Crime News: డాన్స్ పోటీల్లో పాల్గొనేందుకు విశాఖపట్నం వచ్చి, తిరుగు ప్రయాణంలో వివేక్ ఎక్స్‌ప్రెస్ రైలు ఎక్కి మిస్సైన అస్సాం యువతి హిమశ్రీ బోరో (20) శ్రీకాకుళం జిల్లాలో అనుమానాస్పద స్థితిలో శవమై తేలడం తీవ్ర కలకలం రేపింది. రైలు బోగీలో ఒంటరిగా ఉన్నానని, కొందరు అసభ్యంగా ప్రవర్తిస్తున్నారంటూ కుటుంబ సభ్యులతో భయపడుతూ మాట్లాడిన కొద్దిసేపటికే ఆమె విగతజీవిగా మారడం పలు అనుమానాలకు తావిస్తోంది.
విశాఖ నుంచి తిరుగు ప్రయాణం – అసలేం జరిగింది?:
అస్సాంలోని కామరూప్ జిల్లాకు చెందిన హిమశ్రీ బోరో.. గౌహతిలోని ప్రఖ్యాత ‘బి. బరూవా కాలేజ్’లో డిగ్రీ విద్యార్థిని. నృత్య పోటీల్లో పాల్గొనేందుకు ఆమె విశాఖపట్నం వచ్చారు. కార్యక్రమం ముగిసిన తర్వాత అక్టోబర్ 5వ తేదీ రాత్రి విశాఖపట్నం రైల్వే స్టేషన్‌లో డిబ్రూగఢ్ వెళ్లే వివేక్ ఎక్స్‌ప్రెస్ రైలు ఎక్కారు. ఆమె ఎస్-2 (S-2) కోచ్‌లో ప్రయాణించారు.
అక్టోబర్ 6 వరకు ఆమె కుటుంబ సభ్యులతో టచ్‌లోనే ఉన్నారు. రైలులో తీవ్ర రద్దీ ఉందని, ఆ బోగీలో తాను ఒక్కదాన్నే అమ్మాయిని కావడంతో తీవ్ర భయంగా ఉందని తెలిపారు. కొందరు యువకులు తనతో అసభ్యంగా ప్రవర్తిస్తున్నారని కూడా ఆమె కుటుంబ సభ్యులకు చెప్పినట్లు సమాచారం. ఆ తర్వాత ఆమె ఫోన్ స్విచ్ఛాఫ్ కావడంతో కుటుంబ సభ్యులు తీవ్ర ఆందోళనకు గురయ్యారు. గౌహతి జీఆర్‌పీ (GRP) పోలీసులతో పాటు రైల్వే హెల్ప్‌లైన్ 139 నంబర్‌కు ఫిర్యాదు చేశారు.
బోగీలో బ్యాగులు లభ్యం.. ట్రాక్ పక్కన మృతదేహం:
కుటుంబ సభ్యుల ఫిర్యాదుతో రైల్వే సిబ్బంది ఎస్-2 కోచ్‌లో గాలించగా.. ఆమెకు చెందిన రెండు బ్యాగులు, కాలేజీ గుర్తింపు కార్డులు బెర్త్ వద్దే లభించాయి. కానీ హిమశ్రీ మాత్రం కనిపించలేదు.
ఈ క్రమంలో శ్రీకాకుళం జిల్లా పొందూరు మండలం మలయాపురం/పెనుబర్తి సమీపంలోని రైల్వే ట్రాక్ పక్కన ఓ యువతి మృతదేహం పడి ఉన్నట్లు గుర్తించారు. ఘటనా స్థలానికి చేరుకున్న పోలీసులు అది అదృశ్యమైన హిమశ్రీ బోరో మృతదేహంగా నిర్ధారించారు.
అన్ని కోణాల్లో పోలీసుల దర్యాప్తు:
విషయం తెలుసుకున్న శ్రీకాకుళం జిల్లా ఎస్పీ మహేశ్వర్ రెడ్డి సంఘటనా స్థలాన్ని స్వయంగా పరిశీలించి దర్యాప్తును ముమ్మరం చేశారు.. విశాఖపట్నం రైల్వే స్టేషన్‌లో ఆమె రైలు ఎక్కడానికి కొద్దిసేపు ముందు ఒక యువకుడు ఆమె వద్దకు వచ్చి మాట్లాడిన దృశ్యాలు సీసీ కెమెరాల్లో రికార్డయ్యాయి. ఆ వ్యక్తి ఎవరు అనే కోణంలో పోలీసులు ఆరా తీస్తున్నారు. ప్రయాణ సమయంలో ఆమె కొందరితో కలిసి ఉన్న వీడియోలు, కాల్ డేటా రికార్డులను (CDR) సైబర్ నిపుణులు విశ్లేషిస్తున్నారు.
తోసేశారా? జారిపడిందా?..
ఆమె రద్దీ వల్ల ప్రమాదవశాత్తు నడుస్తున్న రైలు నుంచి జారిపడిందా? లేక వేధింపులకు గురిచేసి ఎవరైనా కిందకు తోసేశారా? అన్న కోణాల్లో రైల్వే పోలీసులు, శ్రీకాకుళం జిల్లా పోలీసులు సంయుక్తంగా దర్యాప్తు చేస్తున్నారు. పోస్ట్‌మార్టం నివేదిక, ఫోరెన్సిక్ ఆధారాలు లభ్యమైన తర్వాతే ఈ అనుమానాస్పద మృతి వెనుక అసలు నిజాలు బయటకు వస్తాయని అధికారులు వెల్లడించారు.