Mumbai: బాలీవుడ్ యాక్షన్ హీరో టైగర్ ష్రాఫ్ కారుపై గుర్తుతెలియని వ్యక్తులు కాల్పులు జరిపిన ఘటన మరువకముందే, సినిమా ఇండస్ట్రీ లో మరో సంచలన ఉదంతం వెలుగుచూసింది. ప్రముఖ సీనియర్ నటుడు జితేంద్ర కుమారుడు, నిర్మాత ఏక్తా కపూర్ సోదరుడైన బాలీవుడ్ నటుడు తుషార్ కపూర్‌కు గుర్తుతెలియని వ్యక్తి నుంచి బెదిరింపు ఫోన్ కాల్ వచ్చింది. ఏకంగా రూ. 5 కోట్ల రూపాయల మేర ఫిరౌతీ (ఎక్స్‌టార్షన్ మనీ) చెల్లించాలని, లేకపోతే తీవ్ర పరిణామాలుంటాయని దుండగుడు హెచ్చరించాడు. కుఖ్యాతి చెందిన లారెన్స్ బిష్ణోయ్ గ్యాంగ్‌కు చెందిన గ్యాంగ్‌స్టర్ ‘హ్యారీ బాక్సర్’ పేరుతో ఈ బెదిరింపులకు పాల్పడినట్లు సమాచారం.
వాయిస్ శాంపిల్స్ మిస్ మ్యాచ్.. ‘ప్రాంక్ కాల్’ కోణంలోనూ దర్యాప్తు!
ముంబై పోలీసు వర్గాల ప్రాథమిక సమాచారం ప్రకారం.. తుషార్ కపూర్‌కు వచ్చిన కాల్‌లోని వాయిస్ శాంపిల్‌ను, ముంబై పోలీసుల రికార్డుల్లో ఉన్న లారెన్స్ బిష్ణోయ్ అనుచరుడు హ్యారీ బాక్సర్ ఒరిజినల్ వాయిస్ శాంపిల్‌తో ఫోరెన్సిక్ పరంగా సరిపోల్చి చూశారు.
అయితే ప్రాథమిక విశ్లేషణలో ఆ రెండు గొంతులు సరిపోలకపోవడంతో ఇది బిష్ణోయ్ గ్యాంగ్ పేరు చెప్పి చేసిన ‘ప్రాంక్ కాల్’ లేదా ఏదైనా స్థానిక నేరగాడు బెదిరించేందుకు చేసిన యత్నమా అనే కోణంలో పోలీసులు ఆరా తీస్తున్నారు.
ఈ వ్యవహారంలో ఇప్పటివరకు అధికారికంగా ఎలాంటి ఎఫ్ఐఆర్ (FIR) నమోదు కాలేదు. పూర్తి స్థాయి విచారణ తర్వాత చట్టపరమైన చర్యలు చేపట్టనున్నారు.
జుహూ నివాసం వద్ద ప్రైవేట్ సెక్యూరిటీ పెంపు
ముంబైలోని ప్రముఖ జుహూ ప్రాంతంలో ఉన్న ‘కృష్ణ’ బంగ్లాలో తుషార్ కపూర్ తన కుటుంబంతో కలిసి నివసిస్తున్నారు. బెదిరింపు వార్తలు వచ్చినప్పటికీ తుషార్ కపూర్ బంగ్లా వద్ద ముంబై పోలీసులు అధికారికంగా బలగాలను మోహరించలేదు.
అయితే ముందస్తు భద్రతా చర్యల్లో భాగంగా కపూర్ కుటుంబం వ్యక్తిగత స్థాయిలో భారీగా బౌన్సర్లు, ప్రైవేట్ సెక్యూరిటీ గార్డులను రంగంలోకి దించింది. బంగ్లా ప్రధాన గేటు వద్ద, నివాసం లోపలి భాగాల్లో కట్టుదిట్టమైన భద్రతా వలయాన్ని ఏర్పాటు చేశారు.
బాలీవుడ్ సెలబ్రిటీల భద్రతపై ముంబై పోలీసుల హై-లెవల్ రివ్యూ
టైగర్ ష్రాఫ్ కారుపై కాల్పుల ఘటన, పలువురు నిర్మాత-దర్శకులకు ఇలాంటి బెదిరింపు సందేశాలు వస్తున్నాయన్న ప్రచారం నేపథ్యంలో ముంబై పోలీసు యంత్రాంగం అప్రమత్తమైంది. లారెన్స్ బిష్ణోయ్ గ్యాంగ్ లేదా ఇతర అండర్‌వరల్డ్ ముఠాల నుంచి ముప్పు ఉన్నట్లు భావిస్తున్న బాలీవుడ్ నటీనటులు, దర్శకుల భద్రతా ఏర్పాట్లపై త్వరలోనే పోలీస్ విభాగం ఉన్నత స్థాయి సమీక్షా సమావేశం నిర్వహించనుంది.
బెదిరింపులకు సంబంధించిన ఆడియో రికార్డింగులు, ఈమెయిళ్లు లేదా లేఖలు ఏవైనా ఉంటే నిర్భయంగా పోలీసులకు అందజేసి అధికారికంగా ఫిర్యాదు చేయాలని ఉన్నతాధికారులు సినీ వర్గాలకు సూచించారు. వచ్చిన సమాచారాన్ని క్షుణ్ణంగా పరిశీలించిన తర్వాత ఎవరికి ప్రభుత్వ భద్రత (గన్‌మెన్లు/పీఎస్‌ఓలు) కల్పించాలనే అంశంపై నిర్ణయం తీసుకోనున్నారు.