Panduga Sayanna: తెలంగాణ నేలపై నిరంకుశ పాలన, భూస్వామ్య దౌర్జన్యాలపై గళమెత్తిన విప్లవ వీరుడు, పేదల పాలిటి పెన్నిధి పండుగ సాయన్న పోరాటాలకు సముచిత గుర్తింపు లభించింది. ఆయన జయంతి, వర్ధంతి వేడుకలను ప్రతి ఏటా రాష్ట్ర పండుగలుగా, అధికారిక ప్రభుత్వ కార్యక్రమాలుగా నిర్వహించాలని తెలంగాణ ప్రభుత్వం కీలక నిర్ణయం తీసుకుంది. ఈ మేరకు ప్రభుత్వ ప్రధాన కార్యదర్శి (CS) అధికారిక ఉత్తర్వులు (జీవో) జారీ చేశారు.
బహుజన వీరుల త్యాగాలను స్మరిస్తూ ప్రభుత్వం తీసుకున్న ఈ నిర్ణయంపై రాష్ట్రవ్యాప్తంగా హర్షాతిరేకాలు వ్యక్తమవుతున్నాయి.
అధికారిక వేడుకల వివరాలు..
ప్రభుత్వ జీవో ప్రకారం కార్యక్రమాల నిర్వహణ ఇలా ఉండనుంది..
-
జయంతి వేడుకలు: ప్రతి సంవత్సరం అక్టోబర్ 22న పండుగ సాయన్న జయంతిని అధికారికంగా నిర్వహిస్తారు.
-
వర్ధంతి వేడుకలు: ప్రతి సంవత్సరం డిసెంబర్ 10న ఆయన వర్ధంతి కార్యక్రమాలను నిర్వహిస్తారు.
-
నోడల్ ఏజెన్సీ: ఈ వేడుకల నిర్వహణ బాధ్యతలను ప్రభుత్వం బీసీ సంక్షేమ శాఖకు అప్పగించింది. అన్ని జిల్లాల్లో కలెక్టర్ల పర్యవేక్షణలో జిల్లా స్థాయి అధికారిక ఉత్సవాలుగా ఘనంగా జరిపేలా ఆదేశాలు ఇచ్చారు.
ఇటీవల సర్దార్ సర్వాయి పాపన్న గౌడ్ విగ్రహావిష్కరణ సభలో మంత్రి వాకిటి శ్రీహరితో పాటు ముదిరాజ్ సంఘాల ప్రతినిధులు ముఖ్యమంత్రి రేవంత్ రెడ్డిని కలిసి చేసిన విజ్ఞప్తికి ప్రభుత్వం సానుకూలంగా స్పందించి ఈ జీవోను వెలువరించింది.
ఎవరీ పండుగ సాయన్న? – పేదల గుండెల్లో కొలువైన ‘రాబిన్హుడ్’
తెలంగాణ జానపద చరిత్రలో పండుగ సాయన్న పోరాటం ఒక చిరస్మరణీయ అధ్యాయం..
-
జననం & బాల్యం: ఉమ్మడి మహబూబ్నగర్ జిల్లా (పాలమూరు) నవాబుపేట మండలం మెరుగోనిపల్లి గ్రామంలో సాయమ్మ, అనంతయ్య దంపతులకు సాయన్న జన్మించారు. చిన్ననాటి నుంచే అసాధారణ దేహదార్ఢ్యం కలిగిన ఆయన.. ఒంటిచేత్తో భారీ బరువులు, ఎద్దుల బండ్లను సైతం ఎత్తేవారని చెబుతారు.
-
దౌర్జన్యాలపై తిరుగుబాటు: 19వ శతాబ్దపు చివరి దశకంలో నిజాం పాలకులు, దేశ్ముఖ్లు, భూస్వాముల అణచివేతకు వ్యతిరేకంగా సాయన్న తిరుగుబాటు బావుటా ఎగురవేశారు. తమ కుటుంబ భూములను ఆక్రమించుకున్న దొరలపై ఎదురుతిరిగి, పేదలు, దళితులు, గిరిజనుల రక్షణ కోసం ఒక సాయుధ దళాన్ని ఏర్పాటు చేశారు.
-
పేదలకు సంపద పంపిణీ: దోపిడీదారుల సంపదను స్వాధీనం చేసుకుని ఆకలితో అలమటించే పేదలకు పంచడం, నిరుపేదల పెళ్లిళ్లకు ఆర్థిక సాయం అందించడం ద్వారా ప్రజలకు రక్షకుడిగా నిలిచారు. అందుకే ఆయన్ను ప్రజలు ప్రేమగా ‘తెలంగాణ రాబిన్హుడ్’ అని పిలుచుకున్నారు.
-
అమరత్వం – జానపదాల్లో నిలిచిన వీరుడు: సాయన్న ఎదుగుదలను సహించలేని కొందరు కుట్రలు పన్ని ఆయనను కిరాతకంగా అంతమొందించినప్పటికీ, ప్రజల గుండెల్లో ఆయన చిరంజీవిగా నిలిచారు. నేటికీ తెలంగాణ పల్లెల్లో కిన్నెర కళాకారులు సాయన్న వీరగాథలను పాటల రూపంలో పాడుతూ సమాజంలో స్ఫూర్తిని నింపుతున్నారు.
సాయన్న త్యాగాలను ప్రభుత్వ పండుగగా అధికారికంగా గుర్తించడం ద్వారా ఆ విప్లవ వీరుడి పోరాట స్ఫూర్తి భావితరాలకు మరింతగా చేరువ కానుంది.