Dhanush: తమిళ నటుడు, దర్శకుడు ధనుష్ (Dhanush) రాజకీయాల్లోకి రాబోతున్నారనే ప్రచారం కోలీవుడ్లో మరోసారి తీవ్ర చర్చనీయాంశంగా మారింది. చెన్నైలో అభిమానులు నిర్వహించిన ఒక రక్తదాన శిబిరంలో పాల్గొన్న ఆయన చేసిన వ్యాఖ్యలు ఈ ఊహాగానాలకు కారణమయ్యాయి.
1. రాజకీయ ప్రవేశంపై ఊహాగానాలు ఎందుకంటే?
రక్తదాన శిబిరంలో ధనుష్ మాట్లాడుతూ అభిమానులకు ఒక కీలక పిలుపునిచ్చారు.. అభిమానులు కేవలం సినిమా ఆడియో వేడుకలు, ఫ్యాన్స్ మీట్లకు మాత్రమే పరిమితం కాకూడదని.. తమ తమ ప్రాంతాల్లో ప్రజల అవసరాలను గుర్తించి సంక్షేమ కార్యక్రమాల్లో చురుగ్గా పాల్గొనాలని కోరారు. మీ ఐక్యతలో ఎంతో శక్తి ఉంది, మిమ్మల్ని చూసి నేను మరింత గర్వపడేలా మంచి పనులు చేయండి అని ధనుష్ వ్యాఖ్యానించారు. తమిళగ వెట్రి కజగం (TVK) పార్టీ పెట్టిన విజయ్ కూడా గతంలో తన అభిమానులకు ఇలాంటి పిలుపే ఇచ్చారని, ధనుష్ కూడా అదే బాటలో పొలిటికల్ ఎంట్రీ ఇస్తారని నెటిజన్లు భావిస్తున్నారు. అయితే రాజకీయాల్లోకి రావడంపై ధనుష్ ఎలాంటి అధికారిక ప్రకటన చేయలేదు.
2. ‘రాయన్’ జాతీయ అవార్డు విమర్శలపై ధనుష్ స్పందన
72వ జాతీయ చలనచిత్ర అవార్డుల్లో ‘రాయన్’ చిత్రానికి ఉత్తమ తమిళ చిత్రంగా అవార్డు రావడంపై నెట్టింట విమర్శలు వచ్చాయి. ‘మహారాజా’, ‘సత్యం సుందరం’ వంటి సినిమాలకు రావాల్సిందని కొందరు అభిప్రాయపడ్డారు. దీనిపై ధనుష్ స్పందిస్తూ:
-
అభిప్రాయాలను గౌరవిస్తా: ‘రాయన్’ కంటే మెరుగైన సినిమాలు ఆ ఏడాది వచ్చి ఉండవచ్చని, ప్రేక్షకుల అభిప్రాయాలను తాను గౌరవిస్తానని చెప్పారు.
-
అప్పుడు ఎవరూ ప్రశ్నించలేదు: తన కెరీర్లో ఎంతో ప్రశంసలు పొందిన ‘వడ చెన్నై’, ‘కర్ణన్’, ‘మరియాన్’ వంటి సినిమాలకు జాతీయ అవార్డులు రానప్పుడు ఎవరూ ప్రశ్నించలేదని గుర్తుచేశారు.
-
విజయాన్ని సెలబ్రేట్ చేసుకోండి: తమిళ సినిమాకు అవార్డు వచ్చినప్పుడు విమర్శలు చేయడం కంటే, ఆ విజయాన్ని అందరూ కలిసి వేడుకగా జరుపుకోవాలని పిలుపునిచ్చారు.