Vijayawada: హైదరాబాద్లో ఖైరతాబాద్ బడా గణేశుడిని చూసి ఆశ్చర్యపోవడం మనకు అలవాటే. కానీ మన బెజవాడ నగరం కూడా ఏమాత్రం తగ్గనంటోంది! ఇంద్రకీలాద్రి క్షేత్రమైన విజయవాడలో భక్తితో పాటు పర్యావరణ స్పృహను చాటేలా ఒక అద్భుతం రూపుదిద్దుకుంది. వినాయక చవితి పర్వదినమైన నేటి (సెప్టెంబర్ 14, సోమవారం) నుంచే ప్రారంభమయ్యే గణేశ్ నవరాత్రుల కోసం విద్యాధరపురంలో ఏకంగా 72 అడుగుల అత్యంత భారీ మట్టి వినాయకుడిని కొలువుదీర్చారు. రసాయనాలు, ప్లాస్టర్ ఆఫ్ పారిస్ (PoP) లేకుండా, పూర్తిగా సహజసిద్ధమైన మట్టితో ఇంత భారీ ప్రతిమను నిలబెట్టి పర్యావరణ హితానికి సరికొత్త నిదర్శనంగా నిలిచారు డూండీ గణేశ్ సేవా సమితి నిర్వాహకులు.
ఆదివారం రాత్రి ఘనంగా ఆగమన వేడుకలు – కోలాటం ఆడిన మంత్రి సవిత..
ఈ మహా గణపతి ఆగమన వేడుకలు ఆదివారం రాత్రి అంగరంగ వైభవంగా జరిగాయి..
రాష్ట్ర బీసీ, ఈడబ్ల్యూఎస్ సంక్షేమ, చేనేత-జౌళి శాఖ మంత్రి ఎస్. సవిత ఈ కార్యక్రమాన్ని అధికారికంగా ప్రారంభించారు. వేడుకల్లో భాగంగా మంత్రి సవిత స్వయంగా మహిళా ప్రతినిధులతో కలిసి కోలాటం ఆడి అందరినీ ఉత్సాహపరిచారు. స్థానిక కళాకారుల సంప్రదాయ నృత్యాలు, బాజాభజంత్రీల నడుమ స్వామివారికి ఘన స్వాగతం పలికారు. ఎమ్మెల్సీ బుద్దా వెంకటన్న, కార్పొరేషన్ చైర్మన్లు డూండీ రాకేశ్, పేరేపీ ఈశ్వరరావు, ప్రముఖ సినీ నిర్మాత అంబికా కృష్ణతో పాటు పలువురు కూటమి నేతలు, వేలాది మంది భక్తులు తరలివచ్చారు.
72 అడుగుల మట్టి గణపతే సాధ్యమైనప్పుడు.. ఇంట్లో ఎందుకు కాదు?..
ఈ భారీ ప్రాజెక్ట్ వెనుక ఉన్న అసలైన సంకల్పాన్ని డూండీ గణేశ్ సేవా సమితి ప్రతినిధి దీప్తి ఎంతో చక్కగా వివరించారు:
-
“మేము 72 అడుగుల భారీ విగ్రహాన్ని నూరు శాతం పర్యావరణహిత మట్టితో తయారు చేయగలిగాం. అంత పెద్ద విగ్రహమే సాధ్యమైనప్పుడు.. ప్రతి వీధిలో, ప్రతి అపార్ట్మెంట్లో, ప్రతి ఇంట్లో మట్టి గణపతినే ఎందుకు పూజించకూడదు? సమాజానికి ఆ ఆదర్శాన్ని కళ్లారా చూపించడమే మా లక్ష్యం” అని ఆమె అన్నారు.
-
మట్టి విగ్రహాలను నీటిలో నిమజ్జనం చేసినప్పుడు నదులు, చెరువులు కలుషితం కాకుండా స్వచ్ఛంగా ఉంటాయని, పండుగ సంబరం ప్రకృతికి ముప్పు కాకూడదని పిలుపునిచ్చారు.
ఖైరతాబాద్కు దీటుగా విజయవాడ – మంత్రి ప్రశంసలు..
నవ్యాంధ్ర ఏర్పడినప్పటి నుంచి గత ఆరేళ్లుగా డూండీ గణేశ్ సేవా సమితి ఈ ఉత్సవాలను నిరంతరాయంగా నిర్వహిస్తూ వస్తోందని మంత్రి సవిత కొనియాడారు. రాజధాని ప్రాంతంలో హైదరాబాద్ ఖైరతాబాద్ తరహా ప్రత్యేక గుర్తింపును తీసుకురావడం గొప్ప విషయమన్నారు. భక్తి శ్రద్ధలతో పాటు పర్యావరణాన్ని కాపాడాలనే బాధ్యతను గుర్తుచేస్తున్న నిర్వాహకులను ఆమె ప్రత్యేకంగా అభినందించారు.
నేటి నుంచి సెప్టెంబర్ 25న జరిగే అనంత చతుర్దశి నిమజ్జనం వరకు పది రోజుల పాటు ఈ 72 అడుగుల శ్రీ పంచముఖ వరసిద్ధి మహా గణపతి భక్తులకు నేత్రపర్వంగా దివ్య దర్శనం ఇవ్వనున్నారు. భక్తుల రద్దీని దృష్టిలో ఉంచుకుని క్యూలైన్లు, ప్రసాద వితరణ, పటిష్ట భద్రతా ఏర్పాట్లు పూర్తి చేశారు.