్ మహేష్ బాబుకు మరోసారి నోటీసులు జారీ చేసింది. ఈరోజు (మే 12) ఆయన విచారణకు హాజరుకావాల్సిందిగా స్పష్టంగా పేర్కొంది.
మునుపు ఏప్రిల్ 28న మొదటి నోటీసులు ఇచ్చినప్పటికీ, రాజమౌళి దర్శకత్వంలో తెరకెక్కుతున్న సినిమా షూటింగ్లో బిజీగా ఉన్న మహేష్ బాబు, విచారణకు హాజరుకాలేకపోయారు. షూటింగ్ షెడ్యూల్ కారణంగా మరొక తేదీ ఇవ్వాలని ఆయన కోరడంతో, ఈడీ మే 12న విచారణకు రావాలని మరో అవకాశం ఇచ్చింది.
బ్రాండ్ ప్రమోషన్ చుట్టూ తిరుగుతున్న వివాదం
సాయి సూర్య డెవలపర్స్ కంపెనీకి బ్రాండ్ అంబాసిడర్గా వ్యవహరించిన మహేష్ బాబు, రూ.5.9 కోట్లు రెమ్యునరేషన్గా తీసుకున్నారని ఈడీ పేర్కొంది. ఇందులో రూ.3.4 కోట్లు నగదు రూపంలో, మిగిలిన రూ.2.5 కోట్లు ఆర్టీజీఎస్ ద్వారా చెల్లించబడినట్టు సమాచారం.
ఈ డబ్బు చెల్లింపుల వెనుక ఉన్న లావాదేవీలపై అనుమానంతో, ఈడీ విచారణ జరుపుతోంది. ఇదంతా మనీ లాండరింగ్ కేసులో భాగంగా తీసుకుంటోంది.
సాయి సూర్య, సురానా గ్రూప్లపై ఆరోపణలు తీవ్రమవుతున్నాయి
ఈడీ ఇటీవల సికింద్రాబాద్, బోయిన్పల్లి ప్రాంతాల్లో సురానా గ్రూప్ కార్యాలయాలు, ఇంటిపై దాడులు నిర్వహించింది. సురానా ఇండస్ట్రీస్ ఎండీ నరేంద్ర సురానా నివాసంలో భారీగా నగదు పట్టుబడింది. అలాగే, సాయి సూర్య డెవలపర్స్ ఎండీ సతీశ్ చంద్రగుప్త వద్ద కూడా పెద్ద మొత్తంలో నగదు, డాక్యుమెంట్లు స్వాధీనం చేసుకున్నారు.
ఇది కూడా చదవండి: Actor Vishal: స్టేజ్ పైనే స్పృహ తప్పి పడిపోయిన హీరో విశాల్.. క్లారిటీ ఇచ్చిన మేనేజర్
ఇదిలా ఉండగా, ఇప్పటికే సతీశ్ను సైబరాబాద్ పోలీసులు మోసం కేసులో అరెస్ట్ చేసిన విషయం తెలిసిందే. వట్టి నాగులపల్లి వెంచర్ పేరుతో ప్రజల నుంచి డబ్బులు వసూలు చేసి మోసం చేశారని బాధితులు ఆరోపించారు.
సురానా గ్రూప్పై సీబీఐ కేసులు
సురానా గ్రూప్ మూడు బ్యాంకులకు రూ.3,986 కోట్ల వరకు రుణాలు ఎగ్గొట్టినట్లు ఆరోపణలపై సీబీఐ మూడు కేసులు నమోదు చేసింది. 2021లో జరిగిన ఈడీ దాడుల్లో రూ.11.62 కోట్ల విలువైన బంగారం, నగదు సీజ్ చేశారు. వీరి కంపెనీలు షెల్ కంపెనీలుగా పనిచేస్తూ, అక్రమ లావాదేవీలకు పాల్పడినట్లు ఆధారాలు లభించాయి.
మహేష్ బాబు హాజరు కానుందా?
ఈ నేపథ్యంలో టాలీవుడ్ అభిమానుల్లో, మీడియాలో మహేష్ బాబు ఈరోజు విచారణకు హాజరవుతారా అన్న అనుమానాలు, ఆసక్తి నెలకొన్నాయి. విచారణకు హాజరైతే, ఆయన నుంచి ఈడీ అధికారులకు కీలక సమాచారం లభించే అవకాశం ఉంది. లేకపోతే, తదుపరి చర్యలు ఏవవుతాయన్నది వేచి చూడాల్సిందే.