Uday Krishna Reddy: రూమ్‌లో కత్తి, ప్రేమలేఖలు సేకరించిన పోలీసులు.. ఆ మహిళతో లివ్-ఇన్ రిలేషన్ కలకలం!

రూమ్‌లో సోదాలు.. కత్తి, ప్రేమలేఖల లభ్యం!

విచారణలో భాగంగా పోలీసులు అశోక్‌నగర్‌లోని ఉదయ్ కృష్ణారెడ్డి గదిలో ‘సీన్ రీకన్‌స్ట్రక్షన్’ నిర్వహించి ముమ్మర తనిఖీలు చేశారు. ఈ సోదాల్లో నిందితుడి గది నుంచి..

• మొబైల్ ఫోన్, ల్యాప్‌టాప్

• ఒక పదునైన కత్తి

• వేర్వేరు చేతిరాతలతో ఉన్న రెండు ప్రేమలేఖలను పోలీసులు స్వాధీనం చేసుకున్నారు.

ఈ ప్రేమలేఖలపై ఉన్న ఆధారాలను పట్టుకుని ఆరా తీయగా.. ఆంధ్రప్రదేశ్‌కు చెందిన ఒక వివాహితతో ఉదయ్‌కి సన్నిహిత సంబంధం ఉన్నట్లు తేలింది.

వివాహితతో పరిచయం.. లివ్-ఇన్ ప్రతిపాదన!

పోలీసుల దర్యాప్తులో తేలిన కథనం ప్రకారం.. 2014లో పెళ్లయి, 2023 నుంచి భర్తకు దూరంగా ఉంటున్న ఏపీకి చెందిన ఒక మహిళతో ఉదయ్‌కి పరిచయమైంది. ఉదయ్ చెప్పడంతోనే ఆమె తన పాత ఉద్యోగాన్ని వదిలేసి అశోక్‌నగర్‌లోని ఓ ఐఏఎస్ కోచింగ్ సెంటర్‌లో చేరింది.

వీరిద్దరి మధ్య సాన్నిహిత్యం పెరిగాక తనతో పాటు ‘లివ్-ఇన్ రిలేషన్‌షిప్‌’లో ఉండాలని ఉదయ్ ప్రతిపాదించగా, భర్తతో చట్టబద్ధమైన విడాకులు రాకపోవడంతో ఆమె దానికి నిరాకరించినట్లు తెలిసింది.

బాధితురాలిని కలిసి నిజాన్ని తెలుసుకున్న మహిళ!

ఈ ఏడాది ఫిబ్రవరిలో ఫిర్యాదుదారుడైన ట్రైనీ మహిళా ఐపీఎస్ అధికారిణి సదరు వివాహితను కలిసి ఉదయ్ కృష్ణారెడ్డి విపరీత ప్రవర్తన, తనపై చేసిన దాడుల గురించి స్పష్టంగా వివరించారు. దీంతో అతని నిజస్వరూపాన్ని తెలుసుకున్న ఆ మహిళ కూడా ఉదయ్‌ను పక్కనపెట్టి దూరంగా ఉంటోంది.

ఉదయ్ అత్యంత క్రూరమైన కోపంతో ఉండేవాడని, బాధితురాలి గదిలోకి బలవంతంగా చొరబడి ఫోన్ లాక్కున్నట్లు పోలీసులకు గట్టి ఆధారాలు లభించాయి. శిక్షణ సమయంలో కూడా అతడి సైకో ప్రవర్తనతో తోటి అధికారులంతా తీవ్ర మానసిక ఒత్తిడికి గురైనట్లు సమాచారం.

కస్టడీకి తీసుకునేందుకు పోలీసుల సన్నాహాలు

ఈ కేసులో ఇప్పటివరకు సుమారు 20 మందికి పైగా సాక్షుల నుంచి పోలీసులు వాంగ్మూలాలను సేకరించారు. స్వాధీనం చేసుకున్న ఫోన్, ల్యాప్‌టాప్‌లోని డిజిటల్ డేటాను విశ్లేషిస్తున్నారు. నిందితుడిని పోలీస్ కస్టడీకి తీసుకుని మరింత లోతుగా విచారిస్తే మరికొన్ని నిజాలు వెలుగులోకి వచ్చే అవకాశం ఉంది.