M K Stalin: రాజకీయాల్లో ఎప్పుడు ఏం జరుగుతుందో ఎవరూ ఊహించలేరు. నిన్నటిదాకా తిరుగులేని నాయకుడిగా చక్రం తిప్పిన డీఎంకే అధినేత ఎంకే స్టాలిన్కు గత ఎన్నికలు ఊహించని షాక్ ఇచ్చాయి. ఎప్పటినుంచో తన కంచుకోటగా భావించిన కొలత్తూరు నియోజకవర్గంలో ఆయన ఓడిపోతారని ఎవరూ అనుకోలేదు. దాదాపు 9 వేల ఓట్ల తేడాతో టీవీకే అభ్యర్థి వీఎస్ బాబు చేతిలో ఓటమి పాలయ్యాక, ఆ చేదు నిజాన్ని ఆయన తట్టుకోలేకపోయారు. అయితే, ఆ ఓటమి వెనుక ఏదో మతలబు ఉందని భావించిన స్టాలిన్… న్యాయపోరాటం మొదలుపెట్టి చివరకు హైకోర్టు మెట్లెక్కారు. కానీ, అక్కడ కూడా ఆయనకు నిరాశే మిగిలింది.
అసలేం జరిగింది?
నిబంధనల ప్రకారం, ఫలితాలు వెలువడిన వెంటనే ఈవీఎంలలో అక్రమాలు జరిగాయని అనుమానిస్తూ 14 ఈవీఎంల మైక్రోకంట్రోలర్లను తనిఖీ చేయాలని స్టాలిన్ ఫీజు చెల్లించి దరఖాస్తు చేసుకున్నారు. అయితే ఆ పరిశీలన ప్రక్రియ మొదలయ్యేసరికి జూలై ఆఖరు వరకు సమయం పట్టింది. ఆ తనిఖీల్లో రెండు ఈవీఎంలు అసలు పనిచేయలేదని, సీల్స్ సరిగ్గా లేవని, నిబంధనలు పాటించలేదని స్టాలిన్ ఆరోపించారు. అందుకే మొత్తం 286 యంత్రాలను తనిఖీ చేయాలని, వీవీప్యాట్ స్లిప్పులను నూటికి నూరు శాతం లెక్కించాలని కోరుతూ మద్రాస్ హైకోర్టులో రిట్ పిటిషన్ వేశారు. బాబు ఎన్నిక చెల్లదని, తననే విజేతగా ప్రకటించాలని కోరారు.
కోర్టులో వాదోపవాదాలు
-
స్టాలిన్ తరఫు న్యాయవాది కపిల్ సిబల్ వాదన: “ఎన్నికల పిటిషన్ వేయడానికి ఉండే 45 రోజుల గడువు ముగిసిన తర్వాతే ఈసీ ఈవీఎంల తనిఖీ చేపట్టింది. ఎన్నికల సంఘం చేసిన ఆలస్యం వల్లే మేము సాధారణ ఎన్నికల పిటిషన్ వేయలేకపోయాం. అందుకే రిట్ పిటిషన్ ద్వారా న్యాయం కోసం వచ్చాం. వీవీప్యాట్ సాఫ్ట్వేర్లో మానిప్యులేషన్ జరిగే అవకాశం ఉంది” అని బలంగా వాదించారు.
-
ఎన్నికల సంఘం వాదన: “రాజ్యాంగంలోని ఆర్టికల్ 329(బీ) ప్రకారం ఎన్నికల ఫలితాలను సవాల్ చేయాలంటే ఎన్నికల పిటిషన్ ద్వారానే రావాలి గానీ, ఇలా రిట్ పిటిషన్లతో కుదరదు. నిర్ణీత సమయంలో సరైన మార్గంలో రాకుండా ఇప్పుడు రావడం చట్టవిరుద్ధం. వంద శాతం వీవీప్యాట్ లెక్కింపు సాధ్యం కాదని సుప్రీంకోర్టు ఎప్పుడో తేల్చింది. ఇప్పుడు దీనికి అనుమతిస్తే ప్రతి ఒక్కరూ కోర్టుకు వచ్చి లేనిపోని వివాదాలు సృష్టిస్తారు” అని స్పష్టం చేసింది.
చివరికి మిగిలిందిదే…
ఇరువైపుల వాదనలు విన్న చీఫ్ జస్టిస్ ఎస్.ఏ. ధర్మాధికారి, జస్టిస్ జి. అరుల్ మురుగన్ ధర్మాసనం స్టాలిన్ వాదనతో ఏకీభవించలేదు. చట్టబద్ధమైన పద్ధతిలో కాకుండా వేసిన ఈ పిటిషన్ నిర్వహణకు అనర్హమని తేల్చిచెబుతూ దానిని తోసిపుచ్చింది. దీంతో అటు ఎన్నికల బరిలోనే కాకుండా, ఇటు న్యాయపోరాటంలోనూ స్టాలిన్కు గట్టి ఎదురుదెబ్బ తగిలినట్లయింది.