Revanth Reddy: మోదీని ఓడించేందుకు వానర సైన్యం కదిలింది.. ఢిల్లీ వేదికగా రేవంత్ రెడ్డి సంచలన వ్యాఖ్యలు..!

తెలంగాణ భవన్‌లో కాంగ్రెస్ ప్రతినిధులతో నిర్వహించిన సమావేశంలో రేవంత్ రెడ్డి భావోద్వేగంగా మాట్లాడారు. రావణాసురుడి లాంటి మోదీని గద్దె దించేందుకు మా కాంగ్రెస్ వానర సైన్యం ఢిల్లీకి తరలివచ్చింది. ఓట్ల దొంగతనానికి వ్యతిరేకంగా రాంలీలా మైదానం వేదికగా అసలైన పోరాటం మొదలవుతోంది” అని ప్రకటించారు. సమాజంలో కులాలు, మతాలు, ప్రాంతాల పేరిట విభజించు పాలించు విధానాన్ని ప్రధాని మోదీ అమలు చేస్తున్నారని ఆరోపించారు. డాక్టర్ బీఆర్ అంబేడ్కర్ దళితులు, గిరిజనులు, మహిళలు, యువతకు సమాన ఓటు హక్కు కల్పించారని, అలాంటి రాజ్యాంగ హక్కులను లాక్కోవాలని చూస్తున్న వారికి బుద్ధి చెప్పడం ఖాయమని స్పష్టం చేశారు.

ఎన్నికల సంఘం తీరుపై, బీజేపీ ఎత్తుగడలపై సీఎం రేవంత్ రెడ్డి తీవ్ర ఆరోపణలు చేశారు.

పథకం ప్రకారం ఓట్ల గల్లంతు: దేశంలో ఇప్పటివరకు ఏకంగా 13.5 కోట్ల మంది ఓట్లను చట్టవిరుద్ధంగా తొలగించారని, రాబోయే రోజుల్లో మరో 20 కోట్ల వరకు ఓట్లు తొలగించేందుకు పక్కా కుట్ర పన్నుతున్నారని ఆరోపించారు.

బీజేపీ ప్రయోగాలు: దేశవ్యాప్తంగా 15 నుంచి 20 శాతం ఓట్లను గల్లంతు చేసి అడ్డదారిలో మళ్లీ అధికారంలోకి రావాలని బీజేపీ భావిస్తోందని మండిపడ్డారు. ఇప్పటికే మహారాష్ట్ర, బిహార్, పశ్చిమ బెంగాల్‌లలో ప్రయోగాత్మకంగా ఓట్లను తొలగించి ప్రభుత్వాలను ఏర్పాటు చేసుకున్నారని విమర్శించారు.

ఈ మహా ర్యాలీకి ప్రజలు రాకుండా అడ్డుకునే ప్రయత్నాలు జరిగాయని రేవంత్ రెడ్డి ఆరోపించారు. తెలంగాణ నుంచి కాంగ్రెస్ శ్రేణులు, ప్రజలు ఢిల్లీకి తరలిరాకుండా కేంద్ర ప్రభుత్వం రైళ్లను సైతం నిలిపివేసి అడ్డంకులు సృష్టించిందని విమర్శించారు.

రైళ్లను ఆపినా మా పోరాట పటిమను ఆపలేకపోయారు. తెలంగాణ నుంచి వేలాదిగా తరలివచ్చిన జనసందోహం ముందు మోదీ, అమిత్ షా, జ్ఞానేష్ తలవంచక తప్పలేదు అని పేర్కొన్నారు. ప్రజాస్వామ్యాన్ని, రాజ్యాంగాన్ని పరిరక్షించుకునేందుకు విపక్షాలన్నీ ఏకతాటిపైకి వచ్చి సాగిస్తున్న ఈ పోరాటం అంతిమంగా విజయం సాధిస్తుందని ఆయన ధీమా వ్యక్తం చేశారు.