Janasena: తూర్పుగోదావరి జిల్లా పరిషత్, మండల పరిషత్ ఎన్నికల ఓట్ల లెక్కింపు వేళ తీవ్ర విషాదకర ఘటన చోటుచేసుకుంది. ఎన్నికల ఫలితాలు వెలువడక ముందే జనసేన పార్టీకి చెందిన మహిళా ఎంపీటీసీ అభ్యర్థిని ఆకస్మికంగా గుండెపోటు/తీవ్ర అస్వస్థతతో మృతి చెందారు. దేవరపల్లి మండలం ధుమంతునిగూడెం గ్రామానికి చెందిన గారపాటి దివ్య (26-28) రాజమండ్రిలోని ఓ ప్రైవేటు ఆసుపత్రిలో చికిత్స పొందుతూ కన్నుమూయడం స్థానికంగా అందరినీ కలచివేసింది.
ధుమంతునిగూడెం ఎంపీటీసీ స్థానం నుంచి జనసేన పార్టీ అభ్యర్థిగా బరిలోకి దిగిన గారపాటి దివ్య, ఆమె భర్త శ్రీనివాస్ పార్టీలో క్రియాశీలకంగా పనిచేస్తున్నారు. ప్రజాసేవ చేయాలనే సంకల్పంతో ఎన్నికల ప్రచారంలో ఆమె ఎంతో ఉత్సాహంగా పాల్గొన్నారు. గురువారం పోలింగ్ ముగిసిన అనంతరం ఆమె తీవ్ర అస్వస్థతకు గురయ్యారు. మొదట గ్యాస్ట్రిక్ సమస్య తలెత్తడంతో కుటుంబ సభ్యులు వెంటనే రాజమండ్రిలోని ఆసుపత్రికి తరలించారు. ప్రాథమిక చికిత్స అనంతరం రాత్రి ఇంటికి తీసుకువచ్చినప్పటికీ, శుక్రవారం ఉదయం ఆమెకు గుండెపోటు రావడంతో పరిస్థితి మళ్లీ విషమించింది. వెంటనే అదే ఆసుపత్రికి తరలించగా చికిత్స పొందుతూ ఆమె తుదిశ్వాస విడిచారు.
దివ్యకు నాలుగు నెలల చంటిబిడ్డతో పాటు మరో కుమారుడు కూడా ఉన్నాడు. అభంశుభం తెలియని ఇద్దరు చిన్న పిల్లలను ఒంటరి చేసి తల్లి తిరిగిరాని లోకాలకు వెళ్లిపోవడంతో ఆ కుటుంబంలో రోదనలు మిన్నంటాయి. గెలుపుపై కొండంత ఆశతో ఫలితాల కోసం ఎదురుచూస్తున్న సమయంలో, లెక్కింపునకు ముందే ఆమె ఇలా అర్ధాంతరంగా తనువు చాలించడం బంధువులను, గ్రామస్థులను, జనసేన శ్రేణులను తీవ్ర దిగ్భ్రాంతికి గురిచేసింది. ఆమె మృతిపట్ల పార్టీ నేతలు, స్థానిక నాయకులు ప్రగాఢ సానుభూతి తెలిపారు.