Revanth Reddy: అసెంబ్లీ కమిటీ హాల్లో ముఖ్యమంత్రి ఎనుముల రేవంత్ రెడ్డి అధ్యక్షతన జరిగిన కాంగ్రెస్ లెజిస్లేచర్ పార్టీ (CLP) సమావేశం రాజకీయంగా అత్యంత ప్రాధాన్యత సంతరించుకుంది. ప్రభుత్వం 1,000 రోజుల పాలనను పూర్తి చేసుకున్న సందర్భాన్ని పురస్కరించుకుని సంక్షేమ ఫలాలను ప్రజల్లోకి తీసుకెళ్లడం, అసెంబ్లీలో ప్రతిపక్ష బీఆర్ఎస్ వైఖరిని ఎండగట్టడంపై ఎమ్మెల్యేలు, మంత్రులకు సీఎం దిశానిర్దేశం చేశారు. ఈ సందర్భంగా 22A నిషేధిత భూములు, ధరణి పోర్టల్ అక్రమాలు, అసెంబ్లీ ఘటనలపై చేయించిన ఫ్లాష్ సర్వే వివరాలను రేవంత్ రెడ్డి సభ దృష్టికి తెచ్చారు.
ఉన్నది 3.06 లక్షల ఎకరాలే.. కోటి ఎకరాలని అబద్ధాలు..
-
22A పై అసత్య ప్రచారాలు:సెక్షన్ 22A నిషేధిత జాబితాలో కోటి ఎకరాల భూములు ఉన్నాయంటూ బీఆర్ఎస్ నేతలు ప్రజలను భయభ్రాంతులకు గురిచేస్తున్నారని సీఎం మండిపడ్డారు. రాష్ట్రంలో అసలు 22A పరిధిలో ఉన్నది కేవలం 3.06 లక్షల ఎకరాలు మాత్రమేనని తేల్చిచెప్పారు.
-
హరీశ్రావు చిట్టా రెడీగా ఉంది:గత ప్రభుత్వ హయాంలో ధరణి పోర్టల్ను అడ్డం పెట్టుకుని హరీశ్రావుతో పాటు బీఆర్ఎస్ కీలక నేతలు ఎక్కడెక్కడ ఎంతెంత భూములు రాయించుకున్నారో పూర్తి వివరాలు తమ దగ్గర సిద్ధంగా ఉన్నాయని, వాటన్నింటినీ ఆధారాలతో సహా త్వరలోనే బయటపెడతామని సీఎం హెచ్చరించారు.
ఫ్లాష్ సర్వేలో కాంగ్రెస్కు ఫుల్ పాజిటివ్.. పడిపోయిన బీఆర్ఎస్ గ్రాఫ్..
-
ప్రజాభిప్రాయం వెల్లడి:అసెంబ్లీ గేట్ నంబర్ 3 వద్ద గత మూడు రోజులుగా జరిగిన పరిణామాలు, స్పీకర్పై దూషణలు, మహిళా పోలీసుల ఎదుట ప్రవర్తనపై ఫ్లాష్ సర్వే చేయించామని సీఎం వెల్లడించారు. ఈ సర్వేలో కాంగ్రెస్ ప్రభుత్వం పట్ల ప్రజల్లో పూర్తి సానుకూలత వ్యక్తమైందని, బీఆర్ఎస్ గ్రాఫ్ భారీగా పడిపోయిందని స్పష్టం చేశారు.
-
కేటీఆర్పై సెటైర్:సంయమనం పాటించిన పోలీసు అధికారులను అభినందిస్తూ.. “పోలీసులను చూస్తే కేటీఆర్కు నేనే కనిపిస్తున్నట్లున్నాను.. అందుకే అంత ఆక్రోశంతో విధుల్లో ఉన్న అధికారులపై దాడికి దిగారు” అని సీఎం ఎద్దేవా చేశారు.
ఓటర్ల జాబితాలో కుట్ర – ‘SIR’ పై అలెర్ట్..
-
15 కోట్ల ఓట్లు గల్లంతు?:దేశంలో వయోజనుల జనాభా 103 కోట్లు ఉంటే, ఓటర్ల జాబితాలో మాత్రం 88 కోట్లే చూపిస్తున్నారని, దాదాపు 15 కోట్ల ఓట్లు మాయమయ్యాయని సీఎం ఆందోళన వ్యక్తం చేశారు.
-
ఎస్ఐఆర్ (SIR) పై దృష్టి పెట్టాలి:ఎస్ఐఆర్ నెపంతో పేదల ఓట్లను తొలగించే ప్రమాదం పొంచి ఉందని హెచ్చరించారు. తాను కొడంగల్లో రెండు రోజుల పాటు ఉండి దీనిపై ఎలా దృష్టి పెట్టానో, ప్రజాప్రతినిధులంతా తమ నియోజకవర్గాల్లో ఓటర్ల జాబితాలను క్షుణ్ణంగా పరిశీలించాలని ఆదేశించారు.
సభకు పూర్తి హాజరు తప్పనిసరి – రేవంత్ వార్నింగ్..
సభకు రాకుండా నిర్లక్ష్యం వహిస్తే భవిష్యత్తు ఉండదని సభ్యులను సీఎం హెచ్చరించారు. కాంగ్రెస్ పార్టీ ఇచ్చిన అవకాశాలతోనే సబితా ఇంద్రారెడ్డి, సునీతా లక్ష్మారెడ్డి వంటి నాయకులు రాష్ట్ర స్థాయికి ఎదిగారని గుర్తుచేశారు. తెలంగాణ చేపట్టిన కులగణన దేశానికే రోల్ మోడల్గా నిలిచిందని, కేంద్రంపై ఒత్తిడి తెచ్చి దేశవ్యాప్తంగా దీన్ని అమలయ్యేలా చూడాలని పిలుపునిచ్చారు. ఎమ్మెల్యేల ప్రతి ప్రవర్తన, వ్యక్తిగత పనితీరే వచ్చే ఎన్నికల్లో రెండోసారి గెలుపును నిర్దేశిస్తుందని సీఎం స్పష్టం చేశారు.