Ganesh Idol: వినాయక చవితి వేడుకలపై కఠిన నిబంధనలు

విగ్రహాల సంఖ్య మాత్రమే కాదు.. విగ్రహాల ఎత్తు విషయంలోనూ తీవ్రమైన పోటీ నెలకొంటోంది. దేవుడిపై భక్తిని కొలవడానికి విగ్రహం సైజుతో పనిలేకపోయినా, “మా విగ్రహమే పెద్దది” అని చూపించుకునే క్రమంలో ప్రమాదాలు కొనితెచ్చుకుంటున్నారని హైదరాబాద్ పోలీస్ యంత్రాంగం ఆందోళన వ్యక్తం చేస్తోంది.

ఈసారి 16 అడుగులే గరిష్టం!

గత ఏడాది నిమజ్జనం ఇంకా రవాణా సమయంలో జరిగిన ప్రమాదాలను దృష్టిలో ఉంచుకుని, ఈసారి సైబరాబాద్/హైదరాబాద్ వ్యాప్తంగా విగ్రహాల ఎత్తు గరిష్ఠంగా 16 అడుగులకు మించకూడదని హైదరాబాద్ పోలీస్ కమిషనర్ వి.సి. సజ్జనార్ స్పష్టం చేశారు.

బంజారాహిల్స్‌లోని కమిషనరేట్‌లో విగ్రహాల తయారీదారులతో నిర్వహించిన ప్రత్యేక సమావేశంలో ఆయన పలు కీలక ఆదేశాలు జారీ చేశారు..

• గత అనుభవాలు: గతేడాది నగరంలో ఏకంగా 23 వేల విగ్రహాలను ప్రతిష్ఠించగా, వాటి రవాణా సమయంలో నాలుగు చోట్ల విద్యుత్ తీగలు తాకి ప్రమాదాలు చోటుచేసుకున్నాయి. ఈసారి అలాంటి చిన్న పొరపాటుకు కూడా తావివ్వకూడదని స్పష్టం చేశారు.

• ప్రత్యేక మార్గాలు: ధూల్‌పేట్, జల్పల్లి, మైలార్‌దేవ్‌పల్లి వంటి ప్రధాన ప్రాంతాల నుంచి భారీ విగ్రహాలను నగరంలోకి తీసుకొచ్చేందుకు ప్రత్యేక ‘ఎంట్రీ, ఎగ్జిట్’ రూట్లను కేటాయిస్తున్నట్లు తెలిపారు.

• ముందస్తు సమాచారం: విగ్రహాలను తరలించే వాహనాలు, వాడే క్రేన్లకు కచ్చితంగా సర్టిఫికేషన్ ఉండాలి. కరెంట్ తీగలు, ఫ్లైఓవర్లు, మెట్రో మార్గాలకు ఆటంకం కలగకుండా సమీప ట్రాఫిక్ పోలీసులకు ముందస్తు సమాచారం ఇచ్చి అనుమతి పొందాకే విగ్రహాలను కదిలించాలి.

పర్యావరణ పరిరక్షణలో భాగంగా కళాకారులు మరియు భక్తులు మట్టి విగ్రహాల వాడుకను ప్రోత్సహించాలని, సులభంగా నిమజ్జనం అయ్యేలా చిన్న విగ్రహాలను ఎంచుకోవాలని సీపీ విజ్ఞప్తి చేశారు.

ఖైరతాబాద్ ‘పంచముఖ సంకటహర మహా గణపతి’ @ 69 అడుగులు

ఇదిలా ఉండగా, ప్రపంచవ్యాప్తంగా గుర్తింపు పొందిన ఖైరతాబాద్ గణేష్ ఈసారి 69 అడుగుల ఎత్తు, 28 అడుగుల వెడల్పుతో “పంచముఖ సంకటహర మహా గణపతి” రూపంలో భక్తులకు దర్శనమివ్వనున్నారు. గణపయ్యకు కుడివైపున సోమనాథ్ జ్యోతిర్లింగం, ఎడమవైపున కాళీమాత విగ్రహాలను కొలువుదీర్చనున్నట్లు ఉత్సవ కమిటీ ప్రకటించింది.

భక్తుల ఉత్సాహం, ఆనందం ఎంత ముఖ్యమో.. ప్రాణ రక్షణ, భద్రత అంతే ముఖ్యమని గుర్తుచేస్తూ, పోలీసుల నిబంధనలకు అందరూ సహకరించాలని అధికారులు కోరారు.