Ranabaali: టాలీవుడ్ స్టార్ జంట విజయ్ దేవరకొండ, రష్మిక మందన్న తమిళనాడు ముఖ్యమంత్రి జోసెఫ్ విజయ్ (దళపతి విజయ్)ని మర్యాదపూర్వకంగా కలిశారు. తమ తాజా భారీ పీరియడ్ యాక్షన్ డ్రామా ‘రణబాలి’ ప్రమోషన్స్‌లో భాగంగా చెన్నై వెళ్లిన ఈ దంపతులు.. సీఎం విజయ్‌ని కలిసి కాసేపు ఆప్యాయంగా ముచ్చటించారు. ఇద్దరు స్టార్ హీరోల కలయికకు సంబంధించిన ఫొటోలు బయటకు రావడంతో సోషల్ మీడియాలో విపరీతంగా ట్రెండ్ అవుతున్నాయి.
గతంలో ‘నోటా’ సినిమాలో విజయ్ దేవరకొండ యువ ముఖ్యమంత్రి పాత్రలో కనిపించిన విషయాన్ని గుర్తుచేసుకుంటూ.. “రియల్ సీఎం విజయ్‌ని కలిసిన రీల్ రౌడీ సీఎం విజయ్” అంటూ అభిమానులు కామెంట్లు పెడుతున్నారు.
ఒక్క సమావేశంతోనే నా ఫేవరెట్ పర్సన్ అయిపోయారు.. విజయ్ దేవరకొండ
ఈ ప్రత్యేక భేటీపై విజయ్ దేవరకొండ సోషల్ మీడియాలో ఎమోషనల్ నోట్ రాసుకొచ్చారు. రోజంతా ఎంతటి బిజీ షెడ్యూల్ ఉన్నప్పటికీ, సుదీర్ఘమైన పనిదినం తర్వాత కూడా సీఎం విజయ్ గారు మమ్మల్ని ఎంతో ప్రేమతో ఆహ్వానించారు. ఆయనతో గడిపిన సమయం ఎంతో అద్భుతంగా అనిపించింది.
స్ఫూర్తిదాయక ఆలోచనలు..
జీవితం, పని, సమాజం గురించి ఆయనకున్న వ్యక్తిగత అభిప్రాయాలను మాతో పంచుకున్నారు. ఒక్కసారి మాత్రమే కలిసినా.. ఆయన నాకు అత్యంత ఇష్టమైన వ్యక్తిగా మారిపోయారు. మళ్లీ కలుద్దాం సర్! అంటూ విజయ్ దేవరకొండ ఆనందం వ్యక్తం చేశారు.
ఆయన ప్రయాణం ఎంతో స్ఫూర్తిదాయకం.. రష్మిక మందన్న
దళపతి విజయ్ పట్ల తనకున్న అభిమానాన్ని రష్మిక సైతం పంచుకున్నారు..”చాలా కాలం తర్వాత దళపతి విజయ్ గారిని మళ్లీ కలిసే అవకాశం దక్కింది. ఆయన్ను మొదట్లో ఆరాధించడం, ఆ తర్వాత ఆయనతో కలిసి తెర పంచుకోవడం, ఇప్పుడు ఒక రాష్ట్రానికి ముఖ్యమంత్రిగా ఉన్న స్థాయిలో ఆయన్ను గౌరవించే స్థాయికి ఎదగడం వరకు.. ప్రతీదీ ఒక అద్భుతంలా అనిపిస్తోంది. ఆయన రాజకీయ, సినీ ప్రయాణం ఎంతో స్ఫూర్తిదాయకం అని రష్మిక పేర్కొన్నారు.
తమిళనాడు ముఖ్యమంత్రిగా విజయ్ బాధ్యతలు చేపట్టిన నాటి నుంచి సినీ రంగ ప్రముఖులు ఆయనను వరుసగా కలుస్తున్నారు. ఇప్పటికే దర్శకులు లోకేశ్ కనగరాజ్, ఎ.ఆర్. మురుగదాస్, కె. భాగ్యరాజ్ సహా నటులు ప్రశాంత్, అర్జున్ సర్జా, శివకార్తికేయన్, శాంతను భాగ్యరాజ్, నటీమణులు వరలక్ష్మి శరత్‌కుమార్, ఖుష్బూ సుందర్ తదితరులు సీఎం విజయ్‌ని కలిసి అభినందనలు తెలిపిన సంగతి తెలిసిందే.
విజయదశమి బరిలో ‘రణబాలి’ – టికెట్ ధరలు పెంచేది లేదు!
విజయ్ దేవరకొండ, రష్మిక జంటగా నటించిన ‘రణబాలి’ చిత్రంపై దేశవ్యాప్తంగా భారీ అంచనాలు నెలకొన్నాయి..
కథా నేపథ్యం & నిర్మాణం..
బ్రిటిష్ కాలం నాటి సామాన్యుల త్యాగాలు, చరిత్రలో మరుగునపడిన విప్లవ పోరాటాల ఇతివృత్తంగా దర్శకుడు రాహుల్ సంకృత్యన్ ఈ చిత్రాన్ని తెరకెక్కించారు. మైత్రీ మూవీ మేకర్స్ పతాకంపై నవీన్ యెర్నేని, వై. రవిశంకర్ ఈ పాన్-ఇండియా ప్రాజెక్ట్‌ను అత్యున్నత సాంకేతిక ప్రమాణాలతో నిర్మించారు.
ప్రత్యేక పాత్రలు & మేకోవర్..
ఈ సినిమా కోసం విజయ్ దేవరకొండ ప్రత్యేకంగా గుర్రపు స్వారీతో పాటు అచ్చమైన రాయలసీమ మాండలికంలో ట్రైనింగ్ తీసుకుని నటించారు. రష్మిక ఇందులో ‘జయమ్మ’ అనే శక్తివంతమైన పాత్రలో కనిపిస్తుండగా, ‘ది మమ్మీ’ ఫేమ్ హాలీవుడ్ యాక్టర్ ఆర్నాల్డ్ వోస్లూ (Arnold Vosloo) కీలక పాత్రలో నటించడం విశేషం.
సామాన్యుడికి అందుబాటులో సినిమా..
ప్రేక్షకులకు సినిమా భారం కాకూడదనే ఉద్దేశంతో ఎట్టి పరిస్థితుల్లోనూ సినిమా టికెట్ ధరలను పెంచడం లేదని చిత్ర బృందం స్పష్టం చేసింది. దసరా పండుగ కానుకగా ఈ చిత్రం అక్టోబర్ 16న ప్రపంచవ్యాప్తంగా విడుదల కానుంది.