TG High Court: తెలంగాణలో నిరుపేద కుటుంబాలకు ఆర్థిక చేయూతనిచ్చే కళ్యాణలక్ష్మి, షాదీముబారక్ పథకాలపై హైకోర్టులో జరిగిన తాజా విచారణ సందర్భంగా న్యాయస్థానం కీలక వ్యాఖ్యలు చేసింది. కేవలం ప్రభుత్వ ఉత్తర్వుల (జీవోల) ద్వారానే కాకుండా, శాసనసభ చట్టబద్ధత లేకుండా ప్రజాధనాన్ని ఉచిత పథకాలకు ఎలా ఖర్చు చేస్తారని ప్రభుత్వాన్ని ప్రశ్నించింది.
ముందుగా ప్రభుత్వ రంగ సంస్థలను (PSUs) లాభాల బాట పట్టించి, ఆ ఆదాయంతో ఇటువంటి సంక్షేమ పథకాలను నడపవచ్చు కదా అని ధర్మాసనం అభిప్రాయపడింది.
స్టే ఎత్తివేయాలని కోరిన ప్రభుత్వం – బడ్జెట్ కేటాయింపుల వాదన..
ఈ పథకాల అమలుపై విధించిన మధ్యంతర స్టేను ఎత్తివేయాలని కోరుతూ తెలంగాణ ప్రభుత్వం తరఫు న్యాయవాదులు హైకోర్టుకు విజ్ఞప్తి చేశారు..
-
ప్రభుత్వ వాదన: రాష్ట్ర బడ్జెట్లో ఆమోదించిన నిధుల కేటాయింపుల ప్రకారమే కళ్యాణలక్ష్మి, షాదీముబారక్ పథకాలకు లబ్ధిదారులకు నిధులు విడుదల చేస్తున్నామని అడ్వొకేట్ జనరల్ కోర్టుకు తెలిపారు. నిరుపేద ఆడబిడ్డల పెళ్లిళ్ల కోసం అమలవుతున్న ఈ పథకం నిలిచిపోతే ఎంతోమంది ఇబ్బంది పడతారని పేర్కొన్నారు.
-
భూసేకరణ బాధితుల అంశం: మరోవైపు రాష్ట్రంలో భూసేకరణ పేరుతో భూములు కోల్పోయిన నిర్వాసితులకు సరైన నష్టపరిహారం అందక నిత్యం కోర్టుల చుట్టూ తిరుగుతున్నారని న్యాయస్థానం ప్రస్తావించింది. ఆ సమస్యలను పరిష్కరించకుండా ఉచిత పథకాలపై ఎలా ముందుకెళ్తారని ప్రశ్నిస్తూ, భూ బాధితుల సమస్యలపై సమగ్ర వివరాలను కోర్టు ముందుంచాలని ఆదేశించింది.
తదుపరి విచారణ రేపటికి వాయిదా:
ఈ పథకాలపై దాఖలైన పిటిషన్లలో లేవనెత్తిన రాజ్యాంగబద్ధత అంశాలపై ప్రభుత్వం సమగ్ర కౌంటర్ దాఖలు చేయాలని ఆదేశిస్తూ, స్టే ఎత్తివేత పిటిషన్పై తదుపరి విచారణను ధర్మాసనం మరుసటి రోజుకు వాయిదా వేసింది.