Tirumala: తిరుమల శ్రీవారి దర్శనార్థం కాలినడకన వెళ్తున్న భక్తులకు అలిపిరి మార్గంలో తీవ్ర భయాందోళనలు ఎదురయ్యాయి. గోవింద నామస్మరణలతో సాగుతున్న భక్తుల ప్రయాణంలో ఒక్కసారిగా చిరుతపులి కనిపించడంతో కలకలం రేగింది. నడకమార్గంలోని చెట్టుపై చిరుత తీరుబడిగా కూర్చుని ఉండటాన్ని గమనించిన భక్తులు ప్రాణభయంతో పరుగులు తీశారు. వెంటనే అప్రమత్తమైన టీటీడీ భద్రతా సిబ్బంది, అటవీశాఖ అధికారులు రంగంలోకి దిగి పరిస్థితిని అదుపులోకి తెచ్చారు.
2765వ మెట్టు వద్ద కనిపించిన చిరుత – భక్తుల పరుగులు..
సమాచారం అందిన వెంటనే టీటీడీ విజిలెన్స్, సెక్యూరిటీ సిబ్బంది ఘటనా స్థలానికి చేరుకున్నారు. భక్తుల ప్రాణరక్షణే ధ్యేయంగా తక్షణ చర్యలు చేపట్టారు.ఎవరినీ ఒంటరిగా నడవనివ్వకుండా భక్తులను గుంపులు గుంపులుగా సమీకరించి, వారికి సెక్యూరిటీ సిబ్బందిని తోడుగా ఉంచి జాగ్రత్తగా కొండపైకి పంపిస్తున్నారు. అటవీశాఖ అధికారులు అక్కడికి చేరుకుని చిరుత కదలికలను ట్రాక్ చేస్తున్నారు. దానిని దట్టమైన అడవిలోకి సురక్షితంగా తరిమికొట్టేందుకు పర్యవేక్షిస్తున్నారు. భక్తులు ఆందోళన చెందవద్దని, భద్రతా సిబ్బంది ఇచ్చే మార్గదర్శకాలను పాటిస్తూ ముందుకు సాగాలని అధికారులు సూచించారు.