NICU Fire Accident: ఆసుపత్రిలో అగ్నిప్రమాదం.. ముగ్గురు పసికందుల దుర్మరణం

NICU Fire Accident: మహారాష్ట్రలోని అమరావతి జిల్లా మహిళా ప్రభుత్వ ఆసుపత్రిలో సోమవారం తెల్లవారుజామున తీవ్ర విషాదం చోటుచేసుకుంది. నవజాత శిశువుల ఇంటెన్సివ్ కేర్ యూనిట్ (NICU) వార్డులో ఒక్కసారిగా చెలరేగిన అగ్నిప్రమాదంలో చికిత్స పొందుతున్న ముగ్గురు పసికందులు దట్టమైన పొగకు ఊపిరాడక ప్రాణాలు కోల్పోయారు. సకాలంలో స్పందించిన వైద్యులు, నర్సింగ్ సిబ్బంది చాకచక్యంగా వ్యవహరించి మిగిలిన 36 మంది శిశువులను సురక్షితంగా బయటకు తీసుకురావడంతో పెను ప్రమాదం తప్పింది.

పోలీసులు, ఆసుపత్రి వర్గాలు వెల్లడించిన వివరాల ప్రకారం.. ఆసుపత్రి నూతన భవనంలోని మూడో అంతస్తులో ఉన్న ఎన్ఐసీయూ వార్డులో తెల్లవారుజామున సుమారు 3:30 గంటల సమయంలో ఒక వెంటిలేటర్‌లో సాంకేతిక లోపంతో పేలుడు సంభవించింది. క్షణాల్లోనే మంటలు చెలరేగి వార్డు మొత్తం దట్టమైన నల్లటి పొగ అలుముకుంది. పొగ తీవ్రతకు వార్డులో అత్యంత విషమ పరిస్థితుల్లో చికిత్స పొందుతున్న ముగ్గురు శిశువులు ఊపిరాడక మరణించారు. తీవ్ర అస్వస్థతకు గురైన మరో ఆరుగురు చిన్నారులను రక్షించి వెంటనే స్థానిక సూపర్ స్పెషాలిటీ ఆసుపత్రికి తరలించారు. ప్రస్తుతం వారికి ప్రత్యేక వైద్య బృందం చికిత్స అందిస్తోంది.

ఈ ఘటనపై స్థానికులు, బాధిత కుటుంబాల నుంచి తీవ్ర ఆగ్రహం వ్యక్తమవుతోంది..

ఈ హృదయ విదారక ఘటనపై అమరావతి జిల్లా సంరక్షక మంత్రి చంద్రశేఖర్ బవాన్‌కులే తీవ్ర దిగ్భ్రాంతి వ్యక్తం చేశారు. మృతి చెందిన చిన్నారుల కుటుంబాలకు ప్రగాఢ సానుభూతి తెలియజేస్తూ.. పురిట్లోనే బిడ్డలను కోల్పోయిన తల్లిదండ్రులకు ఆ దేవుడే ధైర్యం ప్రసాదించాలని ప్రార్థించారు.

ఘటనపై సమగ్ర ఉన్నత స్థాయి దర్యాప్తునకు ఆదేశించామని, బాధితుల కుటుంబాలను ప్రభుత్వం అన్ని విధాలా ఆదుకుంటుందని స్పష్టం చేశారు. డీసీపీ సహా ఉన్నత స్థాయి పోలీసు అధికారులు ఘటనా స్థలాన్ని పరిశీలించి విచారణ ముమ్మరం చేశారు.