Nara Lokesh: గతంలో కొందరు ఉత్తరాంధ్రను చాలా తక్కువగా చూసి అవమానించారు. ఎర్ర బస్సు కూడా సరిగ్గా రాని చోటుకి ఎయిర్బస్ అవసరమా అని ఎగతాళి చేశారు. కానీ ఈరోజు అదే నేలపై విమానాశ్రయం వచ్చింది, మన ప్రధాని మోదీ వచ్చారు.. ఇది మన ఉత్తరాంధ్ర దెబ్బ అంటూ రాష్ట్ర ఐటీ, విద్యుత్ మరియు మానవ వనరుల అభివృద్ధి శాఖ మంత్రి నారా లోకేష్ పదునైన విమర్శల బాణాలు విసిరారు.
విజయనగరం జిల్లా భోగాపురం అల్లూరి సీతారామరాజు అంతర్జాతీయ విమానాశ్రయాన్ని ప్రధానమంత్రి నరేంద్ర మోదీ శనివారం ప్రారంభించిన అనంతరం నిర్వహించిన భారీ బహిరంగ సభలో లోకేష్ మాట్లాడారు.
నమో అంటే.. ధైర్యం, నమ్మకం, సురక్షిత భారత్!
ఉత్తరాంధ్ర అభివృద్ధికి ప్రధాని మోదీ పూర్తి సహకారం అందించారని లోకేష్ కొనియాడారు..
-
విప్లవ వీరుడి నేల: స్వాతంత్ర్య సంగ్రామంలో మన్యం వీరుడు అల్లూరి సీతారామరాజు నడిచిన ఈ పవిత్ర నేలలో విమానాశ్రయం రావడం గర్వకారణమని పేర్కొన్నారు.
-
నమో (NAMO) అర్థం: నరేంద్ర మోదీ (NAMO) నాయకత్వానికి సరికొత్త అర్థం చెప్తూ.. “హిమ్మత్ (ధైర్యం), విశ్వాస్ (నమ్మకం), సురక్షిత్ భారత్ (సురక్షిత భారతం)” అని వర్ణించారు.
-
ఉక్కు పరిశ్రమకు రక్షణ: ప్రత్యేక ప్యాకేజీని మంజూరు చేసి విశాఖ ఉక్కు పరిశ్రమను కాపాడినందుకు ప్రధానికి ధన్యవాదాలు తెలిపారు.
-
డబుల్ ఇంజిన్ సర్కార్: సీఎం చంద్రబాబు నాయుడు, ప్రధాని మోదీ కలయిక రాష్ట్రానికి పవర్ ఇంజిన్లా మారిందని, అమరావతి, పోలవరం ప్రాజెక్టులతో పాటు వైజాగ్ ఉక్కు పరిశ్రమ పరిరక్షణ, భోగాపురం ఎయిర్పోర్ట్ నిర్మాణాలు వేగంగా సాగాయని గుర్తుచేశారు.
ఏపీకి ‘పవర్ ఇంజిన్’గా భోగాపురం!
సహజ వనరులు సమృద్ధిగా ఉన్న ఉత్తరాంధ్ర ప్రాంతానికి ఈ ఎయిర్పోర్ట్ రాకతో సరికొత్త ఊపు రానుందని లోకేష్ ధీమా వ్యక్తం చేశారు
-
వేగవంతమైన నిర్మాణం: రికార్డు సమయంలో విమానాశ్రయాన్ని నాణ్యతతో నిర్మించిన జీఎంఆర్ (GMR) అధినేతను, పౌర విమానయాన మంత్రి రామ్మోహన్ నాయుడిని అభినందించారు.
-
ఉపాధి & పెట్టుబడులు: విమానాశ్రయం అందుబాటులోకి రావడంతో ఎగుమతులు పెరిగి.. ఇక్కడే భారీ డేటా సెంటర్లు, ఐటీ పరిశ్రమలు ఏర్పాటు కాబోతున్నాయని, స్థానిక యువతకు వేలాదిగా ఉద్యోగావకాశాలు వస్తాయని చెప్పారు.
-
రాజకీయ సహకారం: 2029 సార్వత్రిక ఎన్నికల్లో కూడా ప్రధాని మోదీ నేతృత్వంలోని ఎన్డీయే మళ్లీ అధికారంలోకి వచ్చేలా ఆంధ్రప్రదేశ్ ప్రజలు సంపూర్ణ మద్దతు ఇస్తారని నారా లోకేష్ స్పష్టం చేశారు.