Vizag Beach: స్నేహితుల దినోత్సవం (ఫ్రెండ్షిప్ డే).. పైగా ఆదివారం కావడంతో ఆ స్నేహితులంతా సరదాగా గడిపి తీపి జ్ఞాపకాలను కెమెరాలో బంధించుకుందామని అనుకున్నారు. కానీ, అంతలోనే దూసుకొచ్చిన ఒక రాకాసి అల ఆ ఇద్దరి జీవితాలను కబళించి, ఆయా కుటుంబాల్లో తీరని శోకాన్ని నింపింది.
విశాఖపట్నం స్టీల్ ప్లాంట్ సమీపంలోని పాతగంగవరం సముద్ర తీరంలో ఈ హృదయవిదారక ఘటన చోటుచేసుకుంది.
ఫోటోషూట్ చేస్తుండగా విరుచుకుపడ్డ అల!
న్యూపోర్ట్ సీఐ కామేశ్వరరావు తెలిపిన వివరాల ప్రకారం.. పెందుర్తికి చెందిన జి.దామోదర్ అలియాస్ రాము (31), మహారాణిపేటకు చెందిన ఇంటర్ ద్వితీయ సంవత్సరం విద్యార్థిని ఎస్.నీతూ (19)లతో పాటు డి.సురేష్, కనకమహాలక్ష్మి, డి.హాసిని, పి.రాజు, ఎస్.మందిర అనే ఏడుగురు మిత్రులు మూడు బైకులపై సరదాగా పాతగంగవరం తీరానికి వచ్చారు. దామోదర్ ఆటో నడుపుతూ ఉంటాడు.
ముందుగా వీరంతా సమీపంలోని కొండపై ఉన్న రాధామాధవస్వామిని దర్శించుకున్నారు. అనంతరం సముద్ర తీరంలోని రాళ్ల గుట్టల వద్దకు చేరుకుని వీడియోలు, ఫోటోలు తీసుకోవడం ప్రారంభించారు. ఆ సమయంలో హఠాత్తుగా ఒక బలమైన కెరటం వారిపైకి విరుచుకుపడింది.
స్నేహితురాలిని కాపాడబోయి..
అల ధాటికి నీతూ ఒక్కసారిగా నీళ్లలోకి లాగబడి సముద్రంలో కొట్టుకుపోవడం ప్రారంభించింది. కొట్టుకుపోతున్న స్నేహితురాలు నీతూను ఎలాగైనా కాపాడుకోవాలనే తపనతో రాము వెంటనే సముద్రంలోకి దూకాడు. అయితే, అలల ఉధృతికి నీతూతో పాటు రాము కూడా సముద్రంలో మునిగి గల్లంతయ్యాడు. ప్రమాదాన్ని గమనించిన మరో స్నేహితుడు సురేష్ వెంటనే స్పందించి మిగిలిన వారిని పక్కకు లాగేయడంతో పెద్ద ప్రమాదం తప్పింది.
విషయం ఏంటంటే.. ఈ బృందంలో ఉన్న కనకమహాలక్ష్మి, గల్లంతైన దామోదర్లకు త్వరలోనే వివాహం జరగాల్సి ఉంది. కళ్లముందే భావి భర్త నీళ్లలో కొట్టుకుపోవడంతో ఆమెతో పాటు స్నేహితులు షాక్కు గురయ్యారు.
నేవీ హెలికాప్టర్తో ముమ్మర గాలింపు
సమాచారం అందుకున్న వెంటనే న్యూపోర్ట్ పోలీసులు ఘటనా స్థలానికి చేరుకుని పరిస్థితిని సమీక్షించారు. గల్లంతైన నీతూ, దామోదర్ల ఆచూకీ కోసం నేవీ హెలికాప్టర్, డ్రోన్లు ఇంకా కోస్ట్ గార్డ్ టీమ్ల సహాయంతో నిన్న (ఆదివారం) సాయంత్రం వరకు ముమ్మర గాలింపు చర్యలు చేపట్టారు.
సంతోషంగా వేడుకలు జరుపుకోవడానికి వెళ్లిన బిడ్డలు సముద్రంలో గల్లంతయ్యారనే వార్త తెలుసుకున్న కుటుంబ సభ్యులు తీరానికి చేరుకుని కన్నీరుమున్నీరుగా విలపించారు. పోలీసులు కేసు నమోదు చేసుకుని దర్యాప్తు చేస్తున్నారు.