Formula E-Car Race Case: తెలంగాణ రాజకీయాల్లో సంచలనం సృష్టించిన ఫార్ములా ఈ-రేస్ నిధుల దుర్వినియోగం కేసులో బీఆర్ఎస్ వర్కింగ్ ప్రెసిడెంట్, మాజీ మంత్రి కేటీఆర్ (KTR) శుక్రవారం ఉదయం హైదరాబాద్ నాంపల్లిలోని ఏసీబీ ప్రత్యేక కోర్టు ఎదుట విచారణకు హాజరయ్యారు. గతంలో వ్యక్తిగత కారణాలతో ఒక విచారణకు హాజరుకాలేకపోవడంతో, కోర్టు ఆదేశాల మేరకు నేడు ఆయన న్యాయస్థానం ఎదుట ప్రత్యక్షంగా హాజరయ్యారు.
కేటీఆర్తో పాటు ఈ కేసులో నిందితులుగా ఉన్న సీనియర్ ఐఏఎస్ అధికారి అర్వింద్ కుమార్ (A2), హెచ్ఎండీఏ మాజీ చీఫ్ ఇంజినీర్ బీఎల్ఎన్ రెడ్డి (A3), స్పోర్ట్స్ కన్సల్టెంట్ గోవేద కిరణ్ మల్లేశ్వరరావు (A4) కూడా న్యాయస్థానం ముందు హాజరయ్యారు.
కోర్టులో వాదోపవాదాలు..
ప్రభుత్వ పక్షం వాదనలు: ప్రభుత్వం తరఫున స్పెషల్ పబ్లిక్ ప్రాసిక్యూటర్ (స్పెషల్ పీపీ) శోభనాద్రి హాజరై వాదనలు వినిపిస్తున్నారు.
కేటీఆర్ తరఫు లాయర్లు: కేటీఆర్ తరఫున సీనియర్ న్యాయవాది ఉమామహేశ్వరరావు తన వాదనలను న్యాయమూర్తి ముందు ఉంచుతున్నారు. నిబంధనల ప్రకారమే రేసు నిర్వహణ ఒప్పందాలు జరిగాయని, రాజకీయ కక్షసాధింపుతోనే ఈ కేసు బనాయించారని డిఫెన్స్ వాదిస్తోంది.
అసలేం జరిగిందంటే..?:
హెచ్ఎండీఏ నుంచి రూ.55 కోట్ల బదిలీ: హైదరాబాద్లో ఫార్ములా ఈ-రేస్ నిర్వహణకు సంబంధించి హైదరాబాద్ మెట్రోపాలిటన్ డెవలప్మెంట్ అథారిటీ (HMDA) నిధుల నుంచి దాదాపు రూ.55 కోట్లను లండన్కు చెందిన ఈవెంట్ నిర్వహణ సంస్థ ఫార్ములా ఈ ఆపరేషన్స్ (FEO)కు బదిలీ చేశారని ఏసీబీ ఆరోపించింది.
నిబంధనల ఉల్లంఘన ఆరోపణలు:ఆర్థిక శాఖ, న్యాయ శాఖ, రాష్ట్ర కేబినెట్ మరియు రిజర్వ్ బ్యాంక్ ఆఫ్ ఇండియా (RBI) నుంచి ముందస్తు అనుమతులు తీసుకోకుండానే విదేశీ కరెన్సీ రూపంలో చెల్లింపులు జరిపారని ఏసీబీ తన ఛార్జ్షీట్లో పేర్కొంది.
కేటీఆర్ A1గా ఛార్జ్షీట్..
ఈ నిధుల బదిలీలో అక్రమాలు జరిగాయని తేలుస్తూ గతంలో ఏసీబీ కేసు నమోదు చేసి, కేటీఆర్ను ప్రధాన నిందితుడిగా (A1) పేర్కొంటూ కోర్టులో ఛార్జ్షీట్ దాఖలు చేసింది. న్యాయస్థానం ఆ ఛార్జ్షీట్ను పరిగణనలోకి తీసుకుని నిందితులకు సమన్లు జారీ చేయడంతో ఈ విచారణ ప్రక్రియ కొనసాగుతోంది.
నాంపల్లి కోర్టు ప్రాంగణంలో పోలీసులు భారీ భద్రతా ఏర్పాట్లు చేయగా, విచారణ పరిణామాలు రాష్ట్రవ్యాప్తంగా తీవ్ర ఉత్కంఠను రేపుతున్నాయి.