AE Nookaraju Case: నిందితుడు సాధిక్ ఖాన్‌ను యూపీ నుంచి కాకినాడకు తీసుకొచ్చిన పోలీసులు.. నేడు కోర్టులో హాజరు!

• తీవ్రస్థాయిలో ప్రశ్నోత్తరాలు: కాకినాడ ఏఎస్పీ పర్యవేక్షణలో ఆరుగురు సీఐల ప్రత్యేక బృందం సోమవారం ఉదయం నుంచి సాధిక్ ఖాన్‌ను విచారిస్తోంది. కుటుంబ సభ్యులను ఎలా బుట్టలో వేసుకున్నాడు? బ్లాక్‌మెయిలింగ్, ఆర్థిక దోపిడీ, బెదిరింపులకు సంబంధించిన ఆధారాలను రాబట్టే ప్రయత్నం చేస్తున్నారు.
• వైద్య పరీక్షలు & కోర్టు హాజరు: విచారణ అనంతరం నిందితుడికి ప్రభుత్వ ఆసుపత్రిలో వైద్య పరీక్షలు నిర్వహించి, మెజిస్ట్రేట్ ముందు హాజరుపరచనున్నారు. కేసులో మరిన్ని లోతైన ఆధారాలు సేకరించేందుకు నిందితుడిని పోలీస్ కస్టడీకి కోరాలని దర్యాప్తు బృందం నిర్ణయించింది.

కన్నీళ్లు పెట్టిస్తున్న ఘటన నేపథ్యం – అసలేం జరిగిందంటే?..

• ఆఖరి దశలో విషాదం: పిఠాపురం మండల పంచాయతీరాజ్ ఏఈగా పనిచేస్తున్న తిల్లపూడి నూకరాజు (61) వచ్చే జనవరిలో ఉద్యోగ విరమణ చేయాల్సి ఉంది. కానీ, సాధిక్ ఖాన్ పెట్టిన తీవ్ర మానసిక క్షోభను తట్టుకోలేక ఈ నెల 16న అర్ధరాత్రి భార్య మీనా (58), కుమార్తె సౌజన్య (38), మనవడు కార్తికేయరెడ్డి (10)తో కలిసి రాజమహేంద్రవరం రోడ్ కం రైల్ వంతెనపై నుంచి గోదావరిలోకి దూకేశారు.
• ఈదుకుంటూ బయటపడ్డ బాలుడు: 10 ఏళ్ల మనవడు కార్తికేయ దాదాపు 20 నిమిషాల పాటు నదిలో ఈదుతూ కేకలు వేయడంతో స్థానిక మత్స్యకారులు పడవలో వెళ్లి ప్రాణాలతో కాపాడారు. నూకరాజు, సౌజన్య, మీనా మృతదేహాలను పోలీసులు వెలికితీశారు.

సూసైడ్ నోట్లలో సాధిక్ పాపాలు..

• కలెక్టర్, ఎస్పీలకు ఏఈ లేఖ: “రైఫిల్ షూటింగ్ కోచ్ సాధిక్ ఖాన్ వేధింపులు భరించలేకే చనిపోతున్నాం. ఆ దుర్మార్గుడిని కఠినంగా శిక్షించాలి” అని నూకరాజు వాట్సాప్‌లో సహోద్యోగులకు పంపిన లేఖ కేసులో కీలకంగా మారింది.
• స్కూటర్ డిక్కీలో కుమార్తె రాసిన లేఖ: సౌజన్య రాసిన లేఖలో సాధిక్ తన ప్రైవేట్ ఫొటోలతో బ్లాక్‌మెయిల్ చేశాడని, మతం మారాలని ఒత్తిడి తెచ్చాడని, భర్తను సైతం విషమిచ్చి చంపాడని సంచలన ఆరోపణలు చేసింది.