Fire Accident: హైదరాబాద్లోని రద్దీ ప్రాంతమైన టోలిచౌకీ (Tolichowki) లో ఆదివారం అర్ధరాత్రి భారీ అగ్నిప్రమాదం చోటుచేసుకుంది. స్థానికంగా ఎంతో రద్దీగా ఉండే ‘మండి కింగ్ రెస్టారెంట్’ (Mandi King Restaurant) లో ఒక్కసారిగా మంటలు చెలరేగి, చూస్తుండగానే ఆరో అంతస్తు వరకు వ్యాపించడంతో స్థానికులు, భోజనానికి వచ్చిన కస్టమర్లు తీవ్ర భయాందోళనకు గురయ్యారు. అయితే, హోటల్ సిబ్బంది సమయస్ఫూర్తితో వ్యవహరించడంతో పెను ప్రమాదం తప్పింది!
అసలేం జరిగింది? – అర్ధరాత్రి 12 గంటలకు కలకలం!
ఆదివారం వీకెండ్ కావడంతో అర్ధరాత్రి సమయంలో కూడా రెస్టారెంట్లో కస్టమర్ల రద్దీ ఎక్కువగానే ఉంది. రాత్రి 12 గంటల సమయంలో భవనంలోని 2వ అంతస్తులో ఉన్న హోటల్ కిచెన్ చిమ్నీలో అకస్మాత్తుగా మంటలు చెలరేగాయి. వెంటనే చిమ్నీ ద్వారా మొదలైన మంటలు వేగంగా భవనం పైభాగానికి ఎగసిపడి 4, 5, 6వ అంతస్తులకు పాకాయి. దట్టమైన పొగలు ఆ ప్రాంతమంతా కమ్ముకోవడంతో చుట్టుపక్కల నివాసితులు భయంతో రోడ్లపైకి పరుగులు తీశారు. మంటల తీవ్రత ఎక్కువగా ఉండటంతో దీని ప్రభావం పక్కనే ఉన్న ‘హోటల్ జునేరా రెస్టారెంట్’ (Hotel Junera Restaurant) పై కూడా పడి, కొంత మేర ఆస్తి నష్టం వాటిల్లింది.
సిబ్బంది అప్రమత్తతతో తప్పిన పెను విషాదం!
అగ్నిప్రమాదం జరిగిన సమయంలో రెస్టారెంట్లోని 4, 5వ అంతస్తులలో కస్టమర్లు భారీ సంఖ్యలో ఉన్నట్లు సమాచారం. అయితే, మంటలను గమనించిన వెంటనే హోటల్ సిబ్బంది ఏమాత్రం ఆలస్యం చేయకుండా రంగంలోకి దిగారు
కస్టమర్లందరినీ సురక్షితంగా ఎమర్జెన్సీ ఎగ్జిట్ (Emergency Exit) ద్వారా బయటకు తరలించారు. అంతేకాకుండా, కిచెన్లో ఉన్న గ్యాస్ సిలిండర్లను వెంటనే సురక్షిత ప్రాంతానికి తరలించడంతో పేలుళ్లు జరిగే పెను ప్రమాదం తప్పింది. అగ్నిమాపక సిబ్బంది, స్థానికుల సహాయంతో మంటలను అదుపులోకి తీసుకురావడంతో, ఈ ఘటనలో ఎలాంటి ప్రాణనష్టం సంభవించలేదు. దీనితో రెస్టారెంట్ యాజమాన్యంతో పాటు అధికారులు, స్థానికులు ఊపిరి పీల్చుకున్నారు. ప్రమాదానికి గల కచ్చితమైన కారణాలు, ఆస్తి నష్టం వివరాలపై అధికారులు ఆరా తీస్తున్నారు.
