Health Tips: వేడివేడి అన్నంలో కాస్త నెయ్యి వేసుకుని, మొదటి ముద్ద తినడం మన ఇళ్లలో తరతరాలుగా వస్తున్న సాంప్రదాయం. కొందరు దీనివల్ల బరువు పెరుగుతారని, కొవ్వు చేరుతుందని భావిస్తుంటారు. అయితే, అన్నంలో నెయ్యి కలపడం వెనుక కేవలం రుచి మాత్రమే కాకుండా బలమైన సైన్స్ దాగి ఉందని ఆధునిక వైద్య పరిశోధనలు, ఆయుర్వేదం స్పష్టం చేస్తున్నాయి. సమతుల్య ఆహారంలో భాగంగా తగిన మోతాదులో నెయ్యి తీసుకోవడం వల్ల కలిగే ప్రధాన ప్రయోజనాలు ఇవే..
రక్తంలో షుగర్ లెవల్స్ అదుపు – గ్లూకోజ్ నిదానంగా విడుదల..
గ్లైసెమిక్ ఇండెక్స్ నియంత్రణ:
తెల్లటి అన్నంలో కార్బోహైడ్రేట్లు ఎక్కువగా ఉండటం వల్ల దాని గ్లైసెమిక్ ఇండెక్స్ ఎక్కువ. సాధారణంగా అన్నం తిన్న వెంటనే రక్తంలో గ్లూకోజ్ వేగంగా పెరిగే (షుగర్ స్పైక్) అవకాశం ఉంటుంది.
జీర్ణక్రియ వేగాన్ని తగ్గించే గుణం:
అన్నంలో ఒక చెంచా నెయ్యి కలపడం వల్ల అందులోని ఆరోగ్యకరమైన కొవ్వులు గ్యాస్ట్రిక్ ఎంప్టీయింగ్ (కడుపు ఖాళీ అయ్యే ప్రక్రియ) వేగాన్ని తగ్గిస్తాయి. దీనివల్ల గ్లూకోజ్ రక్తంలోకి ఒకేసారి కాకుండా నిదానంగా విడుదలవుతుంది.
పరిశోధనల్లో ఫలితం:
రీసెర్చ్గేట్ అధ్యయనం ప్రకారం.. టైప్-2 డయాబెటిస్ ఉన్న రోగులకు నెయ్యితో వండిన అన్నం అందించినప్పుడు వారి హెచ్బీఏ1సీ (HbA1c) స్థాయిలలో మెరుగుదల కనిపించింది తప్ప బ్లడ్ షుగర్ హఠాత్తుగా పెరగలేదు.
పేగుల ఆరోగ్యానికి ‘బ్యూటరిక్ యాసిడ్’..
నెయ్యిలో బ్యూటరిక్ యాసిడ్ (Butyric acid) వంటి షార్ట్-చైన్, మీడియం-చైన్ ఫ్యాటీ యాసిడ్స్ ఉంటాయి. ఇవి పెద్దపేగు కణాలకు ప్రాథమిక శక్తిని అందిస్తాయి.
జీర్ణవ్యవస్థ రక్షణ..
ఇది పేగుల వాపును నిరోధించి జీర్ణక్రియ సజావుగా సాగేలా చేస్తుంది. ప్రాచీన ఆయుర్వేదం కూడా నెయ్యిని జీర్ణక్రియను రగిలించే ‘జఠరాగ్ని’కి తోడ్పడే ఉత్తమ ఆహారంగా పేర్కొంది.
విటమిన్లను శరీరం పీల్చుకోవడంలో సహాయం..
కొవ్వులో కరిగే విటమిన్లు:
మనం తీసుకునే కూరగాయల్లోని విటమిన్ ఎ, విటమిన్ డి, విటమిన్ ఇ, విటమిన్ కె వంటి పోషకాలు కొవ్వులో మాత్రమే కరుగుతాయి (Fat-soluble).
పోషకాల శోషణ:
క్యారెట్, పాలకూర లాంటి కూరలతో అన్నం తింటున్నప్పుడు కాస్త నెయ్యి జోడించడం వల్ల ఆ పోషకాలను, బీటా-కెరోటిన్ను శరీరం వేగంగా గ్రహించగలుగుతుందని నేషనల్ లైబ్రరీ ఆఫ్ మెడిసిన్ సమీక్షలు స్పష్టం చేస్తున్నాయి.
చక్కటి సంతృప్తి (Satiety) – అతిగా తినే అలవాటుకు చెక్..
వెన్నను వేడి చేయడం వల్ల వచ్చే ప్రత్యేకమైన సువాసన, రుచి మెదడుకు సంపూర్ణ తృప్తినిస్తాయి.భోజనంలో కొద్దిగా నెయ్యి చేర్చడం వల్ల కడుపు ఎక్కువసేపు నిండిన భావన కలుగుతుంది. దీంతో భోజనం తర్వాత పదేపదే స్నాక్స్, జంక్ ఫుడ్ తినాలనే కోరిక తగ్గుతుంది.
ఎంత మోతాదులో తీసుకోవాలి?
ఆరోగ్యంగా ఉన్న ఎవరైనా రోజూ 1 నుంచి 2 చెంచాల (టీస్పూన్లు) స్వచ్ఛమైన నెయ్యిని నిరభ్యంతరంగా తీసుకోవచ్చు.
గుండె జబ్బులు, మధుమేహం ఉన్నవారు..
నెయ్యిలో కొవ్వు శాతం ఎక్కువగా ఉన్నందున అధిక మోతాదులో తీసుకోకూడదు. గుండె సమస్యలు లేదా తీవ్రమైన షుగర్ వ్యాధి ఉన్నవారు తమ వైద్యుడి సలహా మేరకు పరిమిత మోతాదులో మాత్రమే ఆహారంలో భాగం చేసుకోవాలి.