Jagan: వైఎస్సార్ కాంగ్రెస్ పార్టీ అధినేత, మాజీ ముఖ్యమంత్రి వైఎస్ జగన్ మోహన్ రెడ్డి అక్రమాస్తుల కేసుల విచారణను వేగవంతం చేసి కొలిక్కి తెచ్చేందుకు ఎన్‌ఫోర్స్‌మెంట్ డైరెక్టరేట్ (ఈడీ) ముమ్మర కసరత్తు చేస్తోంది. జగన్‌తో పాటు ఇతర నిందితులపై ఉన్న దాల్మియా సిమెంట్స్, భారతీ సిమెంట్స్ కేసులకు సంబంధించి మరో రెండు కీలకమైన ఛార్జ్‌షీట్లను కోర్టులో దాఖలు చేసేందుకు అధికారులు రంగం సిద్ధం చేస్తున్నారు.
గతంలోనే ఈ కేసులకు సంబంధించి ఈడీ అధికారులు ఛార్జ్‌షీట్లను సమర్పించినప్పటికీ, కొన్ని సాంకేతిక లోపాలు, చట్టబద్ధమైన అనుమతుల కొరవడటంతో న్యాయస్థానం వాటిని తిప్పి పంపింది. ఈ నేపథ్యంలో గత లోపాలను సరిదిద్దుతూ, అవసరమైన ప్రభుత్వ అనుమతులు, ఇతర సాంకేతిక ప్రక్రియలను ఈడీ శరవేగంగా పూర్తి చేసింది. ఇందులో భాగంగానే, సంబంధిత కేసుల్లో ఆరోపణలు ఎదుర్కొంటున్న రిటైర్డ్ ఐఏఎస్ అధికారి కృపానందంపై ప్రాసిక్యూషన్‌కు ఇటీవల ఆంధ్రప్రదేశ్ ప్రభుత్వం అధికారికంగా అనుమతి మంజూరు చేసింది. ఈ పరిణామంతో ఈడీ ఛార్జ్‌షీట్ల దాఖలుకు మార్గం మరింత సుగమమైంది.
గడిచిన 15 ఏళ్లుగా కొనసాగుతున్న జగన్ ఆస్తుల కేసుల్లో ఈడీ ఇప్పటివరకు మొత్తం 9 ఛార్జ్‌షీట్లను నాంపల్లి ప్రత్యేక కోర్టులో దాఖలు చేసింది. తాజాగా సిద్ధం చేస్తున్న ఈ రెండు కొత్త ఛార్జ్‌షీట్లతో కలిపి మొత్తం సంఖ్య 11కి చేరనుంది. న్యాయస్థానంలో కేసుల విచారణ ఏమాత్రం జాప్యం జరగకుండా రోజువారీ ప్రాతిపదికన ముందుకు సాగేలా పక్కా సాక్ష్యాధారాలతో ఈడీ తన వాదనలను బలంగా వినిపించేందుకు సన్నాహాలు చేస్తోంది.